БИТАРТЫ Вячеслав:  “Сымах равдыстат, Ирыстоны спортивон авналæнтæ æмæ рæзт уæрæх кæй сты, кæй у нæ бон, кæм бахъæуа, уым нæ хъару равдисын дæр”

0
92

 

 

Знон РЦИ-Аланийы Сæргълæууæг БИТАРТЫ Вячеслав Хицауады хæдзары фембæлд Дунеон чемпионаты уæлахиздзау уæгъдибар хъæбысхæстæй СИДАХЪАТЫ Зауыр, Олимпаг хъæзтыты фæсивæдон ерысты уæлахиздзаутæ уæгъдибар хъæбысхæстæй КОДЗЫРТЫ Сергей, дзюдойæ — ХУЫБЫЛТЫ Ирэнæ æмæ сæ тренертимæ. Кадджын уавæры сын республикæйы Сæргълæууæг ракодта арфæтæ æмæ сæ сæ тренертимæ схорзæхджын кодта Кады гæххæттытæ æмæ æхцайы премитæй. Мадзалы архайдтой РЦИ-Аланийы Хицауады æмæ РЦИ-Аланийы Администрацийы разамонæг ЧЕЛÆХСАТЫ Рустем æмæ РЦИ-Аланийы физикон культурæ æмæ спорты министр БÆРОЙТЫ Хасан.

— Сымах бæрзонд систат æмæ кадимæ хæссут Ирыстоны ном. Иу хатт ма равдыстат, Ирыстоны спортивон авналæнтæ æмæ рæзт уæрæх кæй сты, кæй у нæ бон, кæм бахъæуа, уым нæ хъару равдисын дæр. Стыр бузныг зæгъын, уыцы æмвæзадмæ уæ чи бацæттæ кодта, уыцы тренертæн: Дудайты Эльбрусæн, Æрчъегкаты Тотрадзæн, Хуыгаты Анатолийæн, Челæхсаты Арсенæн, Кæсойты Станиславæн æмæ нæ уæлахиздзауты ныййарджытæн. Иунæг бон дæр спорты чи фæцис, уый хорз æмбары, цас хид, быхсондзинад æмæ хъарутæ хъæуы размæ рацæуынæн, — загъта республикæйы Сæргълæууæг.

Кæстæртæн сæ фадæттæ спорты зæрдæйы фæндиаг кæй сты, уый тыххæй Битарты Вячеславæн уæлахиздзауты номæй бузныг загътой Сидахъаты Зауыр æмæ Хуыбылты Ирэнæ.

Челæхсаты Рустем æрымысыд, нæ уæлахиздзаутæ спорты фыццаг къахдзæфтæ куы кодтой, уæд-иу сын ерысты размæ кастысты патриотон темæтыл лекцитæ. Уый тыххæйиу фæхуыдтой уæлдæр ахуыргæнæндæттæй специалистты. Уыцы мадзал ахъаз уыд кæстæрты уæлахизмæ фæндагыл размæ тырнындзинадæн.

Битарты Вячеслав бафæдзæхста министрæн, цæмæй бацæттæ кæной программæ, стыр спортæй чи ацæуы, уыдонæн сæ дарддæры царды æххуыс кæнынæн. «Нæ спортсментæй бирæтæн профессионалон спорты хъыгдард баййафы сæ æнæниздзинад æмæ мах, уый æмбаргæйæ, хъуамæ саразæм, æнцой сын чи хæсса, ахæм хъæугæ мадзæлттæ», — загъта Битарты Вячеслав.

— Уæлахиз аразгæ у хорз физикон æмæ профессионалон цæттæдзинадæй, — загъта Сидахъаты Зауырбег. — Тохы рæстæг, фыццаджыдæр, хъуыды кодтон, цæмæй ма бафтауон цæсты, сæ зæрдæ мыл чи дардта, уыдоны: мæ бинонты, мæ хæлæртты, мæ тренерты, мæ Ирыстоны! Цалынмæ тæрхонгæнæджы æхситты фæстæ табломæ не скастæн, уæдмæ мæхицæн уæлахиздзау æнхъæл нæ уыдтæн. Республикæйы Сæргълæууæг йæ хъус афтæ лæмбынæг кæй дары кæстæрты æнтыстытæм, уый та нæ ноджы тынгдæр разæнгард кæны стырдæр уæлахизтæм.

ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here