Иры рагон паддзахы фæлгонц

0
105

 

Сбæрæг сты, афæдзы размæ РЦИ-Аланийы Нывгæнджыты цæдис скульпторты ‘хсæн цы конкурс расидт XIII æнусы цæрæг алайнаг паддзах Ос-Бæгъатыры номыл, уый уæлахиздзаутæ. Арæзт æрцыд Аланийыл Саргъуыдæй 1100 азы кæй рацыд, уый сбæрæг кæныны мадзæлтты фæлгæты.

Йæ нысан у алайнаг адæмы иудзинад, сæрибардзинад æмæ хæдбардзинадыл чи тох кодта, уый, фæстаг алайнаг паддзах Ос-Бæгъатыры ном сæнусон кæнын, кад ын скæнын. Историон хъайтар Ос-Бæгъатыры номыл равдыст-конкурсæн бындур сæвæрдтой РЦИ-Аланийы Нывгæнджыты цæдис, республикæйы Археологи æмæ историйы институт æмæ ООО «ДальЛес». Конкурсы хæрдзтæ йæхимæ райста, ацы хъуыддаг саразын рагæй йæ бæллиц кæмæн уыд, уый, «ДальЛес»-ы хицау Мæргъиты Зауырбег.

Æдæппæт конкурсы æвдыст æрцыд 19 авторы 25 проекты. Цалынмæ сæ эскизтыл куыстой, уæдмæ сын Нывгæнджыты цæдисы уыд цæлхæмбырдтæ археологтæ æмæ историиртасджытимæ. Уым-иу бæстонæй æрныхас кодтой бæгъатыры цардыл, йемæ баст историон цаутыл. Цы фарстатæ сæм æвзæрд, уыдонæн дзуапп лæвæрдтой скифаг-сæрмæтаг æмæ алайнаг истори æмæ культурæ иртасæг, профессор Бзарты Руслан æмæ историон наукæты кандидат Мамиаты Михал. Конкурсы къамисы сæрдар, архитектор Саулаты Валери куыд загъта, афтæмæй уæлдæр аргъ кæмæн ис скæнæн, ахæм эскизон куыстытæ равдысты бирæ ис. Уымæ гæсгæ къамисы уæнгтæн æнцон нæ уыд хуыздæрты сбæрæг кæнын. Сæ хатдзæгтæм гæсгæ, фыццаг бынат лæвæрд никæмæн æрцыд. Дыккаг бынат райстой Баскаты Сослан æмæ Цхуырбаты Олег. Æртыккаг бынат — Зæнджиаты Таймураз æмæ Кучиты Аслæнбег. Ахæм конкурстæ аразынæн стыр ахадындзинад ис. Ахъаз у кæстæртимæ хъомыладон куыст кæнынæн дæр.

Республикæйы Нывгæнджыты цæдисы сæрдар Мæргъиты Таймураз куыд загъта, афтæмæй Ос-Бæгъатырæн нæ республикæйы цырт сæвæрыны хъуыддаджы фыццаг къæпхæн, зæгъæн ис, æххæсгонд æрцыд. Ацы скульптурон эскизтæй ис равзарæн, цæмæй дзы саразой монументалон цыртдзæвæн æмæ йæ сæвæрой нæ горæты сæйрагдæр фæзтæй иуы.

— Ныхас кодтам Хуссар Ирыстоны Хицауадимæ. Сæ зæрды ис Цхинвалы дæр Ос-Бæгъатырæн монументалон цыртдзæвæн сæвæрын, — загъта Мæргъиты Таймураз.

Нæ истори, нæ хъæбатыртæ, не ‘гъдæуттæ, нæ культурæ æмæ нæ традицитæм фылдæр æргом здахын, литературон æмæ аивадон уацмыстæй сын лæггад кæнын, иннæ адæмыхæттыты размæ сæ сæрбæрзондæй хæссын, сæ ахадындзинад, сæ кад сын кæстæр фæлтæртæм рæстагæй адæттын у алы сфæлдыстадон адæймаджы хæс дæр.

Равдыст рауад цымыдисаг. Æхсызгон та уый у, æмæ дзы æрыгон скульптортæ дæр хистæрты æмрæнхъ кæй архайдтой.

ХЕТÆГКАТЫ Оксанæ Авторы ист къамтæ

 

ОСТАВЬТЕ ОТВЕТ

Please enter your comment!
Please enter your name here