Уæздан хистæр, цæстуарзон ахуыргæнæг, курдиатджын нывгæнæг

0
45

 

Ирыстоны аивадуарзджытæн зындгонд у нывгæнæг, график Хъайтыхъты Георгийы ном. Уый нывкæнынады фæрцы йæ дзыллæйæн лæггад кæны 40 азæй фылдæр. Ивгъуыд æнусы 50-æм азты Георги æнтыстджынæй каст фæци Хабаровскы педагогон институты нывкæнынады хайад. Йæ райгуырæн уæзæгмæ куы сыздæхт, уæд Дзæуджыхъæуы æмæ республикæйы культурæйы æмæ аивадон артдзæстыты куыста нывгæнæг-фæлгонцгæнæгæй. 1974 азы Дзæуджыхъæуы Культурæйы галуан «Электрон» (ныр — Фæсивæды республикон галуан) куы байгом, уæд дзы Георги сарæзта — нывкæнынады студи. Уæдæй абонмæ дзы ныв кæныныл сахуыр кодта æмæ кæны сæдæгай лæппуты æмæ чызджыты.

Ацы аз РЦИ-Аланийы аивæдты сгуыхт архайæг Хъайтыхъты Георгийыл сæххæст 80 азы. Йæ юбилейы кадæн æрæджы Национ наукон республикон библиотекæйы уыд нывгæнæджы аивадон æмæ графикон куыстыты равдыст. Цыбыр раныхасæй йæ байгом кодта зындгонд аивадиртасæг Гæздæнты Зарæ. Уый бæлвырдæй радзырдта Георгийы царды, сфæлдыстадон фæндаджы тыххæй. Уый фæстæ сæ хæлар, æмкусæг æмæ ахуыргæнæгæн зæрдиаг арфæтæ ракодтой, бузныджы ныхæстæ загътой РЦИ-Аланийы адæмон æмæ УФйы сгуыхт нывгæнæг, скульптор Дзбойты Михал, ЦИПУ-йы аивæдты факультеты профессор, нывгæнæг Джыккайты Мурат, зындгонд поэт Кокайты Тотрадз, Дыгуры районы Минæвæртты æмбырды сæрдар, æхсæнадон архайæг, историк Хъарданты Тимур. Уый нывгæнæгæн радта Кады грамотæ.

Юбилейон равдыстмæ æрбацыдысты Георгийы ахуыргæнинæгтæ. Уыдон дæр ын ракодтой зæрдиаг арфæтæ æмæ зынаргъ лæвар.

Се ‘ппæт раныхæсты иумæйаг хъуыды уыд, Георги, куыд адæймаг, афтæ у цæстуарзон, уæздан, æгъдауджын хистæр, куыд нывгæнæг, афтæ — курдиатджын, æппынæдзух аивады ног гæнæнтæ чи агуры, сфæлдыстадон хъуыддаджы рæзгæ чи кæны, ахæм нывгæнæг æмæ хæдхуыз æрмдзæфы хицау.

Равдысты фенæн уыд аивадон æмæ графикон куыстытæ, пейзажтæ, портреттæ. Æдæппæт 30 куыстæй фылдæр. Сæ алкæцыйы дæр Хъайтыхъыфырт йæ зæрдæйы цæхæр кæй æвæры,уый фыццаг бакастæй дæр бæрæг у.

Зындгонд нывгæнæг Хъайтыхъты Георгийы юбилеймæ мыхуыры рацыд йæ нывты альбом. Бацæттæ йæ кодта æмæ йын разныхас ныффыста РЦИАланийы аивæдты сгуыхт архайæг Гæздæнты Зарæ.

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here