Ныхас — Президенты ног указтыл

0
35

 

Æппæтуæрæсеон адæмон фронты цæгатирыстойнаг хайады уæнгтæ æрныхас кодтой, Уæрæсейы Федерацийы Президент Владимир Путин 2018 азы майы цы указтæ сфидар кодта, уыдон царды куыд хуыздæр саразын хъæуы, ууыл. Комкоммæ та — «Уæрæсейы Федерацийы рæзты 2024 азмæ конд национ хæстæ æмæ стратегион нысанты тыххæй» указы фæлгæты фронты уæнгтæ æрæмбырд кодтой амалхъомады архайджыты, республикæйы æмæ Дзæуджыхъæуы разамынды. Ацы паддзахадон документы фæрцы амалхъомады архайды хъуамæ цавæр ивддзинæдтæ æрцæуа, уый тыххæй рауадис бирæвæрсыг ныхас.

Зындгонд куыд у, афтæмæй ма Владимир Путин у Æппæтуæрæсеон адæмон фронты разамонæг дæр, йæ ног указы куыд фæбæрæг кодта, афтæмæй хъуамæ чысыл æмæ рæстæмбис амалхъомады архайджыты нымæц зынгæ фæфылдæр уа — 25 милуан адæймаджы онг. Куыдæй йæ ис сæххæст кæнæн, уый тыххæй сæ хъуыдытæ загътой хицаудзинады оргæнты кусджытæ æмæ амалхъомтæ сæхæдæг. Сусæггаг нæу, кæд документтæм гæсгæ амалхъомтæм бирæ удæнцойдзинæдтæ æмæ æххуыс æнхъæлмæ кæсы, уæддæр алы бон дæр æмбæлынц тынг бирæ цæлхдуртыл. Уæдæ чиновниктæй иутæ сæхи афтæ дарынц, раст цыма барæй хъуыддæгтæ размæ нæ уадзынц, уыйау. Афтæ куы уаид, æмæ уыцы цæлхдуртæ ныртæккæ фæзындысты æмæ райсом нал уыдзысты, уæд хорз. Фæлæ азтæ цæуынц, хъуыддаджы чи балæууыд, уыцы адæймæгтæ та уыцы зындзинæдтимæ алы бон дæр æмбæлынц.

«Паддзахады Сæргълæууæг æппæт тыхтæй дæр архайы, цæмæй хицаудзинады оргæнтæ фæхуыздæр, фæрогдæр кæной амалхъомадæн архайыны гæнæнтæ æмæ авналæнтæ. Уый охыл æвæры фарста, цæмæй административон хъуыддæгтæ рæвдздæр конд цæуой, сæ домæнтæ дæр хъуамæ фæхуымæтæгдæр уой. Афтæмæй фæбæрæг уыдзæн экономикæйы рæзт. Фæлæ æппæт уыцы хæстæ цæй фæрцы ис сæххæст кæнæн, уыцы гæнæнтæй раст нæ пайда кæнынц чиновниктæ, мах цы мадзæлттæй архайæм, уыдон дæр афтæ ахадгæ не сты», — загъта штабы уæнг Медойты Тимур. Уыцы-иу рæстæг ма Медойы-фырт у амалхъомты бартæ хъахъхъæнæг.

Æнæзакъонæй амалхъомадон архайды чи балæууыд, уыдоны закъоны бындурмæ раивыныл дзургæйæ, ныхасы архайджытæ бафиппайдтой, ома, ахсджиаг у адæмы æхсæн æмбарынгæнæн куыст кæнын. Уыцы хъуыддаг ма хауы, йæхи, куыд амалхъом чи нæ æвдисы, фæлæ хи фæдарыны охыл цавæрдæр архайды фæрцы æхца чи кусы, уыдонмæ дæр. Æмбырды куыд райхъуысти, афтæмæй паддзахадон оргæнтæ ныртæккæ бавнæлдтой амалхъомты бартæ хъахъхъæнынмæ, зындгонд сты æппæт зындзинæдтæ дæр æмæ амалхъомады æмæхсæнадæй йæ куыстыл йæ къух чи систа, уыдоны цур дæр хъуамæ балæууой.

Æппæтуæрæсеон адæмон фронты цæгатирыстойнаг хайады эксперт Тугъанаты Хъазыбег куыд радзырдта, афтæмæй фæсарæнтæм йæ продукци чи æрвиты, уыцы компанитæн дæр тынг зын у хъуыддæгтæ аразын. Фæлæ Уæрæсейы ис Экспортон центр, Цæгат Ирыстоны дæр ын хайад байгом, уый хъуамæ æххуыс кæна чысыл æмæ рæстæмбис амалхъомтæн, цæмæй сæ продукци æндæр бæстæтæм сæ бон уæй кæнын уа. «Экспортон центры фæрцы амалхъомады минæвæрттæ исдзысты информацион æххуыс, сæ бон лæвар уыдзæн алыхуызон равдыстыты архайын, фæсарæнты сын сертификаттæ исын æнцондæр уыдзæн, уæдæ сæ бадзырдтæ дæр центры фæрцы хъахъхъæд цæудзысты. Уымæй дарддæр ма сын ис æндæр лæггæдтæ дæр кæнæн», — загъта Тугъаны-фырт.

Хицаудзинады оргæнты минæвæрттæ æмæ амалхъомады æмæхсæнад баныхас кодтой æмгуыстадыл, цæмæй ног указтæ царды æххæстгонд æрцæуой, уый тыххæй. Ома, амалхъомадæн хуыздæр уавæртæ кæнын, уæдæ аууоны чи кусы, уыдоны закъоны бындурмæ раивын. Ахæм фембæлдтытæ дарддæр дæр арæзт цæудзысты, æхсæнадæн ахсджиагдæр цы фарстатæ сты, уыдон хæсдзысты рæгъмæ, сæ хъуыдытæ-иу зæгъдзысты ахуыргæндтæ, политиктæ, уацхæсджытæ, æндæр æхсæнадон архайджытæ.

БÆДТИАТЫ Оксанæ, Æппæтуæрæсеон адæмон фронты цæгатирыстойнаг хайады кусæг

ОСТАВЬТЕ ОТВЕТ

Please enter your comment!
Please enter your name here