Æргом фыстæгæн — æргом дзуапп

0
44

 

Дзæуджыхъæуы Хетæгкаты Къостайы номыл парчы дæллаг фарс иу арæзтад ныр цыппæрдæс азæй фылдæр æдзæллаг цыртдзæвæнау, адæймаджы зæрдæ мæгуыр кæны. Йæ алыварс æвзæрынц алыхуызон ныхæстæ, алыхуызон, саразæн кæмæн нæй, ахæм фæндæттæ, суанг ма фæзынынц, хъуыддагмæ æппындæр чи ницы бар дары, ахæм æхсæнадон хъуыдытæ дæр. Се ‘рхъуыдыгæнджытæ дугъон бæхыл саргъ авæрæгау Интернеты тыгъдады фестынц мæнг хабархæссæг æмæ сыл адæм баууæндынц. Ахæм æхсæнадон хъуыды рапарахатчынди, зæгъгæ, уыцы бирæуæладзыгон агъуысты алыварс автомашинæтæн лæууæнтæ куы аразой, уæд хæлд цæудзысты, хæстæг æм цы уынг ис (Тæбæхсæуы-фырты номыл уынг), уый бирæуæладзыгон хæдзæрттæ дæр. Æмæ, кæй зæгъын æй хъæуы, катайы æфтауынц сæ цæрджыты. Республикæ æмæ горæты разамонджытæм, газет «Рæстдзинад»-ы редакцимæ ныффыстой æргом фыстæг:

«Зынаргъ газет «Рæстдзинад»-ы редакци! Фыссынц уæм Тæбæхсæуты Балойы номыл уынджы тыхст цæрджытæ. Æрæджы «Хабæрттæй» фехъуыстам, тынг хъыг нын чи уыд, ахæм диссаджы хабар, горæты Хетæгкаты Къостайы номыл фæлладуадзæн парчы астæу цы бирæуæладзыгон агъуыст сарæзтой, уый дарддæр аразынмæ хъавынц, зæгъгæ. Æнæхъæн горæты цæрджыты хъуыдыйы сæрты ахизгæйæ (нæ йæ æмбарæм, ацы аз 21 августы Æхсæнадон совет йæ æмбырды куыд æмæ кæимæ ныхас кодта), закъон ницæмæ даргæйæ (Арбитражон тæрхондоны уынаффæ, 3 уæладзыгæй уæлдæр аразыны бар кæй нæй, уый ничи аивта), горæты раздæры æппæт нормæтæ халгæйæ. Бирæуæладзыгон агъуыст аразæг хицæуттæ нæ ахъуыды кодтой, агъуыстмæ автомашинæйыл бацæуæнтæ æмæ сæ лæууæн бынæттыл, æнæуый дæр азмæлæн кæм нæй, горæты уыцы бæрæгастæу. Æппæт уыдæттæ катайы æнæфтаугæ не сты, хъуыддагмæ куыдфæндыйы цæстæй чи нæ кæсы, уыцы горæтæгты. Нæ парк адæймæгты къорды хи исбонад куы нæ у, фæлæ республикæйы цæрджыты æмæ уазджыты уарзон фæлладуадзæн, сæрыстыр кæмæй сты, уыцы бынат.

 Курæм уæ, равзарут уыцы вазыгджын хъуыддаг æмæ ныммыхуыр кæнут æргом фыстæг-курдиат нæ республикæйы æмæ горæты разамонджытæм.

Зæрдæдаргæйæ уын аргъгæнгæйæ Тæбæхсæуты Балойы номыл уынджы цæрджытæ.

РЦИ-Аланийы Сæргълæууæг

Битарты Вячеславмæ

 Дзæуджыхъæуы Минæвæртты æмбырды сæрдар

Хæдарцаты Махарбегмæ

Дзæуджыхъæуы бынæттон хиуынаффæйады администрацийы сæргълæууæг

Æлбегаты Барисмæ

Дзæуджыхъæуы муниципалон сырæзты цур Æхсæнадон советы сæрдар

Михаил Шаталовмæ

РЦИ-Аланийы прокурор Владимир Векшинмæ

ÆРГОМ ФЫСТÆГ

Зынаргъ разамонджытæ!

 Мах, Дзæуджыхъæуы Тæбæхсæуты Балойы номыл уынджы 2-æм æмæ 16-æм хæдзæртты цæрджытæ, дзыллон хабархæссæг фæрæзтæй базыдтам, 21 августы цы æхсæнадон æмбырд уыд, уым ныхас кæй цыд, раздæр сывæллæтты найæн бынат кæм уыд, уый фарсмæ цы дзырддаджы бирæазыккон арæзтад — 13-уæладзыгон бæстыхай сырæзт, уый зæххытæ иу категорийæ æндæр категоримæ раивыныл.

Уыимæ, РЦИ-Аланийы Арбитражон тæрхондоны уынаффæ ницæмæ даргæйæ, уыцы æрдæгарæзт бæстыхай, æвæццæгæн, сæвæрынмæ хъавынц закъоны бындурыл.

 Сайт «Градус-Про»-йы 2018 азы 21 августы цы æрмæг мыхуыргонд æрцыд, «Парк Юрского периода», зæгъгæ, уым ООО «Астам»-ы генералон директоры хæдивæг Дзгойты Эдуард дзуапп нæ радта, 13 уæладзыджы куыд пайдагонд цæудзысты, уымæн, æрмæст æртыккаг фæлварæнæй йæ бон бацис ахæм дзуапп раттын: «Куы бахъæуа, уæд закъонæвæрынад дæр аивдзыстæм».

Уыцы фарстатæ Уæрæсейы Федерацийы Зæххы кодексмæ куы хауынц æмæ Уæрæсейы Федерацийы алы ран дæр æнæмæнг æххæстгæнгæ куы сты, уæд сæ куыд ивынмæ хъавы, уый æмбæрстгонд нæу.

Уыимæ, уыцы æмбырды ныхас цыд зæххы хай Р5 категорийæ Р4-мæ раивыныл. Р5 категоримæ гæсгæ дзы аразæн ис бæстыхæйттæ æмæ инженеронтехникон лæггæдты агъуыстытæ, граждайнаг хихъахъхъæнынады объекттæ, цъæх фæлысты зайæгойтæ. Р4 категоримæ гæсгæ та — туристон базæтæ, фысымуæттæ, пансионаттæ, аквапарктæ, сывæллæтты хинайæнтæ, алцæмæй æххæст кæсæн залтæ, уыдонимæ, кинотеатртæ, фитнес-залтæ, æхсæнадон хæлцы куыстуæттæ æмæ æндæртæ, фæлæ уый дæр бар нæ дæтты 13-уæладзыгон бæстыхæйттæ аразынæн.

Диссаг та уый у, æмæ æмбырды æппындæр æвæрд не ‘рцыд тæрхондоны уынаффæ сæххæст кæныны — æртæйæ уæлæмæ уæладзгуытæ райхалыны фарста.

 Уыцы æмбырды раныхасгæнæг Архитекторты цæдисы правленийы сæрдары хæдивæг Цæгат Кавказы хæххон-металлургон институты архитектурæйы кафедрæйы профессор Алыккаты Руслан бафиппайдта: «Бирæуæладзыгон бæстыхай аразынæн бар куы истой, уыцы рæстæг УФ-йы Зæххы кодексмæ гæсгæ иумæйаг пайдайы зæххытыл (фæзтæ, парктæ, сквертæ, былгæрæттæ) нæй аразæн, комкоммæ уыцы бынæтты архайдмæ чи нæ хауы, ахæм агъуыстытæ. Кæд арæзтад цæуы парчы, уæд йæ нысан дæр хъуамæ баст уа паркимæ. Æмæ хъуыддаг цал уæладзыджы дзы ис, уый мидæг нæй, фæлæ паркты офистæ аразæн кæй нæй, уым.

Суанг дзы æртæ уæладзыджы куы баззадаид, уæддæр уыцы азты закъæттæм гæсгæ, уый нымад уыд барадхæлдыл. Фæлæ, æвæццæгæн, уый цы адæмы хъуыдис, уыдон закъæттæм уый бæрц æргом не здæхтой».

Нæхицæй та йæм бафтаудзыстæм, æвæццæгæн, закъæттæ нымады кæмæ не сты, ахæм адæймæгтæ ма ныр дæр ис. Æндæр горæты Хицауад ахъуыды кæниккой, æнæзакъонæй арæзт цы бæстыхай æрцыд, уый фехалыныл æмæ уымæй закъон сæххæст кæныныл, фæлæ нæ агуриккой фæндæгтæ закъоны сæрты ахизынæн.

«Градус-Про» фыццаг хатт нæ дзуры парчы бирæуæладзыгон бæстыхайы арæзтады æнæзакъондзинадыл. Афтæ, «Город на Тереке есть один», зæгъгæ, уыцы статья (2017 азы 26 апрелы) райдайы ахæм ныхæстæй: «Город неконтролируемого строительства, предприимчивых застройщиков и сговорчивых властителей, отдавших на откуп архитектуру Владикавказа».

Статьяйы мидис нæ дзурдзыстæм, æрмæст зæгъдзыстæм, ООО «Иркапитал» бæстыхайы арæзтады тыххæй нæ баныхас кодта культурон бынты объекттæй хъахъхъæнын æмæ сæ пайда кæныны комитетимæ. Мах хъуыдымæ гæсгæ, бирæуæладзыгон арæзтадæн бар дæтгæйæ, хыгъд не ‘рцыдысты, йæ бацæуæнтæ æрмæстдæр Тæбæхсæуы-фырты æмæ Станиславскийы номыл уынгтæй кæй сты. Горæты уыцы ран та ис парк, миграцион службæ, ОАО «Севоспроект», уый агъуысты та дæсгай алыхуызон офистæ.

Уый та дзурæг у ууыл, æмæ кусгæ бон, уæлдайдæр та фæлладуадзæн æмæ бæрæгбонты нæ хæдзæрттæм машинæйыл нæ, фæлæ фистæгæй бацæуæн дæр нал вæййы. Ноджы ма «Андреевы» абанайы бынаты, 2-æм хæдзары ныхмæ, горæтарæзтады нормæтæ фехалгæйæ, арæзт æрцыд бирæуæладзыгон хæдзар æмæ дзы, нæ амондæн, се ‘ппæт фатерты цæрæг нæма ис, æндæр нæ уавæртæ бынтон ныззаууат уаиккой.

 Мах æй æмбарæм, парк арæзт у горæты æппæт цæрджытæн, хъæуы йæм зилын, аивдæр, рæсугъддæр, уæрæхдæр æй кæнын, фæлæ уый бæрц административон агъуыстытæ кæм ис, уымæ ма иу бафтаугæйæ, бацæуæн фæндæгты уавæр æвзæрдæр нæ кæны? Хуыздæр нæ уаид, миграцион службæ æндæр ранмæ аивын?

Æхсæнадон æмбырды ныхас цы фарстайыл цыд, уый æппæты ахсджиагдæр у нæ хæдзары цæрджытæн. Алы æвзæрстыты размæ дæр политикон партитæ, æхсæнады минæвæрттæ сыгъзæрин мæсгуытæ фæамайынц, фæлæ царды ахсджиаг фарстатæм куы ‘рхæццæ вæййæм, уæд цæмæндæр рохуаты аззайæм. Цæмæндæр нæм афтæ кæсы æмæ республикæйы кæнæ горæты разамонджытæй исчи мах хæдзæрттæй искæцыйы куы цæрид, уæд æнæзакъонæй арæзт бæстыхай фехалыны фарста лыг раджы æрцыдаид. Уæлдæрамынд разамонджытæй курæм:

  1. Парчы бирæуæладзыгон бæстыхайы арæзтадæн бар раттын закъонмæ гæсгæ у æви нæ, уый сбæрæг кæнын, уыимæ ныхасгонд æрцыд культурæйы бынты объекттæй пайда кæнын æмæ хъахъхъæныны комитетимæ æви нæ. Æгъдау халджытæ бæрæггонд куы æрцæуой, уæд аххосджынты бафхæрын.
  2. Арбитражон тæрхондоны уынаффæ æххæстгонд цæуылнæ æрцыд, уый равзарын.
  3. Горæты амынд хай равдæлон кæнынæн хъæугæ мадзæлттæ саразын.
  4. Цы мадзæлттæ арæзт æрцæуа, уыдон æхсæнадæн фехъусын кæнын. Аргъ уын кæнгæйæ, 2-æм æмæ 16-æм хæдзæртты цæрджытæ».

Тæбæхсæуы-фырты номыл уынджы цæрджыты цы тыхсын кæны, уыдон чысыл не сты. Цæмæй сæ равзарæм, цæмæй дзы уæд та сæ ахсджиагдæртæн дзуапп ссарæм, уый тыххæй фембæлдыстæм Дзæуджыхъæуы бынæттон хиуынаффæйады администрацийы сæргълæууæг Æлбегаты Барисимæ.

— Тæбæхсæуы-фырты номыл уынджы цæрджытæ ма тыхсæнт уымæй, ома, сын сæ бирæуæладзыгон хæдзæрттæ хæлд куы æрцæуой автомашинæтæн лæууæн аразыны тыххæй. Бирæуæладзыгон хæдзæрттæм æвнæлд нæ уыдзæн, æмæ уынг дæр хæлд нæ баййафдзæн, — загъта Æлбеджыфырт.

Ныхас ма кодтам, абон уыцы арæзтадон объект йæхимæ цы инвестортæ райстой, уыцы арæзтадон компани «Астам»-ы генералон директор Мырыкаты Марат æмæ йæ хæдивæг Дзгойты Эдуардимæ.

Дзгойты Эдуард куыд зæгъы, афтæмæй адæмыл цы æхсæнадон хъуыды бафтыдтой Тæбæхсæуыфырты номыл уынджы бирæуæладзыгон хæдзæрттæ халыны тыххæй, цæмæй дзы автомашинæтæн лæууæн саразой, зæгъгæ, уый æппындæр æцæгдзинадмæ ницы бар дары. Ныртæккæ уал кусынц сметæйы гæххæттытæ банывыл кæныныл. Фидæны та сæ зæрды ис агъуыст афтæ барæвдз кæнын, цæмæй архитектурон æгъдауæй баиу уа горæты иумæйаг фæлгонцимæ æмæ адæмæн цæсты сындз мауал уа. Дарддæр сæ зæрды цы фæндтæ ис, уыдонмæ гæсгæ агъуысты 3-4 уæладзыджы бацахсдзæн, республикæйы чи нæма ис, сывæллæтты ахæм клиникондиагностикон центр. Уым уыдзæн сывæллæтты хиирхæфсæн бынæттæ дæр. Сæ нысанмæ гæсгæ, бирæуæладзыгон агъуыстæн йæ фарсмæ цы автолæууæн бынат ис, уый фаг уыдзæн, уымæн æмæ бацархайдзысты, цæмæй дзы бирæ хæдтулгæтæ ма лæууа. Æмбисæй уæлæмæ уæладзгуыты арæзт æрцæудзæн фысымуат. Уыдон дæр æмæ клиникон-диагностикон центр, стæй сывæллæтты хиирхæфсæнтæ дæр горæты цæрджыты нæдæр тыхсын кæндзысты, нæдæр хъыгдаргæ. Уæдæ ахæм дзурджытæ дæр уыд, æмæ йæ бынтон фехалын хъæуы, зæгъгæ. Уый райхалынæн та чысыл æхцайы фæрæзтæ кæй нæ хъæуы, ууыл уынаффæ хæсджытæ, æвæццæгæн, нæ ахъуыды кæнынц.

Хъуыддагæн кæрон скæнын æмæ æдзæллаг цыртдзæвæнау цалдæр азы цы бирæуæладзыгон агъуыст лæууы, уый архитектурон хуызы горæты фæлгонцимæ баиу кæнын æхцайы хæрдзтимæ йæхимæ райста арæзтадон компани «Астам» æмæ нæ фæнды, йæ алыварс цы алыхуызон æхсæнадон хъуыдытæ сæвзæрд, уыдон цæмæй æрызгъæлой, бирæуæладзыгон агъуыст та афтæ саив кæной, горæты фæлгонцимæ йæ афтæ баиу кæной, цæмæй йыл иунæг мæнг дзурæг дæр мауал уа.

КАСАТЫ Батрадз

 

ОСТАВЬТЕ ОТВЕТ

Please enter your comment!
Please enter your name here