Поэт, прозаик, ахуыргонд, Хетӕгкаты Къостайы номыл паддзахадон премийы лауреат ХЪАЗИТЫ Мелитоныл 10 ноябры ӕххӕст кӕны 70 азы

0
25

Рӕстӕджы ӕвӕллайгӕ зиууон

 

Нӕ абоны литературон зиууӕттӕй иу у Хъазиты Мелитон. Ирвӕдӕны стъалытимӕ куы райдыдта ныхас кӕнын, йӕ зӕрдӕйы рӕсугъд тынтӕ куы райдыдта нывӕндын, уӕд йӕ уарзон Иры арвыл фӕзындысты тар, кӕуындзаст мигътӕ, уасын райдыдтой Ирыстоны сӕрмӕ фыдбоны халӕттӕ. Алчидӕр йӕхи барӕнтӕй бары. Фыдӕлтӕй нын баззад сыхаджы уарзын, сыхагӕн лӕггад кӕнын. Сыхӕгтӕй нӕ амонд кӕй нӕ фӕци, уый нӕм абон дӕр кӕронмӕ нӕма бахъардта. Нӕ хуссайраг сыхӕгтӕ нын цӕрӕнбонты «Сыгъдӕг быдыр» кӕй цӕттӕ кодтой, уый нын ӕргомӕй фенын кодтой 1990 азты. Хуыздӕйраг не сты нӕ сыхӕгтӕ Цӕгаты дӕр. Ныббырстой нӕм дыууӕрдыгӕй, Ирыстон туджы малты бахауд. Рӕстӕй Ирыстоны туг ныккалд. Ахӕм уавӕры бахауд йӕ сӕрдыгон бонты Мелитон ӕмӕ йӕ фӕдисы хъӕргӕнгӕйӕ зӕгъы: «Ир, мӕ Ирбӕсты ‘ргъиуы Садзынц гуырдз ӕрцытӕ, Судзынц Чъребайы риуыл Стыр фӕдисы ӕртытӕ…». Фӕдисы хъӕримӕ дзӕнгӕрджытау зӕлынц поэтӕн йӕ тохмӕ сидӕг дзырдтӕ дӕр: «Тохмӕ рацӕут иууыл! Иры арвыл ӕрхуы тӕлм… Судзынц Чъребайы риуыл Иры фидӕны ӕртытӕ». Йӕ сабибонтӕй абонмӕ ӕнӕрынцой зӕрдӕйы хицау у Мелитон.

 

Хъазиты Мелитон райгуырд Цхинвалы районы Ногхъӕуы 1948 азы ноябры мӕйы колхозон бинонты хӕдзары. Ногхъӕу ӕвзонг лӕппуйӕн фадӕттӕ аразӕг нӕ уыд, уымӕ гӕсгӕ йӕ бахъуыд ахуыр кӕнын хъӕутӕ Ортъеуы, Уӕллаг Черейы, стӕй та — Куысуисы астӕуккаг скъолайы.

Уый фӕстӕ ӕнтыстджынӕй каст фӕцис Хуссар Ирыстоны педагогон институты ирон ӕвзаг, литературӕ ӕмӕ фӕсарӕйнаг ӕвзӕгты факультет.

Студенты бонты фӕбӕрӕг сты йе ‘взыгъддзинӕдтӕ мадӕлон ӕвзаджы къӕбицмӕ ныккӕсынӕн, нывӕфтыд литературӕйы хӕзнадонмӕ бахизынӕн. Ам базонгӕ бӕстонӕй Къостайӕ райдайгӕйӕ нӕ классикон литературӕимӕ, уырыссаг, фӕсарӕйнаг ӕмӕ Кавказы адӕмты литературӕимӕ.

Кӕд йӕ литературон куыст скъолайӕ райдыдта, уӕддӕр йӕ студентон азтӕ схъӕздыг кодтой Мелитонӕн йӕ фыссӕн сисы авналӕнтӕ. Алыхуызон литературон изӕртӕ, студентты зонадон къордты куыст, зонадон конференцитӕ фаг цӕттӕдзинад радтой суинаг поэт ӕмӕ прозаикӕн, драматург ӕмӕ публицистӕн. Ардыгӕй райдыдта йӕ зонадон куыст дӕр — ссис филологон зонӕдты кандидат.

Институты фӕстӕ уал Мелитон бавнӕлдта егъау ӕхсӕнадон куыстмӕ. ӕмӕ кӕмыты нӕ куыста: газет «Хурзӕрин»-ы корректор, рауагъдад «Ирыстон»-ы редактор, телекомпани «Ир»-ы редактор. Уыдис Хуссар Ирыстоны Парламенты депутат, 1990 азӕй у Ирыстоны Фысджыты цӕдисы ӕмсӕрдар, фысджыты цӕдисы уӕнг та — 1976 азӕй. Мелитон кусы Уанеты Захары номыл зонадон-иртасӕн институты литературӕйы хайады, стӕй Хуссар Ирыстоны Тыбылты Алыксандры номыл паддзахадон университеты ирон литературӕйы кафедрӕйы. Зонадон куысты ӕмрӕнхъ кӕны ахуырады ӕмӕ хъомыладон куыст дӕр.

Нӕ абоны литературӕйӕн Хъазиты Мелитон у йӕ сӕйрагдӕр могортӕй иу. ӕвӕллайгӕ зиууон — нӕ поэзийы, ӕхсӕв нӕ хуыссы, бон нӕ бады, фӕлгӕсӕн рындзӕй кӕсӕгау кӕсы Ирыстоны хӕхтӕ ӕмӕ быдыртӕм, ӕдзӕллаг уавӕрмӕ чи ӕрхауд, кӕддӕр цард цӕджджинагау кӕм фыхт, уыцы комбӕстӕтӕм, уыцы хъӕутӕм. Йӕ зӕрдӕ дзы цӕмӕй рухс кӕны, уыдоныл мидбылхудгӕйӕ зары, цӕуыл риссы йӕ зӕрдӕ, уыдоны рӕгъмӕ хӕссы ӕмӕ сыл дзуры, цы у сӕ аххосаг, саразын нӕ цы хъӕуы ӕппӕт уыдӕттыл. Нӕ литературӕйы алы жанрмӕ дӕр егъау бавӕрӕн бахаста Хъазиты Мелитон. Йӕ поэзийы сӕйраг фарстатӕ сты адӕм ӕмӕ Фыдыбӕстӕ, не ‘взаг ӕмӕ нӕ диссаджы ӕгъдӕуттӕ, рагон Ирӕй ардӕм цавӕр уыд нӕ царды уаг ӕмӕ уавӕр, Ирыстоны ивгъуыд ӕмӕ абон, нӕ адӕмы хорздзинӕдтӕ ӕмӕ нӕ удыхъӕды иуӕй-иу аиппытӕ. Ацы ахсджиаг фӕрстытӕн аккаг дзуаппытӕ ссарӕн ис йе ‘мдзӕвгӕты ӕмбырдгонд «Азӕлд»-ы.

Аланты фӕд агурджыты къорд раст ӕмбарын кӕнынц нартӕ ӕмӕ алантӕ иры кӕй сты. Поэт Мелитон арӕх ныссагъӕс кӕны ивгъуыд нартыл — алантыл, зӕрдӕмӕхъарӕг дзырдтӕй кӕны сӕ кой алантӕн.

Йе ‘мдзӕвгӕ «Алантӕ»-йы зӕрдӕрисгӕйӕ зӕгъы:

 

 «Насау афаст йӕ астӕуыл, фӕдих,

Носӕй баззадысты хӕхтӕ».

 

Поэт аланты фӕндӕгтыл йӕ цӕст куы ахӕссы, уӕд ӕрхӕццӕ вӕййы абоны ирмӕ, Ирыстоны тохы фӕндӕгтӕм, ӕмӕ сыл дзуры йе ‘мдзӕвгӕ «Чъребайаг лӕппуйы зарӕджы». Дзуры цӕхӕры гуырд ирон, чъребайаг лӕппу цы уавӕры ис, цӕуыл у йӕ сагъӕс, цы уыны ӕрвылбон йӕ цӕстӕй, ууыл. Зӕгъы: «Нал сӕрд уынӕм, нал фӕззӕг, топпы хосы фӕздӕг бады хъуыры, фӕлӕ уӕддӕр знаджы баскъӕрдтам йӕ хуынкъмӕ».

Уӕззау уавӕры уыд Цхинвал, уыд знаджы ӕрхъулайы. Поэт нымайы Цхинвалы хъуагдзинӕдтӕ йе ‘мдзӕвгӕ «Цхинвайлаг цард»-ы. Нӕй дон, кӕрдзын, рухс, фӕлӕ быхсынц адӕм.

Ахӕм дуджы та Ир сфӕлхатт кодтой Къостайы ныхӕстӕ: «Цы уыдзӕн нӕ фидӕн, нӕ фӕстаг!». Уыимӕ иумӕ, Иры фидар хъуыды уыд: «Рӕстдзинадӕн сӕфӕн нӕй, арты нӕ судзы, дон ӕй нӕ ласы, кард ӕй нӕ кӕрды». Уый та уыд ирон адӕмы ныфсы мӕсыг ӕмӕ-иу алы хатт дӕр сӕхи фӕдзӕхстой Уастырджийыл.

Мелитон йӕ адӕмы патриот у, зӕрдӕрыстӕй сӕмбӕлд ЮНЕСКО-йы хъусынгӕнинагыл. Ирон ӕвзаг ӕмӕ ӕгъдӕуттӕн сӕфӕн, мӕлӕн кӕй нӕй, уый фидарӕй загъта йе ‘мдзӕвгӕты ӕмбырдгонд чиныг «ӕнусон рис»-ы, уӕлдайдӕр та ӕмдзӕвгӕтӕ «Нӕртон удӕвдз», «ӕнустӕм ис», «Ме ‘взаг», «Булӕмӕргъы зарӕг», «Дзыназы хъарӕгау нӕ зарӕг», «ӕвзаджы тых», «Ирон дзырд», «Нӕй амӕлӕн», «Ирон ӕвзаг», «Ирон зарӕг», «Ацӕмӕзы уадындз» ӕмӕ бирӕ ӕндӕртӕ. Поэт уӕндон ӕмӕ фидарӕй зӕгъы: «Ирон ӕвзагӕн амӕлӕн нӕй уӕдмӕ, цалынмӕ кӕсӕм Къостайы, Секъайы, Васойы”.

Кӕм ис фадат Мелитоны поэтикон бынтыл ӕрдзурынӕн. Йе ‘мдзӕвгӕты ӕмбырдгӕндтӕ: «Алдымбыд», «Хуры фырттӕ», «Рисс», «ӕнусон сагъӕс», «Цатыр» ӕмӕ ӕндӕртӕ бирӕ ахсджиаг фӕрстытыл дзурынц, дуг-рӕстӕджы цӕсгом реалонӕй ӕвдисынц.

Мелитон стыр тыхтӕ хардз кӕны ирон сывӕллӕтты литературӕ фӕхъӕздыгдӕр кӕныныл. Йӕ поэтикон ӕмбырдгӕндтӕ дзӕвгар сты, фӕлӕ уыдоны ‘хсӕнӕй бӕрӕгӕй ӕрттивынц 6 чиныджы, сывӕллӕтты царды уаг, сӕ зӕрдӕты ӕнкъарӕнтӕ ӕвдыст кӕм цӕуынц.

ӕрвнӕрӕгау дунетыл айхъуыст 2004 азы сентябры райдайӕны Беслӕны тугуарӕн бонты кой, ӕнахуыр ӕмӕ ӕбуалгъы трагедийы кой, ӕнаххос сывӕллӕтты, ныййарджыты, хоты ӕмӕ ӕфсымӕрты, зӕрӕдты бабыны, байсӕфты кой.

Фӕрыст дунейы адӕмты, иууыл тынгдӕр та — нӕ Ирыстоны зӕрдӕ. Нӕ литературӕ, нӕ историйы егъау бынат ӕрцахста ацы хабар. Стыр бынат ӕрцахста Мелитоны сфӕлдыстады дӕр. Йӕ чиныг «Рисс» ӕнӕхъӕнӕй дзурӕг у Беслӕны егъау трагедийыл.

Кӕуынӕй цард нӕй, Ирыстоны сабитӕ рӕвдауинаг кӕй сты, ууыл арф ныхъхъуыды кодта Мелитон ӕмӕ йӕ хъуыдытӕ загъта ӕмдзӕвгӕтӕ: «Рембо», «Дзывылдар», «Мыртгӕ», «Саг», «Зыдыка», «Уызыны катай», «Тыхуасӕг», «Мит», «Арвырон», «Байрӕзинаг». Ӕппӕт ӕмдзӕвгӕты нысаниуӕг, стӕй поэтӕн йӕхи фӕндиӕгтӕ, бӕллицтӕ ӕргомӕй разындысты йе ‘мдзӕвгӕ «Дадайы хуртӕ»-йы.

Дадайы ӕвзагӕй царды рӕсугъд дидинджытӕ — сабитӕн зӕгъы:

«Хурты хурау худут.

Уӕнт мӕ лӕггӕдтӕ уын тайӕн,

Байрайӕд уӕ хур-уд,

Зарӕг амонут «Дӕдадӕй»,

 Ма фӕтыхсут мур дӕр,

Байрӕзут ӕмӕ дадайӕн

Бахӕрут йӕ уд дӕр».

 

Хъазиты Мелитон прозӕйы дӕр бирӕ хӕрзты бацыд сабитӕн. Дзӕвгар у сӕ нымӕц, сывӕллӕттӕн кӕй ныффыста, уыцы радзырдтӕн. Йӕ чингуытӕ «Рувийы балц» ӕмӕ «Дзыхы къӕбӕл» бирӕ алыхуызон хӕстӕ ӕвӕрынц сабиты раз. Йӕ радзырдты тематикӕ у алыхуызон, фӕлӕ сӕ сӕйрагдӕртӕ сты: сывӕллон хъуамӕ уа уӕндон, ныфсджын, цӕсгомджын, ӕгъдауджын, архайа зындзинӕдтыл фӕтых уӕвынмӕ, кӕса коммӕ, хъуса зондамонӕгмӕ, уарза чиныг, ӕрдз ӕмӕ мӕргъты.

Мелитон алывӕрсыг курдиаты хицау у, фӕлӕ зӕгъӕн ис, прозӕйы йӕ тыллӕджы райст бирӕ хуыздӕр у. Ууыл та дзурӕг сты йӕ уацмысты ӕмбырдгӕндтӕ: «Зӕлы зарӕг»,, «Уарзты монц — зӕрдӕйы кадӕг», «Алмас», «Чызджы зӕрдӕ», «Окрос саламури», «ӕнӕ фӕхудгӕ, ӕнӕ фӕкӕугӕ» ӕмӕ йӕ роман «Фӕлдзӕуӕн рӕстӕг».

Куыд поэзийы, афтӕ прозӕйы дӕр ахсджиаг фӕрстытӕ хӕссы рӕгъмӕ. Цард тындзы йӕ размӕ ӕмӕ йӕм гӕппӕввонгӕй лӕууы Мелитон дӕр. Дуджы сагъӕсты, дзыллӕйы цин ӕмӕ рис, ӕгъдау ӕмӕ намыс, хистӕр ӕмӕ кӕстӕр. Фарн ӕмӕ амонд, лӕгдзинад ӕмӕ дӕлӕсиндзинад, Ир ӕмӕ Ирыстон, Алантӕ ӕмӕ абоны Ир.

Нӕ прозаик сыл дзуры ӕмӕ сӕ хӕссы рӕгъмӕ ахӕм хъуыдыимӕ: ирон хъуамӕ баззайа иронӕй, ӕндӕр фӕндаг нӕй махӕн. Дзырд ИРОН цы бынат ӕрцахста Мелитоны зӕрдӕйы, уымӕн та бамбарӕн ис, уӕлдӕр амынд уацмыстӕ куы бакӕсат, уӕд.

Хъазийы-фырт фӕсивӕды хъомылгӕнӕг у. Уыдоны царды уаг, зӕрдӕйы ахаст ӕвдисынмӕ Мелитон бавнӕлдта йӕ роман «Фӕлдзӕуӕн рӕстӕджы». Уый у нӕ литературӕйы фыццаг ахӕм роман, студентты цардыл дзырд кӕм ӕрцыд.

Мелитонӕн йӕхи бавӕрӕн ис ирон драматургийы дӕр. Йӕ пьесӕтӕ кӕд дзӕвгар не сты, уӕддӕр дзы нӕ къухы ис «Хъӕбулы амонд» ӕмӕ «Гӕдыла паддзах», ӕнтыстджынӕй цӕуынц нӕ театры сценӕйыл. Райгондӕй сыл сӕмбӕлдысты нӕ театрдзаутӕ.

Зонады къабазы Мелитон арф балӕгӕрста, уӕхскуӕзӕй бавнӕлдта ирон литературӕйы истори иртасынмӕ. Ам ын бантыст 5 чиныджы рауадзын. Уыцы чингуытӕм дзӕвгар ӕрцыд хаст нӕ фысджытӕй. Ныфс нӕ ис, нӕ фысджытӕй ма бирӕты кой кӕй ракӕндзӕн. Ныффыста сӕрмагонд чингуытӕ Къостайыл, Гафезыл, Нафийыл, Камалыл. Кусы Шамилы тыххӕй чиныгыл.

Ахсджиаг сты махӕн абон йӕ публицистикон куыстытӕ. Ирон адӕмы X съезды, стӕй нӕ хӕдбардзинады 10 азы боны карз ныхас цыд Тырсыгом, Хъуды ком, Къобы атагъатыл. Мелитон ацы фӕрстыты тыххӕй йӕ хъуыдытӕ загъта йӕ къаннӕг чиныг «Цы фӕцис Ирыстон, нӕ Хурскӕсӕн»-ы (мыхуыры рацыд 2013 азы). Хуссар Иры уавӕр ӕмӕ йӕ сомбоны сагъӕс ирдӕй разындысты Мелитоны ахӕм чингуыты: «Удӕй зынаргъдӕр — СӕРИБАР» (2013) ӕмӕ «Сабыр дзуринӕгтӕ»-йы (2012).

Хуссар Ирыстоны журнал «Фидиуӕг» цӕуы 1927 азӕй. 2007 азы йын сбӕрӕг кодтой йӕ 80 азы. Ацы ахсджиаг бӕрӕгбоныл Мелитон сӕмбӕлд йӕ зынгӕ зонадон куыст «ӕнусы къӕсӕрыл», зӕгъгӕ, уыимӕ. Уал азы дӕргъы «Фидиуӕджы» лӕггӕдтӕ цавӕртӕ уыдысты, уыдӕттыл дзы лӕмбынӕг ныхас ӕрцыд.

Мелитон бакуыста ирон ӕмдзӕвгӕты сконд, ритм ӕмӕ рифмӕты уагӕвӕрдтыл. Йӕ куыст схуыдта «Къӕбӕлдзыг ныхас». Нӕ литературӕимӕ хъуыддаг кӕй ис, уыдонӕн ахсджиаг у ацы чиныг.

Не ‘взаджы мӕгуыр цы ирӕттӕ хонынц, уыдон ӕй нӕ зонынц махӕн хъӕздыг ӕвзаг кӕй ис. Уӕдӕ бакӕсут Мелитоны чингуытӕ «Ирон ӕлгъыстытӕ» ӕмӕ «Ирон хӕзна», кӕддӕра нӕ зӕгъиккат, амондджын стӕм ахӕм ӕвзаг кӕмӕн ис. Уымӕн зӕгъы Васо: «Ирон ӕвзаг ахӕм хъӕздыг у ӕмӕ йыл алцы зӕгъӕн дӕр ис».

Алывӕрсыг курдиаты хицау у Хъазиты Мелитон. Кӕны тӕлмацы куыст дӕр ирон ӕвзагмӕ. Йӕ тӕлмацтӕ: «Продай мне мужа» (М. Задорнов), «Золушка» (Б. Баранов), «Фуэнте Овехуна» (Лопе де Вега), «Он, она, окно, покойник» (Рэй Куни), «Дон Жуан или каменный гость» (Мольер), «На краю неба» (Виталий Асовский, Линас Мариус) ӕмӕ ӕндӕртӕ хорз хуын сты нӕ литературӕйы хӕзнадонӕн. Нӕ театры сценӕйы дзы бирӕтӕ рарттывтой. Мелитоны фыдӕбӕттӕ, лӕггӕдтӕ рох не сты нӕ адӕмӕй, йе ‘мзиууон фысджытӕй. Дзӕнӕтыбадинаг Нафи афтӕ загъта: «Хъазиты Мелитон ныртӕккӕ ис йӕ аивадон зиуы бӕстастӕу. Бирӕ ахсджиаг уацмыстӕ сфӕлдисын бантыст уымӕн йе ‘нувыд куыст ӕмӕ хъомысджын курдиаты руаджы».

Мелитон сабиты зӕрдӕтӕм цы фӕндаг ссардта, уый тыххӕй йӕ рӕстӕджы Дзугаты Георги афтӕ загъта: «Кӕстӕр кары сабитӕн Хъазиты Мелитоны фыст ӕмдзӕвгӕтӕ сты зӕрдӕмӕдзӕугӕ ӕлвӕст, хуымӕтӕг, сабийы зӕрдӕмӕ чи фӕцӕуа, ахӕм уагыл фыст».

Стыр райгондӕй сӕмбӕлд Ходы Камал Мелитоны чиныг «Цатыр»-ыл. Афтӕ дзы зӕгъы: «Мелитоны чиныджы мӕм сӕйраг раппӕлинаг цы кӕсы: йе ‘мдзӕвгӕты бӕрӕг дары Ирыстоны хъысмӕт».

РХИ-йы фыццаг Президент профессор Цыбырты Людвиг ӕнӕ уынгӕ нӕу, Мелитон ӕнӕрынцой зӕрдӕйы хицау кӕй у ӕмӕ йӕ зӕгъгӕ дӕр кодта: «ӕмӕ мӕм фӕстаг рӕстӕджы афтӕ кӕсы,цыма мӕнӕ вулкан куыд стоны, афтӕ ацы лӕгӕн (Мелитонӕн — П.Г.) дӕр йӕ курдиат срӕмыгъта… Стӕй у алывӕрсыг: уый дын — драматурги, уый дын — поэзи, уый дын — прозӕ, уый дын — зонад… Алцӕмӕ дӕр йӕ ныфс хӕссы».

Дзӕнӕты бадӕд нӕ зынгӕ прозаик Булкъаты Михал, уый та афтӕ загъта: «Хъазиты Мелитон аив дзырд сифтындзынмӕ кӕй арӕхсы ӕмӕ йын йӕ мидисӕн спецификон миниуӕг кӕй радты, уый фӕрцы йӕ къухы арӕх бафты фӕд-фӕдыл цаутӕн сӕ хуызтӕ равдисын».

Фыссӕг Дзасохты Музафер Мелитоны змӕлд, архайд, йӕ бынтӕм куы акаст, уӕд йӕ ныхас уӕндонӕй загъта: «Уарзы кусын, фӕллой кӕнын Мелитон». Мелитонӕн фӕдзӕхсӕгау та зӕгъы: «Курдиат Хуыцауӕй лӕвӕрд у. Ӕмӕ дзы иугӕр фӕхайджын дӕ, уӕд ӕй амондыл нымайын хъӕуы».

Мелитон курдиаты ӕвӕрӕнтимӕ хорз зонгӕ у профессор Къусраты Анатоли. Анатоли филолог нӕу, у физик, математик. Мелитонӕн афтӕ зӕгъы: «Ирыстоны адӕм цӕмӕ бӕллыдысты, уый ӕрӕййӕфтой ӕмӕ нырӕй фӕстӕмӕ де сфӕлдыстады фылдӕр хъӕлдзӕг мотивтӕ цы уа, ӕмӕ дӕ дзырд ӕвдадзы хос уӕд адӕмӕн».

Нӕ дуджы ирон литературӕйы сӕрӕн гуырдтӕй иу уыд — дзӕнӕтыбадинаг ӕлборты ХадзыУмар, филологон зонӕдты кандидат. Мелитоны сфӕлдыстадыл йӕ цӕст куы рахаста, уӕд ӕргом ӕмӕ уӕндонӕй загъта: «Нӕ прозаик йӕ хъайтарты хъысмӕтмӕ куыдфӕндыйы цӕстӕй кӕй нӕ кӕсы, йӕ зӕрдӕмӕ сӕ хӕстӕг кӕй исы, уый руаджы йӕ уацмыстӕм ӕмхиц у зӕрдӕбын лиризм».

Хуссар Ирыстоны гимны автор, зынгӕ ирон поэт ӕмӕ тӕлмацгӕнӕг, Къостайы номыл паддзахадон премийы лауреат Кокайты Тотрадзы хъуыды та ахӕм у: «Дӕ алы уацмыс дӕр (Мелитонӕн — П.Г.) у хӕдбындур, хуызджын ӕмӕ мидисджын ӕвзагӕй фыст».

Хъазиты Мелитоны сфӕлдыстадон фӕндӕгтимӕ хорз зонгӕ чи у, уыдонӕй иу у Гӕбӕраты Юри. Мелитоны тыххӕй йӕ хъуыды ахӕм у: «Мелитонӕй рох никуы уыд ӕмӕ у йӕ сӕйраг хӕс — нацийы риссаг фӕрстытӕй хи иуварс айсыны бӕсты сӕ цӕхӕры судзын кӕй хъӕуы».

Мелитон у Хуссар Ирыстоны Къостайы номыл паддзахадон премийы лауреат, республикӕйы зонӕдты сгуыхт архайӕг, хорзӕхджын ӕрцыд ордентӕ ӕмӕ майдантӕй.

Мелитоныл бирӕ дзурӕн, бирӕ зӕгъӕн ис, фӕлӕ кӕм ис се ‘ппӕтыл дзурыны фадат. Зӕгъын уал хъӕуы уый, ӕмӕ Мелитон абон ракасти 70 азы мӕсыджы сӕрӕй. Нӕ цӕст ын уарзы дарддӕр дӕр дзӕвгар азтӕ батонын, йе сфӕлдыстадон къӕбиц фӕхъӕздыгдӕр кӕнын, цӕмӕй та фӕстӕдӕр йӕ 100 бон бӕрзонддӕр мӕсыджы сӕрӕй ракӕса.

Мелитон фӕллойы бонтӕй хъӕздыг у, хъӕздыг у хӕдзары фӕллӕйттӕй. ӕмкъай, ӕмзӕронд баут Ленӕимӕ, уӕ зӕнӕджы хурӕй ӕфсӕст ут, ноджы фылдӕр кӕнӕнт уӕ кӕстӕртӕ, стӕй уӕд уыдоны кӕстӕртӕ дӕр. Дӕ тых, дӕ ныфс, де ‘нӕниздзинад макуы фӕцудӕнт. Дӕ зӕрдыл кӕддӕриддӕр дар куырыхон Секъайы ныхӕстӕ:

«Дӕ ныфс куы асӕтта,

Уӕд сӕфт дӕ. Уый зон!

 Дӕхи зӕрондӕй дӕр

Лӕппу-лӕгтӕй хон!».

Фӕцӕр нын бирӕ!

ПЛИТЫ Гацыр, профессор

 

ОСТАВЬТЕ ОТВЕТ

Please enter your comment!
Please enter your name here