«Уырны нæ, уæ къухы æнтыстытæ кæй бафтдзæн»

0
122

 

УФ-йы Хицауад æмæ РЦИ-Аланийы Ахуырад æмæ наукæйы министрады хъæппæрисæй Дзæуджыхъæуы 5-æм Профессионалон училищейы байгом, йæ æнæниздзинадмæ гæсгæ йæ авналæнтæ цыбыр кæмæн сты, уыдоны ‘хсæн II регионалон чемпионат «Абилимпикс — 2018». Архайджытæ цыппар боны æвдисдзысты сæ арæхстдзинад алы хуызы дæсныйæдты. Чемпионаты сæйраг нысан у, царды сæ зæрдæмæ хæстæгдæр цы дæсныйад у, ууыл сæ фæцалх кæнын, разæнгард сæ кæнын, цæмæй сæ алчидæр ссара йæхи сæрмагонд бынат æмæ уа куыстхъом. Архайынц дзы канд скъоладзаутæ æмæ студенттæ нæ, фæлæ ма хистæртæй суанг 65 азы кæуыл цæуы, уыдон дæр.

Чемпионаты агъоммæ архайджытæн видеобастдзинады фæрцы арфæ ракодта «Абилимпикс»-ы центры сæргълæууæг Альбинæ Бикбулатова. Куыд загъта, афтæмæй УФ-йы амалхъомтæ сæдæ кусæн бынатæй фылдæр æрцæттæ кодтой, чемпионаты хуыздæр бæрæггæнæнтæ чи равдиса, уыдонæн.

— Зæрдиагæй уын арфæ кæнын РЦИ-Аланийы Хицауады номæй. Кæд дыккаг хатт йеддæмæ бæрæггонд нæ цæуы, уæддæр нæ республикæйы цæрджыты ‘хсæн бацахста ахсджиаг бынат æмæ ссис профессионалон ахуырады фæз. Разæй уæм æнхъæлмæ кæсынц ерыстæ, æмæ мæ уырны, уыдоны бындурыл кæй сфæлтæрддзæн ног къорд, нæ республикæ «Абилимпикс»-ы æппæтуæрæсон чемпионаты кадимæ чи равдисдзæн. Сымахæй алчидæр мæ цæсты у уæлахиздзау, уымæн æмæ равдыстат уды хъару, быхсондзинад, царды хорздзинæдтæм тырнындзинад æмæ уын мæ сæрæй ныллæг кувын! — загъта РЦИ-Аланийы Хицауады Сæрдар Тускъаты Таймураз.

Йæ ныхас ын адарддæр кодта æхсæнадон змæлд «Абилимпикс»-ы цæгатирыстойнаг хайады сæргълæууæг Зæгъойты Алексей.

Чемпионаты архайджытæ 27 сентябрмæ сæхи фæлвардзысты уæливыхтæ кæнынæй, фæрдгуытæ бийынæй, дизайнерон куыстытæ кæнынæй, хæринаг кæнынæй, хуыйынæй, хæдтулгæтæ цалцæг кæнынæй, электромонтажгæнæн куыстытæ кæнынæй æмæ афтæ дарддæр.

Уымæй уæлдай ма сын скæндзысты мастер-класстæ ахæм дæсныйадтæй: электромонтажгæнæг , хæдзараразæг, ирвæзынгæнæг, визитон карточкæтæ аразæг, хилдасæг, хыссæйæ аджын гуылтæ фыцæг, инновацион технологи-карвинг, ома, сæ ахуыр кæндзысты дыргътæ æмæ халсартæ фынгтæм алы хуызы сфæлдыстадон хуызы лыггæныныл.

Чемпионаты архайджыты сфæлдыстадон куыстытæ фенæн уыдзæн 25 сентябры 5-æм профессионалон училищейы бæстыхайы.

26 сентябры чемпионаты архайджытæ сæ арæхстдзинад æвдисдзысты, дизайны хуыддаджы æмæ хæдтулгæтæ цалцæг кæнынмæ куыд арæхсынц, уымæй. 27 сентябры къамисы уæнгтæ скæндзысты хатдзæгтæ æмæ сбæрæг уыдзысты уæлахиздзаутæ.

Йæхи æнтыстджындæрæй чи равдиса, уыдоны схорзæхджын кæндзысты майдантæ, Кады гæххæттытæ æмæ зæрдылдарæн лæвæрттæй.

Æппæтдунеон змæлд «Абилимпикс»-æн 1972 аз бындур сæвæрдтой Японийы. Уæрæсейы Федераци дзы æмархайаг ссис 2014 азæй.

ХЕТÆГКАТЫ Оксанæ Къам систа ЦÆГÆРАТЫ Дауыт

ОСТАВЬТЕ ОТВЕТ

Please enter your comment!
Please enter your name here