Зындгонд ӕфсадхоны кадӕн

0
17

 

Иссӕ канд ӕфсады стыр разамонӕг ӕмӕ хъӕбатыр хӕстон нӕ уыд. Йӕ ӕгъдау, йӕ райгуырӕн Ирыстонмӕ уарзондзинад кӕуылты уыдысты! Ахӕм лӕгтӕ вӕййынц адӕмы ӕнӕкӕрон уарзты аккаг ӕмӕ ӕнустӕм баззайынц йӕ историйы. 4 ноябры Плиты Иссӕйы 115 азы кадӕн Дзӕуджыхъӕуы тхэквондойы галуаны дзюдойӕ цы турнир арӕзт ӕрцыд, уый дӕр ууыл дзурӕг у, Иссӕйы ном фӕлтӕрӕйфӕлтӕрмӕ нӕ адӕмы зӕрдӕты фидар бынат кӕй ахсы. Иссӕйы номарӕн турнир арӕзт ӕрцыд нӕ республикӕйы дзюдойы федераци, Физикон культурӕ ӕмӕ спорты министрад ӕмӕ Плиты мыггаджы хъӕппӕрисӕй. Ацы хъуыддаджы сӕ фарсмӕ ӕрбалӕууыдысты РЦИ-Аланийы Сӕргълӕууӕг Битарты Вячеслав ӕмӕ республикӕйы Хицауад.

Турниры архайдтой Ирыстоны, Дагестаны, Цӕцӕны, Мӕхъӕлы. Кӕсӕг-Балхъары ӕмӕ ХъӕрӕсеЧеркесты республикӕты, Стъарапол ӕмӕ Краснодары крайты, Ростов ӕмӕ Тюмены облӕстты дзюдоисттӕ. Уыдонӕй уӕлдай ма Дзӕуджыхъӕуы сӕ арӕхстдзинад ӕмӕ хъару ӕвдыстой Азербайджаны спортсментӕ.

Ерыстӕ гом кӕнгӕйӕ, спортсментӕн, уазджытӕн ӕмӕ спортуарзджытӕн арфӕ кӕнынмӕ рацыдысты: РЦИ-Аланийы Хицауады сӕрдар Тускъаты Таймураз, Уӕрӕсейы Федерацийы Паддзахадон Думӕйы депутат, Олимпаг хъӕзтыты 3-хатты уӕлахиздзау Таймазты Артур, Уӕрӕсейы сгуыхт артист Плиты Махарбег, нӕ республикӕйы физикон культурӕ ӕмӕ спорты министры хӕстӕ ӕххӕстгӕнӕг, Олимпаг хъӕзтыты уӕлахиздзау Бӕройты Хасан ӕмӕ нӕ республикӕйы иугонд командӕйы сӕйраг тренер Беккуызарты Алик.

Йӕ арфӕйы ныхасы Тускъаты Таймураз загъта: «Ирыстоны ӕмӕ нӕ бӕстӕйы уарзон фырт, инӕлар Плиты Исӕйы номарӕн турнир ууыл дзурӕг у, ӕмӕ мах нӕ хъӕбатыр хистӕрты лӕггӕдтӕ кӕй никуы ферох кӕндзыстӕм. Уыцы хистӕр фӕлтӕртӕ нӕ бӕстӕ йӕ къахыл слӕууын кодтой фыццаг дунеон хӕсты бӕллӕхты фӕстӕ Фыдыбӕстӕйы Стыр хӕсты бахъахъхъӕдтой нӕ сӕрибардзинад, фӕуӕлахиз сты, немыцаг фашисттӕ цы дунеон тугкалӕн хӕст ракъахтой, уым. Уый фӕстӕ та стыр фыдӕбон бакодтой нӕ бӕстӕйы сабыр цард ногӕй рацаразыныл. Плиты Иссӕйы номарӕн турнирмӕ абон ӕндӕр рӕттӕй цы уазджытӕ ӕрбацыди, уыдонӕн мах кӕнӕм зӕрдиаг арфӕ, спортсментӕн та нӕ зӕрдӕ зӕгъы ног ӕнтыстытӕ. Хуыцау зӕгъӕд, ӕмӕ абон ам йӕ хъару ӕмӕ арӕхстдзинад чи ӕвдисдзӕн, уыдоны ‘хсӕн фидӕны Олимпаг хъӕзтыты уӕлахиздзаутӕ куыд уа!»

Спортсментӕ ӕмӕ спортуарзджытӕн зӕрдиаг арфӕйы ныхӕстӕ загътой Таймазты Артур ӕмӕ Плиты Махарбег, Бӕройты Хасан та ерыстӕ байгом кодта. Ерыстӕ гом кӕныны мадзал сӕ аивадӕй барӕсугъд кодтой нӕ республикӕйы адӕмон артисткӕ Хадыхъаты Аллӕ ӕмӕ адӕмон кӕфтыты сгуыхт ансамбль «Ирыстон».

Турниры архайдтой 21 азӕй кӕстӕр спортсментӕ, ӕмӕ дзы алы уӕзы дӕр уыди, ныридӕгӕн йӕ карӕнты ерысты зынгӕ сгуыхтдзинӕдтӕ чи равдыста, ахӕмтӕ.

ӕппӕты рогдӕр уӕзы (60 кг онг) ирыстойнаг лӕппутӕй призон бынат бацахсын никӕмӕн бантыст. Цӕцӕйнаг богӕлттӕ Адам Исаев, Магомед Хамбулатов ӕмӕ Адам Харданов бацахстой 1-аг, 2-аг ӕмӕ 3-аг бынӕттӕ. Ноджыдӕр ма иу 3-аг бынат рамбулӕг ссис краснодайраг Алихан Чочаев.

66 кг уӕзы ирыстойнӕгтӕ Егиазар Карапетян, Голоты Сӕрмӕт ӕмӕ Амир Гафаров бафӕзмыдтой цӕцӕйнаг лӕппуты ӕмӕ рамбылдтой 1-аг, 2-аг ӕмӕ 3-аг бынӕттӕ. Ацы уӕзы ма иу 3-аг бынат бацахста азербайджайнаг дзюдоист Давид Абасали.

Тынг цымыдисаг рауадысты ерыстӕ 73 кг онг уӕзы. Ацы уӕзы фыццаг бынатыл тох кодтой цалдӕр ӕмдых лӕппуйы, фӕлӕ ӕппынфӕстагмӕ 1-аг бынатмӕ схызт Елбачиты Георги, 2-аг ӕмӕ 3-аг бынӕттӕ бацахстой цӕцӕйнаг дзюдоисттӕ Апти Заурбеков ӕмӕ Ахмед Дугушев. Ирыстойнаг лӕппу Олег Шевченко дӕр хорзӕхджын ссис бронзӕ майданӕй, куыд 3-аг бынат бацахсӕг.

81 кг онг уӕзы дӕр ерыстӕ къаддӕр цымыдисаг нӕ уыдысты. Ацы уӕзы йӕ хъарутӕ фыццаг хатт бавзӕрста Беккуызарты Алик ӕмӕ Цӕгӕраты Хъазыбеджы хъомылгӕнинаг Гамосты Давид ӕмӕ равдыста хорз цӕттӕдзинад. Давид фӕуӕлахиз йӕ ӕртӕ ныхмӕлӕууӕгыл дӕр ӕнӕкъуыхцыйӕ. Суанг ма кӕронбӕттӕны дӕр йӕ ныхмӕлӕууӕг цӕцӕйнаг богал Дени Арсанукаевыл фӕуӕлахиз «Иппон»-ӕй. Ацы уӕзы 3-аг бынӕттӕм рацыдысты Сергей Ревтов (Стъарапол) ӕмӕ Абубакар Гайтукаев (ЦР).

Беккуызарты Алик ӕмӕ Айларты Ирбеджы хъомылгӕнинаг Козаты Азӕмӕт ӕнӕкъуыхцыйӕ фӕуӕлахиз йӕ ныхмӕлӕуджытыл ӕмӕ 1-аг бынат бацахста 90 кг онг уӕзы. Ам 2-аг ӕмӕ 3-аг бынӕттӕм рацыдысты Саид-Ибрагим Сусланбеков (ЦР), Тотраты Азӕмӕт (РЦИ-А) ӕмӕ Турпал Сатаев (ЦР).

100 кг онг уӕзы 1-аг ӕмӕ 2-аг бынӕттӕ бацахстой Арафат Боташев (Хъӕрӕсе-Черкесты Республикӕ) ӕмӕ Тимур Чабаев (ЦР). Ирыстойнӕгтӕ Къолоты Рустам ӕмӕ Плиты Азӕмӕт та рацыдысты 3-аг бынатмӕ.

Уӕззау уӕзы ерысты архайдта, хӕрзӕрӕджы Иугонд Араббаг Эмиратты дунеон ерысты чи фесгуыхт, уыцы ирон дзюдоист Тасойты Инал. Уый кӕд нырма йӕ фӕллад дӕр нӕма суагъта, уӕддӕр, йӕхи загъдау, йӕхицӕн хӕсыл нымадта Плиты Иссӕйы номыл турниры ӕнӕмӕнг гауызмӕ рацӕуын. Инал фӕуӕлахиз ам дӕр ӕмӕ ссис дзюдойӕ Плиты Иссӕйы 1-аг номарӕн турниры уӕлахиздзау. Йӕ фӕстӕ 2-аг ӕмӕ 3-аг бынӕттӕ бацахстой Дзуццаты Алыксандр, Къӕбысты Аслан ӕмӕ Анзор Унароков (Хъӕрӕсе-Черкесты Республикӕ).

Ерыстӕ рауадысты тынг зӕрдӕмӕдзӕугӕ. Уый тыххӕй сӕ хъуыдытӕ загътой, куыд бынӕттон спортуарзджытӕ ӕмӕ тренертӕ, афтӕ нӕ уазджытӕ дӕр. Цӕцӕйнаг командӕйы тренер Султан Магомагов загъта: «Разыйӕ цӕуӕм Дзӕуджыхъӕуӕй. Турнир рауад тынг хорз арӕзт. Нӕ хъомылгӕнинӕгтӕн ахӕм ерысты архайын пайда у. Мах Ирыстонмӕ кӕдфӕнды дӕр фӕцӕуӕм ӕхсызгонӕй ӕмӕ алы хатт дӕр разыйӕ баззайӕм нӕ балцӕй. Фидӕнмӕ та нӕ куы фӕхонат, уӕд ӕнӕкъуылымпыйӕ ӕрбацӕудзыстӕм».

Дзюдойӕ нӕ республикӕйы иугонд командӕйы сӕйраг тренер Беккуызарты Алик дӕр разыйӕ баззад ерысты ацыдӕй: «Дыууӕ къуырийы фӕстӕ ацы кары фӕсивӕд хӕцдзысты Уӕрӕсейы чемпионаты, ӕмӕ махӕн ацы турнир уырдӕм нӕхи цӕттӕ кӕнынӕн пайдайы хос у. Ӕз стыр бузныг зӕгъын, турнир саразыныл чидӕриддӕр бацархайдта, уыдонӕн. Нӕ фарсмӕ ӕрбалӕууыдысты нӕ республикӕйы Сӕргълӕууӕг ӕмӕ Хицауад, Плиты мыггаджы минӕвӕрттӕ, дзюдойӕ Цӕгат Ирыстоны федерацийы президент Гаглойты Артур, нӕ таурӕгъон богал Таймазты Артур”.

Плиты мыггаджы номӕй спортсментӕн, спортуарзджытӕн ӕмӕ турнир саразджытӕн зӕрдиаг арфӕ ракодтой мыггаджы хистӕр Плиты Виктор ӕмӕ Плиты Махарбег.

БАСКАТЫ Уырызмӕг

Къамтӕ систа УӔЛЫГӔСТЫ Тимур

ОСТАВЬТЕ ОТВЕТ

Please enter your comment!
Please enter your name here