Тасойты Инал фæуæлахиз дунеон турниры

0
115

 

Иугонд Араббаг Эмиратты дзюдойæ 29 октябры цыдысты дунеон турнир «Большой шлем»-ы ерыстæ. Уæрæсейы номæй дзы уæззау уæзы хæцыд Беккуызарты Алик æмæ Айларты Ирбеджы хъомылгæнинаг Тасойты Инал.

Нæ æрыгон дзюдоист стыр курдиаты хицау кæй у, уый та ногæй равдыста ацы ерысты дæр. Инал æрæджы дæр ма архайдта æрыгон фæсивæды ерысты æмæ йын уым чысыл нæ бантыст: ссис Европæйы æмæ дунейы чемпион йæ карæнты ‘хсæн. Ацы аз командон ерысты Уæрæсейы иугонд командæимæ дунеон чемпионаты бацахстой 3-аг бынат. Уыимæ, уыцы командон ерысты Инал, уæззау уæзы хæцгæйæ, фæуæлахиз йæ цыппар ныхмæлæуджытыл се ‘ппæтыл дæр.

Абу-Дабийы цы стыр ерысты архайдта, уым дæр йæ ныхмæлæуджытæ уыдысты, абон дунейы тыхджындæр уæззаууæзонтыл нымад чи у, уыдонæй цалдæр. Инал татамимæ рацыд цыппар хатты æмæ цыппар хатты дæр тæрхонгæнджытæ уæлахиз радтой Тасойыфыртæн.

Инал æнæдызæрдыгæй фæуæлахиз мангойлаг, хъыргъызаг æмæ голландиаг дзюдоисттыл æмæ кæронбæттæны фембæлд Олимпаг хъæзтыты 100 кг онг уæзы уæлахиздзау, чехаг богал Лукас Кропалекимæ. Ацы фембæлдмæ кæсджытæ æнхъæл уыдысты, сæ тох бирæ ахæсдзæн, зæгъгæ, фæлæ сæ Инал фæфыдæнхъæл кодта. Куыддæр тæрхонгæнæг тох райдайынæн бар радта, афтæ Инал Лукасы ацахста æмæ йæ йе уæнтыл авæрдта. Уый та амыдта сыгъдæг уæлахиз «иппон”.

Тасойты Инал ссис дунеон Гран-при турнир «Большой шлем»-ы уæлахиздзау. Æнæмæнг, уый у стыр æнтыстдзинад, уæлдайдæр та, ацы ерысты фесгуыхæг богæлттæн уый фидæны дунеон чемпионат æмæ Олимпаг хъæзтытæм рейтингон æгъдауæй пайда кæй у, уымæй.

 

Дуне хъуамæ уа æнæ арæнтæ

Йе ‘нæниздзинад хъыгдард кæмæн у, ахæм адæймæгтæ Ирыстоны, æгас дунейы дæр гыццыл нæй.

 

Æнæмæнг, ахæм нæлгоймæгтæ æмæ сылгоймæгтæ вæййынц æххуысхъуаг куыд паддзахады ‘рдыгæй, афтæ сæ алфамбылайы уæвæг хионтæ æмæ зонгæты ‘рдыгæй дæр. Уый, афтæ у, фæлæ вæййы æндæр хуызы цæстдард дæр. А фæстаг рæстæг инвалидтæ кæй хонæм, уыдон сæхæдæг бирæ æнæниз адæймæгтæн вæййынц фæзминаг сæ цардмæ тырнындзинад æмæ лæгдзинадæй.

Æмæ куыннæ! Цал æмæ цал ахæм инвалиды мах дисы бафтауынц сæ æнтыстдзинæдтæй, уæлдайдæр та спорты! Ныр цалдæр азы Ирыстоны инвалид-спортсментæ цы æнтыстдзинæдтæ æвдисынц Уæрæсейы, Европæйы, дунеон чемпионатты æмæ суанг Олимпаг хъæзтыты, уыдон æмбисæндты хæссыны аккаг сты.

Арфæйаг сты, нæ республикæйы уыцы спортсменты се ‘ххуысы хайæ разæнгард чи кæны, уыцы адæймæгтæ.

Мæнæ та ацы къуыри нæ республикæйы сæйраг спортивон галуан «Манеж»-ы сæ арæхстдзинад æмæ лæгдзинад æвдыстой 200 ахæм спортсмены.

Йе ‘нæниздзинад хъыгдард кæмæн у, уыцы спортсменты спартакиадæ нæ республикæйы арæзт æрцæуы РЦИ-Аланийы Фæллой æмæ социалон рæзты министрад, Физикон культурæ æмæ спорты министрад æмæ сæ бархион æххуысгæнджыты фæрцы. Ацы ерыстæм нæ республикæйы разамонджыты ‘рдыгæй хорз цæстæнгас кæй ис, уый та бæрæг дардта ацы хатт дæр.

Спартакиадæ гом кæнгæйæ спортсментæн æмæ залы уæвджытæн арфæ кæнынмæ рацыдысты: РЦИ-Аланийы Хицауады Сæрдар Тускъаты Таймураз, физикон культурæ æмæ спорты министры хæстæ æххæстгæнæг Бæройты Хасан, фæллой æмæ социалон рæзты министр Хъесаты Игорь, Дзæуджыхъæуы бынæттон хиуынаффæйады администрацийы сæргълæууæджы хæдивæг Фæрниаты Тамерлан, адæймаджы бартæ хъахъхъæныны æххæстбарджын Уалыты Эльбрус.

Тускъаты Таймураз куыд загъта, афтæмæй, ирыстойнаг спортсментæ нæ бæстæйы иугонд командæйы уæвгæйæ цы стыр æнтыстдзинæдтæ равдыстой дунеон чемпионатты, Сурдлимпаг æмæ Паралимпаг хъæзтыты, уый тыххæй. «Æз мæ зæрдæ дарын, нæ абоны ерыстæ дæр стыр пайда кæй æрхæсдзысты не ‘мзæххонтæн се ‘нæниздзинад фидардæр кæныны хъуыддаджы. Ацы ерыстæн сæ сæйраг нысан дæр уый у», — загъта Тускъаты Таймураз. Ерыстæ аразджытæн зæрдиаг арфæ ракодтой РЦИ-Аланийы Парламенты депутат Цæллагты Жаннæ, инвалидты спортивон скъола «Стимул»-ы директор Гаглойты Валери, паратхэквондойæ дунейы цалдæр хатты чемпион Гæззаты Спартак, дунейы æмæ Уæрæсейы чемпион Хуыгаты Гоча. Спартакиадæйы ерыстæ цыдысты спорты фараст хуызæй. Алкæцыйы дæр инвалид-спортсментæ сæхи равдыстой сæрæнæй.

Ерысты архайджытæ хорзæхджын систы майдантæй, кубоктæй, дипломтæй, алыхуызон лæвæрттæй. Кæд дзы уыд фыццаг бынæттæ бацахсджытæ, уæддæр ам йæхи фæхæрдуæвæгыл ничи банымадта. Æмæ уый раст у. Ахæм ерысты алчидæр уыд рамбулæг! БАСКАТЫ Уырызмæг

 

 

 

ОСТАВЬТЕ ОТВЕТ

Please enter your comment!
Please enter your name here