Йӕ хорздзинӕдтӕ йӕ азтӕй фылдӕр сты

0
13

 

 

Ногираг сылгоймаг БУКЫЛТЫ-ДЗӔГЪОЙТЫ Уардойыл цӕуы 104 азы. Дӕ сӕдӕ азы сӕрты ахиз, зӕгъгӕ, йыл хистӕрты куывд ӕрцыд

 

Фӕрнджын сылгоймагӕй базӕронд Уардо, кӕд мӕгуыры цӕрдтытӕ фӕкодта, уӕддӕр ӕм цы уыдис, уымӕй йӕ арм фынгӕн дардта хионӕн ӕмӕ ӕддагонӕн дӕр. Уымӕй дӕр — цӕстуарзонӕй, уымӕн ӕмӕ ӕлхынцъ ӕрфыгӕй, зӕрдӕйӕ цы нӕ раттай, уый фарсыл хӕцгӕ дӕр нӕ бакӕндзӕн. Уыцы тӕхудиаг миниуӕг ӕм ис абон дӕр, уымӕн ӕмӕ йемӕ ныхаскӕнгӕйӕ ӕдзухдӕр махӕн фынгмӕ амыдта, иу къӕбӕр уал исты куы ахордтаиккат, зӕгъгӕ.

Йӕ сӕрыл ма куырой нӕ разылд, ӕндӕр цы нӕ бавзӕрста Уардо. Ногиры быдырты йӕ рувӕндзӕф кӕм нӕ уыд, уый быдыр дӕр ма уӕд: нартхоррувӕнты, гӕн, цӕхӕра. Уыцы рӕстӕджы колхозты стурвос, уӕлдайдӕр дуцгӕ хъуццытӕ бирӕ дардтой, ӕмӕ хъугдуцӕгӕй дӕр бирӕ фӕкуыста, хӕринаггӕнӕгӕй. Уӕдӕ ирон хӕдзары куыстытӕ дӕр ӕлхынцъытӕ халӕгау сты, ӕмӕ, ӕхсӕв, бон нӕ зонгӕйӕ, тухӕн кодта Уардо.

Хӕсты рӕстӕджы та Ногиры йе ‘мхуызӕттимӕ акъоппытӕ бирӕ фӕкъахта. Нӕлгоймӕгтӕ та хӕсты цӕхӕры уыдысты. Уӕдӕ хӕсты фӕстиуджытӕ аиуварс кӕнынӕн дӕр лӕджы тых хъуыд, фӕлӕ уым дӕр Уардо уыд лӕгӕмдых сылгоймаг.

Уардойӕн йӕ сӕры хицау уыдис Дзӕгъойты Алекси. Ныууагъта йӕ ӕртӕ сывӕллонимӕ, ӕмӕ зын цӕрдтытӕ кодтой. Схъомыл сӕ кодта йе ‘фсин Косты Мартаимӕ. Бузныг у йӕ сыхаг, дзӕнӕты бадинаг Абайты Измайӕ. Уардо хӕринаггӕнӕгӕй колхозы куы куыста, уӕд Изма та бӕрнон кусӕг уыд, йӕ мӕгуыры цӕрдтытӕ йын зыдта ӕмӕ-иу ын изӕрӕй йемӕ цыдӕртӕ батыхта. Афтӕмӕй схъомыл кодта йӕ хъӕбулты Дзифи, Фатимӕ ӕмӕ Батыры. Хъыгагӕн, Батыр цӕрынхъуагӕй йе ‘цӕг дунемӕ бацыд. Дзифи у Гуыззыттаты чындз, Фатимӕ та — Къоксинты.

Ныртӕккӕ Уардо цӕры йӕ хъӕбулы хъӕбул Фатимӕимӕ. Уый смой кодта зилгӕйаг сӕрӕнгуырд Гуырцъыты Автандилмӕ. Уардо ӕмӕ йӕ кӕстӕрты афтӕ бафӕндыд. ӕмӕ йын уый йӕ хъӕбул Батыры баивта. Автандил, Фатимӕ ӕмӕ се ‘ртӕ хъӕбулы цӕрынц Уардоимӕ, сӕ цард мыдыкъусау у, афтӕмӕй.

Автандил къухӕй у арӕхстджын ӕмӕ хӕдзар галуаны хуызӕн скодта. ӕрхъӕцмӕ йыл нӕ хъӕцы Уардо. Уый дӕр ын хи хъӕбулы лӕггад кӕны. Сӕ зӕрдиаг лӕггадӕй цух нӕу Уардо Къоксинты ӕмӕ Гуыззыттаты кӕстӕрты ‘рдыгӕй дӕр. Хи хъӕбултӕн уый сӕ комкоммӕ хӕс у, ӕмӕ ууыл та чи дзуры, ӕдзух цырагъау лӕууынц йӕ цуры Дзифи ӕмӕ Фатимӕ. Хуыцау сӕ Уардойы карӕнмӕ фӕцӕрын кӕнӕд, уый дӕр ма сӕ хуртӕм кӕсгӕйӕ ноджыдӕр бирӕ азтӕ куыд фӕцӕра, уый йын Хуыцауы цӕст бауарзӕд.

Раст у, адӕймагӕн йӕ цард, йӕ азтӕй баргӕ нӕу, фӕлӕ йӕ хорздзинӕдтӕй. Уардойы хорздзинӕдтӕ та йӕ азтӕй фылдӕр сты ӕмӕ йын йӕ кӕстӕртӕ йӕ фарнмӕ фарн цы ӕфтауой, ахӕм амонд сӕ уӕд.

АБАЙТЫ Эдуард Къам систа КЪӔБЫСТЫ Харитон

 

ОСТАВЬТЕ ОТВЕТ

Please enter your comment!
Please enter your name here