Туркӕй Теркмӕ — аивады базыртыл

0
18

 

Фыццаг хатт Турчы цӕрӕг ирӕттӕ сӕ фыдӕлты зӕхмӕ ӕрластой се сфӕлдыстадон куыстытӕ ӕмӕ сӕ арӕхстдзинад равдыстой сӕ хотӕ ӕмӕ ӕфсымӕртӕн. Равдыст арӕзт ӕрцыд РЦИ-Аланийы Культурӕ ӕмӕ Национ хъуыддӕгты фӕдыл министрадты хъӕппӕрисӕй. Равдысты архайдта РЦИ-Аланийы Сӕргълӕууӕг БИТАРТЫ Вячеслав, Хицауады уӕнгтӕ, интеллигенци, фӕсивӕд. Туркӕй чи ӕрбацыд, уыдоны фенынмӕ ӕрбацыдысты республикӕйы алы хъӕутӕй, сӕ хӕстӕджытӕ, мыггӕгты минӕвӕрттӕ.

Сырх уадздзаг алыг кодтой Битарты Вячеслав ӕмӕ Турчы цӕрӕг ирӕтты ӕхсӕнад «Алантӕ»-йы сӕрдар Хъуысаты Садреттин. Битары-фырт арфӕ ракодта равдысты архайджытӕн ӕмӕ Садреттины схорзӕхджын кодта майдан «Ирыстоны Намысӕн»-ӕй. Турчы цӕрӕг ирӕтты ӕхсӕнадӕн балӕвар кодта ХХ ӕнусы зындгонд скульптор Санаты Барисы конд скульптурон уацмыс «Чужбина». Баст у Ирыстоны историйы уӕззаудӕр цаутимӕ, нӕ фыдӕлты иу хай Туркмӕ куы алыгъдысты, уӕд фӕндагыл цы хъизӕмӕрттӕ бавзӕрстой, уыимӕ. ӕвдыст дзы ӕрцыд, фӕстӕмӕ, сӕ Райгуырӕн бӕстӕмӕ кӕсгӕйӕ размӕ куыд цыдысты, уый, ӕмӕ ирон адӕймаджы уды хъару.

Ӕппӕтдунеон ӕхсӕнадон змӕлд «Иры Стыр Ныхас»-ы сӕрдар Кучиты Руслан радзырдта, Хъуысаты Садреттин Турчы ирӕттимӕ цы хъазуатон куыст кӕны, куыд архайы мадӕлон ӕвзаг ӕмӕ традицитӕ бахъахъхъӕныныл, уый тыххӕй, ракодта йын арфӕтӕ Ирыстоны цӕрджыты номӕй ӕмӕ йӕ схорзӕхджын кодта Кады гӕххӕттӕй. Равдысты фенӕн ис кӕттагыл конд ӕрдзы нывтӕ, портреттӕ, абстракцион куыстытӕ. Тынг аив рауадысты ӕрмдӕсныйады хайады сфӕлдыстадон куыстытӕ. Бӕрзонд ӕмвӕзадыл конд сты Хоситы Мӕхӕмӕты ӕвзистӕй конд ирон сылгоймаджы уӕлӕдарӕс риуы ӕгънӕджытӕ, нӕлгоймаг ӕмӕ сылгоймаджы рӕттӕ ӕвзист ӕмӕ сыгъзӕринӕй, къухдарӕнтӕ, хъуырылдарӕнтӕ ӕмӕ ӕндӕр дзаумӕттӕ. Цӕри- къаты Ведат ӕмӕ Цӕры- асланы ювелирон куыстытӕ дӕр фӕндаг ссардтой адӕмы зӕрдӕтӕм. Цымыдисаг ӕмӕ историон цӕ- стӕнгасӕй ахсджиаг рауад, Хосонты Хамдийы бинонты ӕвӕрӕнтӕй равдысты цы рагон къамтӕ ис, уыцы хай. Фыццаджыдӕр дзы бирӕтӕ базондзысты се ‘мтуг рагфыдӕлты, сӕ хӕстӕджыты, зындгонд адӕмы. Иннӕмӕй та сӕ уынӕм уӕды рӕстӕджы уӕлӕдарӕсы истори. Равдысты ис графикон куыстытӕ, къамты равдыст. Дурынтӕ аразыны дӕсныйады аивадуарзджыты размӕ Абысалты Кайа цы ӕртӕ уацмысы рахаста: «Хорз фыййау», «Бинонтӕ», «Уацамонгӕ», уыдоны ис арф философон хъуыды. Ома, «ӕнгом бинонтӕ цард арынц», «хорз фыййау пыхсы дыр ары йӕ фосы», «фынгыл бӕрц зон». Таутиаты Осмӕны гравюрӕтӕ, Къостайы нывтӕ ӕвдыст ӕрцыдысты хицӕн хайӕ. Сӕ разы аивадуарзджытӕ, ӕнӕмӕнг, афӕстиат уыдзысты.

— Нӕ фыдӕлты зӕхмӕ кӕй ӕрцыдыстӕм, уый мӕнӕн у стыр бӕрӕгбон. Мӕ зӕрдӕ кӕны уынгӕг нӕ хотӕ ӕмӕ ӕфсымӕрты уындӕй. Куыд аив ӕмӕ рӕсугъд сты ирон чызджытӕ ӕмӕ лӕппутӕ! Мӕ зӕрдӕ ӕддӕмӕ ратоны арф ӕнкъарӕнтӕй. Уый диссаг у, фӕлӕ нӕ адӕммӕ уарзондзинады ӕнкъарӕнтӕ сӕхӕдӕг фӕндаг агурынц ӕддӕмӕ, фемӕхсыны ӕввонг сты, — загъта нывгӕнӕг Хосонты Сайхан Алпай.

Хъуысаты Садреттин куыд радзырдта, афтӕмӕй дарддӕр дӕр архайдзысты культурон бастдзинӕдтӕ фидардӕр кӕныныл. «Фыццаг хатт равдыстой Турчы цӕрӕг ирӕттӕ сӕ аивад Ирыстоны, — загъта Садреттин. — Уый нысан кӕны, абон нӕ бастдзинӕдтӕ нӕ уидӕгтимӕ ноджыдӕр кӕй фенгомдӕр сты, нӕ хӕлардзинады ахастдзинӕдтӕ ӕмӕ кӕрӕдзимӕ уарзондзинады тӕгтӕ ноджы фидардӕр кӕй сты. Уӕлдай ӕхсызгон мын уыд Битарты Вячеславы къухтӕй Ирыстоны стырдӕр хӕрзиуӕг райсын. Уый канд мӕнӕн лӕвӕрд не ‘рцыд, иунӕг адӕймаджы бон бирӕ нӕ бауыдаид саразын, мӕ фарсмӕ нӕ ӕхсӕнады уӕнгтӕ куы нӕ ӕрбалӕууыдаиккой, уӕд. Равдысты сывӕллӕттӕ бакастысты ӕмдзӕвгӕтӕ ирон ӕвзагыл. Ирон уадынгӕрзтӕй цӕгъдджыты къорды цагъдмӕ сарӕзтой ирон хъазт.

Равдысты цы 200 сфӕлдыстадон куысты ис, уыдон фенӕн ис майрӕмбонмӕ. Автортӕ сты Абысалты Кайа Арпат, Хосонты Сабахат Баркман, Хосонты Сайхан Алпай, Кинаты Омар Чаевик, Куындыхаты хӕрӕфырт Элван Эрдин, Хосонты хӕрӕфырт Курсат Инан, Ӕлбегаты Фатих Алтынок, Хоситы Мӕхӕмӕт Хоскан, Таутиаты Осмӕн Тавитай, Цӕрикъаты Ведат ӕмӕ Цӕрыаслан, Сӕбӕтхъуаты Йалчин Айдын, Хосонты Юнус Огун, Хъуысаты Ваедат Кусхан, Хосонты Гокхан Огун, Цъӕхилты Алан Алрай, Хъамырзаты Нилгун Гунгор.

ХЕТӔГКАТЫ Оксанӕ Авторы ист къамтӕ

 

ОСТАВЬТЕ ОТВЕТ

Please enter your comment!
Please enter your name here