Санкт-Петербурджы дохтырты лæвар

0
36

 

Медицинæйы къабаз республикæйы тыхджындæр æмæ æнтыстджындæр кæй кæны, ууыл дзурæг цау æрцыд знон Дзæуджыхъæуы 1-æм поликлиникæйы. Ардæм радон хатт ссыдысты академик Павловы номыл Санкт-Петербурджы паддзахадон медицинон университеты ахуыргæндтæ æмæ дохтыртæ. Ацы уæлдæр ахуыргæнæндон æмæ нæ республикæйы медицинон кусæндæтты ‘хсæн бастдзинæдтæ сты рагон æмæ фидар. Нырæй фæстæмæ та уыдзысты ноджы фидардæр, уымæн æмæ æртæ мæйы размæ Санкт-Петербурджы паддзахадон медицинон университет æмæ Дзæуджыхъæуы 1-æм поликлиникæ бафыстой медицинон, наукон-иртасæн æмæ ахуырадон процесстæн ахъазгæнæг бадзырд.

Фæлæ ацы хатт СанктПетербурджы дохтыртæ канд нæ рынчынты æнæниздзинады уавæр сбæрæг кæныны тыххæй не ссыдысты, фæлæ Дзæуджыхъæуы 1-æм поликлиникæйы цы сурдологон центр ис, «Радуга звуков», зæгъгæ, уымæн сластой нырыккон техникæ — аудиометр, диагностикон станцæ æмæ æндæр сурдологон ифтонггæрзтæ.

Петербургæй ссæуæг ахуыргæндтæ æмæ дохтыртæн арфæ ракодта республикæйы Хицауады Сæрдар Тускъаты Таймураз:

— Арфæ уын кæнын, кæй нæ фæзивæг кодтат æмæ та Ирыстонмæ кæй ссыдыстут, уый фæдыл. Уæ зонындзинæдтæ сты бирæ, уæ дæсныдзинад — бæрзонд, æмæ канд уыдон нæ, фæлæ уæ зæрдæты хъарм дæр рынчынтæн кæй дæттут, уый тыххæй уын стыр бузныг, кæй сдзæбæх кодтат, æппæт уыцы рынчынты номæй. Нæ республикæйы медицинон къабаз райрæзын кæныны хъуыддагмæ аккаг бавæрæн кæй хæссут, уый тыххæй уын уæлдай арфæ кæнын.

Хицауады Сæрдар арфæ ракодта Санкт-Петербурджы цæрæг ирæтты æхсæнады сæрдар Наниты Петрæн дæр, дыууæ ‘рдыгæй медицинон специалистты ‘хсæн бастдзинæдтæ фидар кæнынмæ стыр æргом кæй здахы æмæ, æндæр регионы цæргæйæ, Цæгат Ирыстон рæсугъдæй равдисыныл кæй архайы, уый фæдыл. Уазджытæн арфæ ракодта республикæйы æнæниздзинад хъахъхъæнынады министры хæдивæг Цыдаты Татьянæ дæр. Куыд загъта, афтæмæй Петербурджы дохтыртæ, Ирыстонмæ ссæугæйæ, алы хатт дæр рынчынтæн саразынц дæсны консультацитæ, бацамонынц хуыздæр дзæбæхгæнæн мадзæлттæ, уымæй та, æппынфæстаг, аразгæ у адæймагæн йе ‘нæниздзинады уавæр æмæ йæ царды хæрзхъæддзинад.

Уазджыты номæй арфæ ракодтой Павловы номыл Санкт-Петербурджы паддзахадон медицинон университеты проректор, профессор Олег Гриненко, ацы ахуыргæнæндоны наукон-иртасæн центры лабораторийы сæргълæууæг, профессор Мария Бобошко, медицинон университеты æнæниздзинад хъахъхъæнынады территориалон оргæнтимæ кусыны фæдыл хайады хицау Татьянæ Буглаева æмæ иннæтæ. Се ‘ппæт дæр бафиппайдтой, Цæгат Ирыстоны Сæргълæууæг, Хицауад, Æнæниздзинад хъахъхъæнынады министрад стыр æргом кæй здахынц республикæйы медицинон къабаз ноджы бæрзонддæр къæпхæнмæ сисыны хъуыддагмæ.

Фембæлды кæронбæттæны уазджытæн арфæ ракодта Дзæуджыхъæуы 1-æм поликлиникæйы сæйраг дохтыр Магаты Хъазыбег.

— Хъусæй хорз чи нæ хъусы, ахæм рынчынты сæ низæн бæстон диагностикæ скæныны тыххæй раздæр æрвыстам Санкт-Петербургмæ. Ныр нын ахæм ахъаззаг лæвар кæй скодтат, уый фæрцы нæ рынчынты сымахмæ æрвитын нал хъæудзæн, æппæт гæнæнтæ сын уыдзæн Дзæуджыхъæуы, æмæ уын уый тыххæй бузныг. Республикæйæн уый у стыр хъуыддаг, уымæн æмæ, хъусæй хорз чи нæ хъусы, ахæм рынчынтæ республикæйы ис дзæвгар — 50 мин адæймагæй фылдæр. Мæ зæрдæ дарын, нырæй фæстæмæ дæр нæ бастдзинæдтæ æнгомдæр кæй кæндзысты æмæ уыцы бастдзинад рынчынты æнæниздзинадыл хорзæрдæм кæй зындзæн, ууыл, — загъта сæйраг дохтыр. ДЕДЕГКАТЫ Зæлинæ

 

ОСТАВЬТЕ ОТВЕТ

Please enter your comment!
Please enter your name here