«Сыгъзæрин фæззæг»: Цæгат Ирыстоны агропромышленнон хъомыс

0
69

 

Зындгонд куыд у, афтæмæй ацы бонты Мæскуыйы цæуы æрвылазон уæрæсейаг агропромышленнон равдыст «Сыгъзæрин фæззæг». Равдыст байгом кæныны фæдыл кадджын мадзалы знон архайдта Цæгат Ирыстоны делегаци, республикæйы Сæргълæууæг БИТАРТЫ Вячеславы разамындæй.

Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ.

Уыцы бон равдыст бабæрæг кодтой УФ-йы премьер-министр Дмитрий Медведев, Хицауады Сæрдары хæдивæг Алексей Гордеев, хъæууон хæдзарады министр Дмитрий Патрушев, федералон министрадтæ æмæ ведомствоты бæрнон кусджытæ.

Агропромышленнон равдысты архайынц 60 уæрæсейаг регионы æмæ 15 фæсарæйнаг бæстæйы — уыдон цыппар боны дæргъы æвдисынц сæ æнтыстдзинæдтæ хъæууон хæдзарад æмæ хойраджы промышленносты къабазы. Уыимæ, алкæцы экспозицийы дæр сæрмагонд бынат бацахстой егъау инвестицион проекттæ. Фидæны инвесторты размæ рахастой селекцион-генетикон иртасæнты, хъæууонхæдзарадон кооперацийы æмæ хъæууон цæрæн бынæтты райрæзты, хойраджы промышленносты ног куыстуæтты проекттæ.

Республикæ Цæгат Ирыстон-Аланийы экспозицийы фенæн ис регионы агропромышленнон комплексы хæдзарæдты продукци: дзидза, кæсаг, æхсыр, халсартæ, дыргътæ, адджын æмæ минералон дæттæ, дзул æмæ адджинæгтæ, мыд, зокъотæ æмæ афтæ дарддæр. Равдысты сæрмагонд бынат бацахстой дыргъ бæлæсты талатæ. Республикæ йæ экспозицийы æрæвæрдта фосдарæн фермæйы, æхсыры продукцийы завод æмæ цыхты куыстады цехы проекттæ.

Цæгат Ирыстоны Сæргълæууæг Битарты Вячеслав йæ раныхасы куыд фæбæрæг кодта, афтæмæй «Сыгъзæрин фæззæг»-æн ис стыр ахадындзинад. «Мæ зæрдæ дарын, равдысты архайæг организацитæн ног пайдайаг бастдзинæдтæ кæй фæзындзæн, сæ продукци фылдæр регионтæм кæй хæццæ кæндзæн, ууыл. Ацы равдысты рæстæг хъæууонхæдзарадон товаруадзджытæн хорз фадæттæ вæййы кæрæдзи фæлтæрддзинадимæ базонгæ уæвынæн, кæрæдзи æнтыстдзинæдтыл бацин кæнынæн. Абон уæрæсейаг регионты экспозициты цы хæрзхъæд æмæ экологион æгъдауæй продукци уынæм, уый фæсарæйнаг бæстæты минæвæрттæн дæр цымыдисаг кæй уыдзæн, уый дызæрдыггаг нæу», — загъта Битары-фырт.

Цæгат Ирыстоны разамонæг куыд бафиппайдта, афтæмæй РЦИ-Аланийы Рæзты агентад бакуыста цалдæр ахсджиаг хъæууонхæдзарадон проектыл. Уыдон хæстæгдæр рæстæг хъуамæ фидаргонд æрцæуой республикæйы Хицауады æмбырды. Ахæм цымыдисаг проектты фæрцы республикæ зынгæ фæфылдæр кæндзæн хъæууонхæдзарадон продукцийы рауагъд.

Равдысты организаторты ныхасмæ гæсгæ, «Сыгъзæрин фæззæг»-мæ саккаг кодтой Китайы, Японийы, Турчы, Германийы, Австрийы, Голландийы, Испанийы, Белорусси, Азербайджан, Казахстан æмæ æндæр бæстæты делегацитæ (уыимæ, уыдонæн сæ фылдæр равдысты архайынц фыццаг хатт).

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here