Фембӕлд «Хуры тын»-ы хъомылгӕнинӕгтимӕ

0
11

 

Знон нӕ республикӕйы Сӕргълӕууӕг БИТАРТЫ Вячеслав бабӕрӕг кодта сидзӕр сывӕллӕтты хӕдзар «Хуры тын». Уым фембӕлд РЦИ-Аланийы ахуырад ӕмӕ наукӕйы министр Иринӕ АЗИМОВА, «Хуры тын»-ы директор ТМЕНАТЫ Феликс, республикӕйы Сӕргълӕууӕджы цур сывӕллӕтты бартыл ӕххӕстбарджын КОКАЙТЫ Артур ӕмӕ сывӕллӕтты хъомылгӕнджытимӕ. Иумӕ ӕрзылдысты сидзӕрты хӕдзары бӕстыхӕйттыл.

 

Ӕрӕджы сӕм цы цалцӕггӕнӕн куыстытӕ цыд, уыдонмӕ хӕдзардзин цӕстӕй акаст Битары-фырт, йӕ фиппаинӕгтӕ ӕргом загъта.

— Паддзахад цы ӕхца радих кӕны, уыдон хъуамӕ комкоммӕ хардз ӕрцӕуой, дӕхи хӕдзары, дӕхи кӕстӕртӕн куыд аразай, ӕрмӕстдӕр афтӕ, — загъта республикӕйы Сӕргълӕууӕг.

Ӕнӕбафиппайгӕ нӕй, педагогон коллектив кӕй аразы ӕппӕт мадзӕлттӕ, цӕмӕй хъысмӕтӕй ӕфхӕрд сывӕллӕттӕ ӕнӕнизӕй, хъӕлдзӕгӕй рӕзой, сӕ рӕстӕг пайдаджынӕй ӕрвитой. Бӕстыхайӕн йӕ алы къуым дӕр у сыгъдӕг ӕмӕ райдзаст, ис дзы хорз спортивон фӕз, алыхуызон ӕрмадзтӕ, хиирхӕфсӕн бынӕттӕ.

«Хуры тын»-ы хъомылгӕнинӕгтимӕ фембӕлды рӕстӕг Битарты Вячеслав загъта, цӕмӕй ӕргом ныхас кӕной йемӕ, мацы басусӕг кӕной. «Куыд цӕрут? ӕнкъард уын нӕу? Хӕринаг кӕнӕ дзаума хъуаг не стут? Зӕгъут-ма уӕ фӕндтӕ, уӕ бӕллицтӕ. Уӕ уроктӕ кӕнынмӕ уын чи ӕххуыс кӕны?» Ацы фӕрстытӕн сывӕллӕттӕ сӕ бынатӕй дзуапп лӕвӕрдтой. Уыдысты хъӕлдзӕг, уазджытыл цинтӕ кодтой. Иу лӕппу сӕ загъта, алцыдӕр хорз кӕй у, фӕлӕ йӕ сӕхимӕ фӕнды уӕддӕр. Куыд рабӕрӕг, афтӕмӕй йӕ хистӕр ӕфсымӕр дӕр «Хуры тын»-ы рауагъдон у, ныртӕккӕ ахуыр кӕны техникумы, гӕнӕн куы фӕуа, уӕд йӕ кӕстӕр ӕфсымӕрӕн ӕвджиды лӕгӕй бацӕудзӕн.

Тменаты Феликсы ныхасмӕ гӕсгӕ, куыд алы бинонты ‘хсӕн, афтӕ ацы хӕдзары цӕрджытӕн дӕр ис сӕхи ӕгъдӕуттӕ, фидар традицитӕ, уарзон бӕрӕгбӕттӕ, фӕткӕвӕрд. Уыдонмӕ гӕсгӕ цӕрынц.

— Хорз ахуыр кӕнут, хистӕртӕм хъусут ӕмӕ нӕ фӕрӕдидзыстут. Бацархайут хъӕугӕ дӕсныйад райсыныл, ӕнгом бинонтӕ скӕныныл. Мах та кӕддӕриддӕр уыдзыстӕм уӕ фарсмӕ, — загъта сын республикӕйы Сӕргълӕууӕг.

ГУГКАТЫ Жаннӕ Къам систа ЦӕГӕРАТЫ Дауыт

 

ОСТАВЬТЕ ОТВЕТ

Please enter your comment!
Please enter your name here