Кад æмæ намыс æрдзхъахъхъæнджытæн

0
116

 

16 сентябры нæ бæстæйы Хъæды хæдзарады кусджытæ сбæрæг кодтой сæ профессионалон бон. Уый фæдыл знон нæ республикæйы Æрдзон фæрæзты æмæ экологийы министрады уыдис кадджын æмбырд. Хъæды хæдзарады бирæ азты дæргъы намысджын фæллой чи кæны, æрдз фыдгæнджытæй чи хъахъхъæны, уыцы кусджытæ хорзæхджынгонд æрцыдысты паддзахадон кадджын хæрзиуджытæй.

Бæрæгбонмæ æрбацыдысты РЦИ-Аланийы Сæргълæууæг Битарты Вячеслав, Хицауады Сæрдары хæдивæг Сæбæтхъуаты Æхсарбег æмæ нæ республикæйы æрдзон фæрæзтæ æмæ экологийы министр Мамиаты Чермен.

Битарты Вячеслав зæрдиаг арфæтæ ракодта хъæды хæдзарады кусджытæн æмæ загъта, хъæд нæ царды стыр хæзна кæй у, æмæ йæ хъахъхъæныны мадзæлттыл бæрнонæй кæй кусынц, уый фæдыл. Уый загъта:

— Уæ фæрцы хъахъхъæд цæуы Ирыстоны æрдз. Тох кæнут, æнæзакъонæй хъæдтæ чи калы, уыцы æгъдаухалджытимæ, не ‘ппæт дæр зонæм, уæ куыст хуымæтæг æмæ æнцон кæй нæу. Æхсызгон мын у, Цæгат Ирыстон 2018 азы ногæй хаст кæй æрцыд, Хъæды хæдзарады къабазы куыст æппæты бæрзонддæр æмвæзады кæм у, уыцы регионты хыгъдмæ. Ис уæ куысты хорз бæрæггæнæнтæ. Уый та ууыл дзурæг у, æмæ уæ равзæрст фæндагыл ныфсджынæй кæй цæут, бæрнонæй уæ хæстæ кæй æххæст кæнут, хъæдтæ дидинæг калынц, рæзынц æмæ ныридæгæн уыцы хорздзинад республикæйы бюджетыл фæзындис. Нæ экономикæ æмæ экологийыл дæр. Ноджы фылдæр æфтиæгтæ хæсдзæн хъæд нæ республикæйы къазнамæ, æрæджы æрдзон фæрæзтæ æмæ экологийы министр Мамиаты Чермен цы хъæппæрис бавдыста, ома, алы мыггаг бæлæсты талатæн сæрмагонд бынат рахицæн кæнын, уыцы ног проекты фæрцы дæр. Афтæмæй ноджы уæрæхдæр кæндзæн республикæйы хъæды фонд. Бузныг уын уæ арфæйаг куысты тыххæй.

Нæ республикæйы Сæргълæууæг хъæды хæдзарады кусджытæм афтидæй не ‘рбацыд. Ирыстоны алы районты хъæды хæдзарæдтæн дæр балæвар кодта машинæтæ. Афтæмæй машинæтæ райстой: Дзæуджыхъæуы, Алагиры æмæ Дыгуры, Æрæфы, Мæздæджы, Кировы, Горæтгæрон районты хъæды хæдзарæдтæ. Машинæтæ æлхæд æрцыдысты республикæйы бюджеты хардзæй. Мамиаты Чермен дæр арфæ ракодта хъæды хæдзарады кусджытæн æмæ куыд загъта, афтæмæй фидæны сæ куысты нысантæ ноджы уæрæхдæр уыдзысты.

— Æрмæст ацы машинæтыл нæ баззайдзысты хъæды хæдзарады æмæ экологийы кусджытæ. Фидæны ма балхæндзыстæм зынгхуыссынгæнæн ног техникæ дæр, — загъта министр.

УФ-йы профцæдисты хъæды хæдзарады къабазы цæгатирыстойнаг организацийы сæрдар Махъоты Иринæ УФ-йы æхсæнадон организациты Кады гæххæтт саккаг кодта

РЦИ-Аланийы æрдзы фæрæзтæ æмæ экологийы министр Мамиаты Черменæн. РЦИ-Аланийы æрдз хъахъхъæныны рæзты æмæ хæдзарады сгуыхт кусæджы ном лæвæрд æрцыд Кировы районы хъæды хæдзарады территориалонструктурон дæлхайады хицау Магомед Омаровæн.

РЦИ — Аланийы Сæргълæууæджы арфæйы гæххæттытæ райстой: Агаширин Агаширинов, Бадриаты Чермен, Абайты Аслæнбег, Хадыхъаты Циалæ æмæ Бутаты Раман.

УФ-йы Паддзахадон Думæйы арфæйы фыстæг та — Дойаты Хъазыбег. Хъæды хæдзарады Федералон агентады Кады гæххæтт лæвæрд æрцыд Светланæ Семеновайæн. Арфæйы гæххæтт та — Хъыбызты Валери, Дзуццаты Еленæ, Каджаты Людмилæ æмæ Тыджыты Ингæйæн.

Хуссар федералон зылды Хъæды хæдзарады департаменты Кады гæххæтт райстой: Бохаты Анатоли, Дзæгъиаты Владимир, Быдтаты Вадим, Хъамболты Сослан, Цинуаты Руслан, Иван Бовин, Хетæгкаты Павел, Цæллагты Мыртаз, Абойты Святослав, Таухъазахты Зураб, Хъараты Аллæ, Харебаты Андрей, Пагæты Дианæ, Мзокты Инессæ æмæ «Алания-лес»-ы сæйраг бухгалтер Ольгæ Маркова.

САУТÆТЫ Тамилæ

 

ОСТАВЬТЕ ОТВЕТ

Please enter your comment!
Please enter your name here