Кусынц сыл Сæргълæууæджы разамындæй

0
36

 

РЦИ-Аланийы артаг æмæ энергетикæйы къабазы уавæр нырма фæхуыздæргæнинаг кæй у, уыцы хатдзæгмæ æрцыдысты РЦИ-Аланийы ацы ведомствоты æхсæн архайæг къорды уæнгтæ сæ радон æмбырды. Фыццаг хатт дзы сæрдариуæг кодта РЦИ-Аланийы Сæргълæууæг БИТАРТЫ Вячеслав. Æмбырды ма архайдтой УФ-йы Цæгат Кавказы хъуыддæгты министры æххуысгæнæг Сергей ПРОКОПОВ, РЦИ-Аланийы Хицауады Сæрдар ТУСКЪАТЫ Таймураз, РЦИ-Аланийы Хицауады Сæрдары хæдивæг ФАДЗАЙТЫ Æхсарбег, Уæрæсейы техникон цæстдарды Цæгат Кавказы управленийы сæрдары хæдивæджы хæстæ æххæстгæнæг Дмитрий ФЕДОРОВ, электрон тыхæй ифтонггæнæг организациты, муниципалон хицаудзинады, тыхы структурæты минæвæрттæ.

— РЦИ-Аланийы артаг æмæ энергетикæйы къабазы рæзты уавæр нырма вазыгджын у. УФ-йы Хицауады Сæрдары курдиат æххæстгæнгæйæ уый тыххæй æз ацы азы 1 августæй æрлæууыдтæн ацы къабазы рæзтыл архайæг ведомствоты æхсæн кусæг къорды сæргъы, — загъта Битарты Вячеслав.

Æмбырды архайджытæ ацы фарстайы фæндаггон картæ куыд æххæстгонд цæуы, уый тыххæй цы докладтæм байхъуыстой, уыдонæй базыдтой энергетикæйы тыххæй æхца фидынæй алы хуызы фæлхасгæнджытæ 2018 азы сæ хæстæ куыд фидынц, уый. РЦИ-Аланийы Цæрæнуæтты-коммуналон хæдзарады министрады дзуаппон доклады та ныхас цыд зымæгмæ цæттæ кæныны фарстайыл.

РЦИ-Аланийы артаг æмæ энергетикæйы къабазы рæзтыл ведомствоты æхсæн кусæг къорды уæнгты нысан у, цæмæй энергетикон фæрæзтæй пайдакæнæггаг æхца фидыны хъуыддаг схиза 100 проценмæ, ууыл бацархайын. Куыд рабæрæг, афтæмæй электрон тыхæн бюджетон фæлхасгæнджытæ фидынц 94. 1 процент æмæ 80, 4 проценты, æрдзон газæй пай- дагæнæг дыууæ къордæй та фæлхасгæнджытæй иутæ фидынц 56, 6 проценты, ин- нæтæ — 77,3 проценты.

Æхца фидынæй уагæвæрдтæ халынц, æмæ милуангай хæстæ дарынц фараст тæвддæттæн организацийы. Уыдонæй сты Акционерон æхсæнад «Лаверна», (г.Беслæн), Муниципалон унитарон куыстуат «Дигорские городские тепловые сети», Муниципалон унитарон куыстуат «ЖКХ Ирафского района», Акционерон æхсæнад «Бесланспецсервис» æмæ иннæтæ. Карзæй лæууы фарста æхца фидыны хъуыддаджы куыстуæттæ «Дзæуджыхъæуы дондæттæн хызтæ»-йы æмæ «Дзæуджыхъæуы тæвддæттæн хызтæ»-йы раз дæр. Азæй-азмæ сæ хæстыл æфты.

Компани «Газпром Межрегионгаз»-ы минæвар куыд фæнысан кодта, афтæмæй уæддæр энергетикæйы æмæ газы лæггæдты тыххæй æхца фидыны æгъдау Цæгат Кавказы федералон зылды иннæ регионтимæ абаргæйæ, нæ республикæйы нывылдæр у. Фæлæ нырма фарста хæстæ фидыны хъуыддаджы бынтон лыггонд не ‘рцыд.

— Нæ хæс у лыггæнинаг фарстатыл ноджы зæрдиагдæрæй кусын. Уæ субъекты хъæуы, иудадзыг чи куса, ахæм системæ саразын, — загъта Сергей Прокопов. Электрон тыхы лæггæдты тыххæй адæмæй æмæ куыстуæттæй, энергион тыхæй æфсадæг организацитæй хæстæ чи дары, уыдонæй сæ хæстæ ист цæуынц барадхъахъхъæнæг æмæ æндæр тыхы структурæты æххуысæй. Ацы аз арæзт æрцыд 18 æххæстгæнæг куыстады 2 миллиард сомы аргъæн. Уыдоны нымæц азæйазмæ къаддæр нæ кæны, фæлæ рæзы.

Æмбырды архайджытæ бауынаффæ кодтой энергетикон ресурстæй хæстæ кæмæн ис, уыцы адæмæн æмæ куыстуæтты разамонджытæн сæ хæстæ инвентаризаци скæнын. —

Хæстæ исыны хъуыддаджы уæлдай стырдæр хæс ис барадхъахъхъæнæг оргæнты кусджытыл. Энергион тых æмæ тæвддæттæг организацитæ æмбырд кæнынц æхца, фæлæ йæ кæдæм æмбæлы, уырдæм нæ хæццæ кæнынц, — загъта Битарты Вячеслав.

РЦИ-Аланийы Мидхъуыддæгты министрады экономикон æдасдзинады æмæ коррупцийы ныхмæ тохгæнæг управленийы разамонæг Гадзауты Асланы ныхæстæм гæсгæ та, ацы азы афæдзы æрдæгмæ артаг æмæ энергетикæйы куыстуæттæй 17 арæзт æрцыд уголовон хъуыддæгтæ, сæ архайд закъоны бындурыл кæй нæу, уый тыххæй. Уыцы организацитæй 13 кусæджы та æфхæрд баййæфтой барадон æгъдауæй. Сæ архайдæй цы зиан æрхастой, уый тыххæй сæ куыстуæттæн фидын бахъуыд 13 милуан сомы. Цæмæй энергетикон æмæ хъармдæттæг лæггæдты тыххæй æхца фидыны фарста кæронмæ лыггонд æрцæуа, уый тыххæй хъуамæ кæрæдзийæн æххуыс кæной организацитæ æмæ ацы лæггæдтæй пайдагæнæг адæм.

Æмбырды цы фарстатæм каст æрцыд, уыдонмæ гæсгæ РЦИ-Аланийы Сæргълæууæг снысан кодта бæлвырд хæстæ.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

 

ОСТАВЬТЕ ОТВЕТ

Please enter your comment!
Please enter your name here