Ныхас — 2030 азмӕ конд РЦИ-Аланийы Социалонэкономикон рӕзты стратегийыл

0
18

 

Сцӕттӕ ахсджиаг документ

«Ацы ахсджиаг документ бацӕттӕ кӕныны размӕ сбӕрӕг кодтам, нӕ республикӕ цавӕр авналӕнтӕ, фӕрӕзтӕ, хӕзнаты хицау у, уый. Фӕнысан кодтам, республикӕйы социалон рӕзт цы бындуртыл хъуамӕ ӕрӕнцайа, уыдӕттӕ. Уыцы куыст бакодтам тынг бӕрнонӕй, бирӕ хъару, хъомыс ын бахъуыд. Афтӕмӕй рабӕрӕг, ӕрдзон ӕмӕ ӕндӕр фӕрӕзтӕй куыд ис спайда кӕнӕн, цӕмӕй байгом кӕнӕм ног куыстуӕттӕ, адӕмӕн куысты бынӕттӕ, фӕпарахатдӕр уа хъалонтӕӕвӕрӕн базӕ», — знон РЦИ-Аланийы Сӕргълӕууӕг БИТАРТЫ Вячеслав ӕрныхас кодта 2030 азмӕ конд Цӕгат Ирыстоны Социалон-экономикон рӕзты стратегийыл.

Ацы ахсджиаг ӕмбырды ма архайдтой экономикон рӕзты министр Томайты Хъазыбег, РЦИ-Аланийы Рӕзты агентады генералон директор Павел Игнатьев ӕмӕ дзыллон хабархӕссӕг фӕрӕзты кусджытӕ.

Битарты Вячеслав куыд бафиппайдта, афтӕмӕй нӕ республикӕйы цалдӕр хатты бавнӕлдтой Социалон-экономикон рӕзты стратеги бацӕттӕ кӕнынмӕ. Фӕлӕ иу хатт дӕр царды ӕххӕстгонд не ‘рцыдис. «Ныртӕккӕ цы документ бацӕттӕ кодтам, уый цӕмӕй цардхъом разына, ууыл арф ахъуыды кодтам, раиртӕстам нӕ бӕстӕйы иннӕ регионтӕ, ӕндӕр паддзахӕдтӕн уыцы хъуыддаг куыд бантыстис, уыдӕттӕ. ӕппынӕдзух ӕмбӕлдыстӕм специалисттимӕ, семӕ уынаффӕ кодтам, куыд хуыздӕр, куыд растдӕр бавналгӕ у, нӕ размӕ цы нысантӕ сӕвӕрдтам, уыдонмӕ», — загъта республикӕйы разамонӕг.

Уый бӕстон радзырдта, Стратеги сӕххӕст кӕныны тыххӕй цавӕр мадзӕлттӕй спайда кодтой, чи, ӕмӕ йыл куыд архайдта, уыдӕтты фӕдыл. Куыд бамбарын кодта, афтӕмӕй скодтой Рӕзты агентад, уыдон республикӕйы разамындимӕ ӕмӕ зындгонддӕр специалисттимӕ бацархайдтой ӕмӕ Стратеги цы бындуртыл ӕнцой кӕны, уыдонмӕ гӕсгӕ сарӕзтой программӕтӕ. Хъуыддӕгтӕ цӕмӕй нывыл ацӕуой, уый тыххӕй конд ӕрцыдис кусӕг къордтӕ, уыдонӕй алчидӕр дзуапп лӕвӕрдта хицӕн программӕйӕн. Бонӕй-бонмӕ дзы цыдӕриддӕр конд цыдис, цӕмӕйты йӕ фидар кодтой, уыдӕттӕй алкӕмӕн дӕр ис хицӕн дзуапдӕттӕг адӕймаг.

Республикӕйы Сӕргълӕууӕджы ныхасмӕ гӕсгӕ, Сратеги куыд цӕттӕгонд цыдис, уый ӕппынӕдзух дӕр адӕмӕн хъусын кодтой. Ныридӕгӕн Стратегийы фараст программӕйӕ цӕттӕ сты ӕхсӕз. Зӕгъӕм, «ӕнӕниздзинад», «Ахуырад», «Хъӕууон хӕдзарады рӕзт» ӕмӕ ма ӕндӕртӕ. Афтӕ зӕгъӕн нӕй, ӕмӕ программӕтыл ӕрмӕстдӕр иугай министрадтӕ сты бӕрнон. Зӕгъӕм, «Хъӕууон хӕдзарады рӕзт»-ы фӕлгӕты бакусын хъӕудзӕн хӕххон территоритыл. Уым ӕмбӕхст ис бирӕ фӕрӕзтӕ, хизӕнуӕттӕ, хосгӕрдӕнтӕ. Ныртӕккӕ сӕм куы нӕ февналӕм, уӕд бынтондӕр фесӕфдзысты. Хӕхбӕсты ма чи цӕры, уыдонӕн хъӕуы аразын уавӕртӕ, цӕмӕй дзы уа хорз фӕндӕгтӕ, социалон кусӕндӕттӕ, ӕнӕниздзинад хъахъхъӕнынады фадӕттӕ ӕмӕ ӕндӕртӕ. Уыдӕттӕ ӕрмӕст Хъӕууонхӕдзарадон министрад нӕ сӕххӕст кӕндзӕн, хъуамӕ йемӕ ӕмгуыст кӕной Ахуырады, Культурӕйы, ӕнӕниздзинад хъахъхъӕнынады министрадтӕ ӕмӕ Фӕндӕгты хӕдзарады комитет.

Битарты Вячеслав куыд загъта, афтӕмӕй иунӕг бонмӕ программӕты архайд банкъарӕн нӕй, фӕлӕ республикӕйы цӕрджыты цардыл хорзӕрдӕм кӕй фӕзындзысты, ууыл йӕ зӕрдӕ дары. «Нырма Стратегийыл куыст цӕуы, фӕлӕ программӕтӕ сӕххӕст кӕнынмӕ бавнӕлдтам. Мах хъуамӕ ӕмхуызонӕй балӕууӕм, нӕ республикӕйы фӕрныгад цы ахсджиаг хъуыддӕгтимӕ баст у, уыдон ӕххӕст кӕныныл. Мӕн фӕнды, цӕмӕй ӕргом аздахӕм, Адӕмӕн куыст дӕттыны службӕйы фӕрцы специалисттӕ куыд цӕттӕгонд цыдысты, уымӕ. Уыйбӕрц нӕм фӕзындис парикмахертӕ, косметологтӕ, раст нӕ цыма ахӕм специалисттӕй фылдӕр ницы хъуыдис, афтӕ. Ныртӕккӕ бынтон ӕндӕр фӕтк равзӕрстам: — хъуамӕ уыцы фӕрӕзты ӕмӕ ма республикон ӕхцайы фӕрцы специалисттӕ цӕттӕ кӕнӕм Стратегийы домӕнтӕм гӕсгӕ», — фӕнысан кодта республикӕйы Сӕргълӕууӕг.

Ныхасгӕнӕг фӕбӕрӕг кодта, Цӕгат Ирыстон алыхуызон федералон программӕты куыд архайы, уый дӕр. Фӕстаг рӕстӕг республикӕ хи ӕфтиӕгты фӕрцы фылдӕр ӕмӕ ахадгӕдӕр нысантӕ ӕвӕрынхъом ссис. Зӕгъӕм, 2019 азы бюджеты хи фӕрӕзтӕ сӕвӕрдтам 350 милуан сомы. Уыдоны фӕрцы алыг кӕндзысты, ныртӕккӕ ахсджиагдӕр цы фарстатӕ сты, уыдон. Хомаг куыстгӕнӕг промышленность, фысвос дарынад, психиатрон рынчындоны цалцӕггӕнӕн куыстытӕ ӕмӕ ӕндӕр хъуыддӕгтыл схардз кӕндзысты уыцы ӕхца. «Стратеги, йӕ бындурыл цы программӕтӕ конд ӕрцыд, уыдон, ӕппындӕр бавналӕн кӕмӕ нӕй, ахӕм документтӕ не сты. Рӕстӕг ӕмӕ авналӕнтӕ сӕхӕдӕг амондзысты, цавӕр ивддзинӕдтӕ ма сӕм бахӕссын хъӕуы, уыдӕттӕ. Сидын Ирыстоны цӕрджытӕм, цӕмӕй ацы ахсджиаг документы тыххӕй сӕ хъуыдытӕ, сӕ фӕндӕттӕ, сӕ курдиӕттӕ ӕргомӕй дзурой», — фӕсидтис Битарты Вячеслав.

Фараст программӕйы

Дарддӕр РЦИ-Аланийы Социалон-экономикон рӕзты стратегийы тыххӕй раныхас кодта экономикон рӕзты министр Томайты Хъазыбег. Куыд бамбарын кодта, афтӕмӕй 2016 азы декабрӕй «Леонтьевский центр”-имӕ бавнӕлдтой ацы ахсджиаг документы проект цӕттӕ кӕнынмӕ. 2017 азы апрелы уал сӕ къухы бафтыдис республикӕйы уавӕр, йӕ авналӕнтӕ, йӕ фӕрӕзтӕ раиртасын. «Нӕ размӕ сӕвӕрдтам ӕртӕ хӕсы ӕмӕ уыдонмӕ гӕсгӕ куыстам. Фыццагдӕр, документ цӕттӕ кӕнынмӕ фӕсидтыстӕм нӕхи специалисттӕм, чидӕриддӕр уыцы хъуыддӕгтӕ хорз зыдта, ахӕм адӕймӕгтӕм. Дарддӕр архайдтам, цӕмӕй ацы Стратеги баст уа уавӕримӕ, фыст дзы цы ӕрцӕуа, уый сӕххӕст кӕнӕн куыд уа, афтӕ. Ӕртыккаг та уый ӕмӕ, цыдӕриддӕр куыстам, уый ӕргомӕй. Алы къахдзӕф дӕр, алы хицӕн фӕзилӕн, нысан дӕр рӕгъмӕ хастам, иумӕйагӕй сӕ ӕвзӕрстам», — бафиппайдта Томайыфырт.

Министр хицӕнӕй фӕбӕрӕг кодта Стратегийы проект ӕхсӕнадон бакастытӕм кӕдӕм рахастой, уыцы форумтӕ, ӕндӕр бынӕттӕ. Ацы аз сӕрды проект ӕрвыст ӕрцыди нӕ республикӕйы Парламентмӕ ӕмӕ Уӕрӕсейы Федерацийы Экономикон рӕзты министрадмӕ. Бӕстӕйы ӕххӕстгӕнӕг хицаудзинады оргӕнтӕ Стратегийы проектӕн экспертизӕ скӕнгӕйӕ сӕ фиппаинӕгтӕ ӕмӕ фӕндӕттӕ ӕрӕрвыстой ӕмӕ сӕ ныр документмӕ бахӕсдзысты. Томайты Хъазыбег ранымадта, Стратеги царды сӕххӕст кӕнынӕн цавӕр фараст программӕйы бацӕттӕ кодтой, уыдон: «Сфӕлдыстадон индустри», «Ахуырадонтехнологион комплекс», «Медицинӕ», «Туристон-рекреацион комплекс», «Промышленность», «Агропромышленнон комплекс», «Энергетикӕ», «Базарад ӕмӕ логистикӕ», «Тыгъдадон трансформаци». Ныхасгӕнӕг куыд загъта, афтӕмӕй сӕ рохуаты нӕ баззадысты, Уӕрӕсейы Федерацийы Президент Владимир Путин ацы аз майы цы ног Указтӕ сфидар кодта, уыдон дӕр. Ома, уыцы национ проекттӕ дӕр нымад ӕрцыдысты ӕмӕ уыцы ивддзинӕдтӕ дӕр хаст цӕуынц Стратегимӕ.

Хъуамӕ адӕм сӕ хъуыдытӕ зӕгъой

Республикӕйы Рӕзты агентады генералон директор Павел Игнатьев ӕмбырды архайджытӕн радзырдта Стратегийы проектыл куыд куыстой, уый тыххӕй. «Бацӕттӕ кодтам нӕ архайды бӕлвырд пълан, республикӕйы авналӕнтӕ ӕмӕ, ныронг пайдагонд цы фӕрӕзтӕй нӕ цыдис, уыдон равзарын бацахста дзӕвгар рӕстӕг, фӕлӕ уӕддӕр фӕбӕрӕг кодтам республикӕйы райрӕзтӕн ахсджиагдӕр цы хъуыддӕгтӕ уыдзысты, уыдон. Ныртӕккӕ алы программӕйӕн дӕр ис бӕстон фыст, бӕрӕггонд пълан, алы хъуыддагӕн дӕр — бӕрнон адӕймаг. Уӕлдӕр цы программӕты кой ракодтам, уыдонӕй ӕхсӕз сты цӕттӕ, кӕд ма сӕм ивддзинӕдтӕ ӕмӕ цавӕрдӕр уӕлӕмхасӕнтӕ хӕссӕм, уӕддӕр сӕ царды ӕххӕст кӕнын райдыдтам», — бацамыдта агентады разамонӕг.

Куыд бамбарын кодта, афтӕмӕй уал бавнӕлдтой туризмӕн специалисттӕ цӕттӕ кӕнынмӕ. Экскурситӕ амонджытӕ ӕмӕ туризмы къабазӕн разамынддӕтджыты ахуыр кӕнынц сӕ дӕсныйады сусӕгдзинӕдтыл. Уыцы-иу рӕстӕг фӕбӕрӕг кодтой географион бынӕттӕ, уыцы ран фӕзындзӕн логистикон центртӕ. Уый тынг ахсджиаг у, уымӕн ӕмӕ Цӕгат Ирыстоныл цӕуынц Уӕрӕсейы паддзахадон арӕнтӕ. Ахуырадимӕ баст программӕйы фӕлгӕты та бӕрӕг кӕнынц курдиатджындӕр сывӕллӕтты, фадӕттӕ аразынц сӕ курдиӕттӕ райхалынӕн. Павел Игнатьевы хъуыдымӕ гӕсгӕ алы прграммӕйы дӕр хъуамӕ сбӕрӕг кӕной сӕйраг рахӕцӕнтӕ ӕмӕ уымӕ гӕсгӕ кусой. Куыд бамбарын кодта, афтӕмӕй агентад, республикӕйы разамынд цӕттӕ сты, ацы ахсджиаг документ ӕппӕт дзыллӕты размӕ рахӕссын. Хорз уаид, адӕм йемӕ куы базонгӕ уаиккой ӕмӕ сӕ хъуыдытӕ, сӕ хатдзӕгтӕ ӕргомӕй куы зӕгъиккой, уый.

Ӕмбырды куыд райхъуыстис, афтӕмӕй мӕйы дӕргъы дзыллон хабархӕссӕг фӕрӕзты кусджытӕн уыдзӕн фадат алы программӕйы тыххӕй дӕр хицӕнӕй ӕрныхас кӕнын, цы фӕрстытӕ сӕм сӕвзӕра, уыдонӕн дзуаппытӕ дӕтдзысты программӕтӕн бӕрнон ведомствоты разамонджытӕ.

БУТАТЫ Эльзӕ

 

ОСТАВЬТЕ ОТВЕТ

Please enter your comment!
Please enter your name here