Ӕнусы ӕмбис — иу куыстуаты

0
18

 

Иры зӕхх бӕзнаг ӕмӕ ӕлутон у, ис дзы фарн ӕмӕ бӕркад, рӕдау у зонд ӕмӕ ӕхсарыл. Зонд, ӕхсар ӕмӕ курдиат кӕмӕ ис, уый та йӕ ныййарӕг зӕххӕн, йӕ адӕмӕн кӕны лӕггад. Адӕмы фарн лӕгӕй цӕуы. Адӕмӕн ном ӕмӕ цӕсгом лӕг кӕны. Хорз лӕг йӕ раттӕг адӕмӕй хӕс дары. ӕрдз бирӕ царды хорзӕхтӕ кӕмӕн ратты, уый йӕхицӕй бирӕ домы, адӕмы хӕрзӕбонӕн йӕ разы стыр хӕс ӕвӕры.

Хуыбиаты Ефим у Хуыцауы комы тӕф кӕмӕ хӕццӕ кӕны, ахӕм лӕг, уӕззау зонды хицау ӕмӕ дзуапджын лӕг, ис ӕм уӕздандзинад ӕмӕ бӕрзонд культурӕ, дӕсны разамонӕг. Хуыбиайы-фырт — уӕздан ӕмӕ куырыхон лӕг, зӕрдӕйӕ ӕмӕ зонды хъаруйӕ ӕххӕст кӕй у, уымӕн ӕвдисӕн сты стыр металлургон хъомысджын завод «Победит»-ы мин ӕмӕ сӕдӕ кусӕджы кӕм ис, уым 45 азы кусы профкомы сӕрдарӕй. Заводӕн йӕхиуыл та 8 ноябры ӕххӕст кӕны 70 азы.

1100 кусӕджы се ‘ппӕт дӕр сты заводы профцӕдисы уӕнгтӕ, Стыр Уӕрӕсейы иу хъомысджын куыстуат дӕр нӕй, йӕ ӕппӕт кусджытӕ дӕр заводы профцӕдисы уӕнгтӕ кӕм уой, ахӕм. Ефим завод «Победит»-ы ӕдӕппӕт та кусы 54 азы. 1100 кусӕджы бартӕ хъахъхъӕнгӕйӕ, адӕмимӕ цӕрынмӕ куыд разӕнгардӕй архайы, уый бӕрӕг у заводы разамонджытӕ ӕмӕ кусӕг фӕллойгӕнджытӕ йыл се ‘ууӕнк куыд бӕттынц, цыппор фондз азы йӕ профкомы сӕрдарӕй кусгӕйӕ йӕ ныхасӕн цы аргъ кӕнынц, йӕ арфӕйаг хъуыддӕгты тыххӕй та — кад. Ефимы хъуыддаджы вазыгджын фарстатӕй бафӕрс, ӕмӕ лӕмбынӕг, раст нывӕфтыд мидисджын зӕрдӕмӕхъаргӕ дзуапп райсдзынӕ ӕмӕ цӕрӕнбонтӕм зӕрдӕрухсӕй баззайдзынӕ.

Ӕнӕ хорз адӕймӕгтӕй цардыуаг мӕгуыр у. Арфӕйы дзырдӕй арв дӕр райы, зӕрдӕйы дуар ӕм парахатӕй байгом вӕййы. ӕгъдау, ӕфсарм ӕмӕ намыс кӕддӕриддӕр уыдысты ирон адӕмы фидар уидӕгтӕ. Ацы стыр хӕзнатӕ, бӕрзонд ӕвӕрд цы бинонты, ӕхсӕнады, паддзахады сты, уым цардыуаг у бӕлвырд, биноныг, фӕтк йӕ бынаты, адӕмы цард — амондджын. Алы мыггаджы дӕр ис, мыггаг сӕрыстыр кӕмӕй у, ахӕм фарны лӕгтӕ, кӕстӕртӕ кӕй фӕзмынц, сӕ кад сӕ разӕй тырысайау кӕмӕн цӕуы, ахӕм тӕхудиаджы разагъды гуырдтӕ. Хуыбиаты Ефимау сӕ кад, сӕ намысӕй бӕрзонддӕр кӕнынц адӕймаджы миддуне, йӕ монон, культурон авналӕнтӕ, йӕ ахастдзинӕдтӕ цардмӕ, Райгуырӕн бӕстӕмӕ, ӕхсӕнадмӕ, йӕ раттӕг адӕммӕ, мадӕлон ӕвзагмӕ.

Йӕ бирӕвӕрсыг, хъомысджын курдиат сӕуӕхсидау кӕмӕн сӕрттывта ӕмӕ номдзыд куырыхон ирон лӕгты ӕмрӕнхъ чи ‘рлӕууыд уыдонӕй иу у Хуыбиаты Уасил ӕмӕ йӕ удыхай Куымӕриттаты Кетойы фырт Ефим. Йӕ ныййарджытӕ дунейы рухсмӕ рацыдысты кӕрӕдзийы амондӕн. Хуыцауы арфӕйӕ — арфӕйаг, адӕмы фарнӕй — фӕрнджын ныййарджытӕ схъомыл кодтой цыппар лӕппуйы ӕмӕ дыууӕ чызджы. Цард ӕнгом баст у зӕххы зылд, хурыскастимӕ. Уыдоны зылдӕн бауромӕн куыд нӕй, афтӕ ӕнусон у цард дӕр. Дунескӕнӕг нын ӕрдзон лӕварӕн ратта цард, ӕмӕ йын хъуамӕ аргъ кӕнын фӕразӕм. Адӕймаджы цард ӕмӕ хъысмӕт кӕуылты ӕрзилын кӕнынц. Ивылд доны уылӕнтау ивылынц Хуыбиаты Ефимы цардвӕндаджы мысинӕгтӕ. Даргъ ауӕдзтау хурӕнбӕрӕг сты йӕ адӕмӕн, ӕхсӕнадӕн цы хӕрзты бацыд, уыдон, йӕ адӕймагдзинады удыхъӕды хуыздӕр миниуджытӕ сты йӕ уды сыгъдӕг ӕвдисӕн. Йӕ ӕппӕт фӕллойадон азтӕ сты 58, уыдонӕй 54 азӕй ахызтысты «Победит»-ы заводы. Цас уды хъару, цӕсты рухс хъӕуы уыйбӕрц фӕллойы азтӕн. Профессионалон куыстыл зӕрдӕбынӕй чи архайы, цӕрӕнбонты адӕмӕн хорздзинад чи кӕны, йӕ арӕхстдзинад, фӕлтӕрддзинад, зонындзинад ӕмӕ адӕмӕн уарзон, кусджыты бартӕ хъахъхъӕнгӕйӕ, Ефим схызт Советон Цӕдис ӕмӕ Уӕрӕсейы профцӕдисы сгуыхт куысты уӕлдӕр къӕпхӕнмӕ. Хорзӕхджынгонд у фыццаг адӕмы хорзӕхӕй, стӕй — паддзахадон хӕрзиуджытӕй: Кады орденӕй, «Ирыстоны намысӕн» майданӕй, Советон Цӕдис ӕмӕ Уӕрӕсейы Федерацийы Профцӕдисты, Цӕгат Ирыстоны АСР-йы Сӕйраг Советы Президиумы бирӕ Кады грамотӕтӕй. Иры зӕххыл рӕстаг ӕмӕ хӕрзӕгъдау адӕймӕгтӕй бӕрзонддӕр ном ӕмӕ кад кӕмӕн ис, уыдонӕй фыццӕгты фыццаг у Хуыбиаты Ефим.

 

Цӕр нӕ буц Ефим, ӕнус,

 Хидвӕллойӕ райгӕ кус.

Цард дӕм хурау худдзӕн, уӕд, —

Баззайдзӕн дӕ фарны ном, зӕххыл.

 

Ефим царды комулӕфт банкъардта Хуссар Ирыстоны, Цхинвалы район Къостайыхъӕу — Цъунары. Адӕймаг кӕм райгуыры, фыццаг а-лол-ла-йы зарӕг кӕм фехъусы, уыцы алӕмӕты фыдыуӕзӕг адӕймагӕн свӕййы йӕ карздӕр сомыгӕнӕн. Хуыбиаты ӕвзыгъд лӕппу, Цъунары астӕуккаг скъола иттӕг хорз бӕрӕггӕнӕнтимӕ каст куы фӕцис, уӕд Советон ӕфсады службӕ кадимӕ сӕххӕст кодта. Ӕфсадӕй куы ӕрыздӕхт, уӕд Цӕгат Ирыстоны хъӕууонхӕдзарадон институтмӕ бацыд ахуыр кӕнынмӕ. Уӕлдӕр ахуырад куы райста, уӕд хӕхты хъӕбул, ӕрыгон цардбӕллон лӕппу банкъардта, куыст цардӕн фӕрӕз кӕй у, уый. Рагуалдзӕджы уыд хуымгӕнӕг, хортауӕг, сӕрдыгон куысты — хосдзау-зиууон, фӕззӕг — тыллӕг ӕфснайӕг, зымӕг — хъӕддзау, сугласӕг.

Ефим, уӕлдӕр ахуыр ӕмӕ куысты фӕлтӕрддзинад райсыны фӕстӕ йӕ цард снывонд кодта йӕ раттӕг адӕмы хӕрзӕбонӕн. Йӕ арфӕйаг арӕзт хъуыддӕгтӕй уӕрӕх фӕндаг ссардта Иры дзыллӕйы зӕрдӕмӕ. Адӕймаг адӕймаджы хорз куы зона, ноджы ма ӕппӕт адӕмӕн уарзон, хион хӕстӕгау хӕрзгӕнӕг куы уай, уӕд хуры хъарм тынтау рӕвдауӕг удыхъӕды хицауы цардвӕндагыл иуӕй зын фыссӕн у, иннӕмӕй — ӕхсызгон. Зын уымӕн, ӕмӕ ӕнцон нӕу адӕмӕн уарзон, кадджын лӕджы хъуыддӕгтӕ адӕмы размӕ рахӕссын, аккаг ныхӕстӕ ссарын. Ӕхсызгон уымӕн, ӕмӕ адӕмы раз йӕ хорзы кой ракодтай. Ӕниу ӕй Дзаболаты зынгхуыст Хазби хорз загъта:

 

Хорз лӕг! Дӕ хӕс цытджын ӕмӕ егъау у,

Дӕ фӕндаг — даргъ ӕмӕ дӕрзӕг…

Зӕххыл дӕм иу царды бар хауы,

ӕмӕ у дӕ адӕмӕн рухс фӕндтӕ хӕссӕг!

 

Бинонтӕ сты царды сӕйрагдӕр. Цард ӕппӕтӕй дӕр бинонтыл лӕууы. Уарзт ӕмӕ иузӕрдиондзинад цы бинонты ‘хсӕн вӕййы, уыдон адӕмӕн сты табуйаг. Нӕлгоймагӕн йе сгуыхт сылыстӕджы хорзӕй у. Царды дӕ сылгоймагӕй амонд нӕ фӕцис, уӕд уый у нӕлгоймагӕн цӕрӕнбонтӕм стыр зӕрдӕриссӕн. Нӕ разагъды лӕг Ефимӕн сылгоймаджы амондӕй нӕртон хай фӕци. Хуыцау ын цардамонды хорзӕхӕн радта Къалаты Замирӕты. Царды цӕхӕрадоны тулдз бӕласау фидар уидӕгтӕ ауагътой, уарзондзинад бабастой зӕрдӕйы тӕгтӕй, бабастой мыггӕгты хӕстӕгдзинад ӕфсӕн рӕхысы цӕгтӕй. Джыккайты Шамилы загъдау:

 

 Нӕй ӕнӕ уарзтӕй цард,

 Амонд дзы фӕлидзы дард.

Уарзгӕйӕ — цард мыдау, —

Ратты уарзӕттӕн Хуыцау!

 

Ефим ӕмӕ Замирӕты чызг Анжелӕ, фырт Оледжы хуызӕн хъӕбултӕ Иры зӕххыл фылдӕр уӕнт! Нӕ разагъды фыдӕлтӕм сӕ сӕры кад бӕрзонд ӕвӕрд уыд, ӕмӕ йӕ махӕн, сомбоны фӕлтӕрӕн, ныууагътой. Цӕмӕй нын ӕххуыс уой кӕрӕдзимӕ ӕнгом уӕвынӕн, иумӕ фӕрнӕй, уарзонӕй цӕрынӕн.

Нӕ куырыхон хистӕр Хуыбиаты Ефимы зонд дӕрдтыл ӕххӕссы, хорз зоны, ӕрмӕстдӕр ӕмзонд, ӕнгом дзыллӕйы бон бауыдзӕн фыдӕлты фарн ӕмӕ намыс дарддӕр ахӕссын.

 

ГУЫЛӔРТЫ Барис

ОСТАВЬТЕ ОТВЕТ

Please enter your comment!
Please enter your name here