Ахуырады фарстатæм — фылдæр хъусдард

0
26

 

РЦИ-Аланийы социалон-экономикон рæзты стратегийы фæдыл дарддæр дæр æххæстгонд цæуынц æхсæнадон байхъуыстытæ. Знон та Национ наукон библиотекæйы республикæйы ахуырады къабазы минæвæрттæ, ахуыргæндтæ, æхсæнады уæнгтæ, ахуыры фæндагыл лæуд чи у, уыдон иумæ æрныхас кодтой, РЦИ-Аланийы Ахуырад æмæ наукæйы министры хæстæ рæстæгмæ æххæстгæнæг Людмилæ БАШАРИНА РЦИ-Аланийы социалон-экономикон рæзты стратегийæ цы программæтæ рахаста æхсæнадон байхъуыстыты архайджыты размæ, уыдоныл. Кæй зæгъын æй хъæуы, адæммæ уыдис фиппаинæгтæ æмæ сæ къамисы уæнгтæ сæхимæ фæнысан кодтой. Уымæ гæсгæ программæтыл дарддæр дæр цæудзæн куыст, сæ хæрзхъæддзинад сын бæрзонддæр кæнгæйæ. Стратеги арæзт æрцыд Битарты Вячеславы хъæппæрисæй. Йæ сæххæст кæныныл специалисттæ куыстой афæдз æмæ æрдæг.

Людмилæ Башарина куыд радзырдта, афтæмæй сæ размæ æвæрд ис фондз проекты сæххæст кæныны хæс. Уыдон сты: химионбиологион ахуырады райрæзт, математикон ахуырады райрæзт, уæлæмхасæн ахуырады райрæзт, ахуырады къабазы специалистты цæттæ кæнын æмæ республикæйы экономикæйы къабазæн специалисттæ цæттæ кæнын. Уыцы программæтæ сæххæст кæнынæн хъæуы æхцайы фæрæзтæ, уый фæдыл ахуырады къабазы цы Федералон æмæ регионалон программæтæ ис, уыдоны алкæцыйы дæр архайæм, республикæйæн дзы пайда æрхæссыны тыххæй. Республикæйы физикон-математикон скъолайы математикæйы ахуыргæнæг Мæргъиты Неля бæстон æрдзырдта, программæйы фæлгæты куыст куыд цæудзæн, уый тыххæй. Куыд бафиппайдта, афтæмæй, хъыгагæн, математикæйæ нæ республикæйы скъолаты ахуырдзаутæ бæрзонд бæрæггæнæнтæ нæ исынц. Иннæ регионтимæ абаргæйæ нæ уавæр у хуыздæрхъуаг. Стратегийы бындурыл цы программæтæ ис, уыдон та ныфс дæттынц, хъуыддæгтæ хорзæрдæм кæй раивдзысты, уымæн. Людмилæ Башарина куыд радзырдта, афтæмæй скъолаты математикæйы ахуыргæнджытæ нæ фаг кæны, æмæ уый дæр хорзæрдæм нæ ахады сывæллæтты ахуырадыл. Стратегийы сæйраг нысан та у, цæмæй алы сывæллон дæр райса хорз ахуырад æмæ раргом уой йæ курдиаттæ. Уый тыххæй республикæмæ хуынд цæудзысты специалисттæ сывæллæттимæ ахуыртæ кæнынæн.

Алы аз дæр ахуырады министрадмæ ныййарджытæ цы курдиаттæ бадæттынц, скъола каст чи фæцис, уыдонæн Уæрæсейы хуыздæр уæлдæр ахуыргæнæндæттæм нысангонд бынæттæ райсыны тыххæй, уыдон сæ нымæц минæй къаддæр нæ вæййы. Иннæ хъуыддаг та ма уый мидæг ис, æмæ уыцы минæй нæуæдз фæндзай вæййынц, медицинæйы фæндаг чи равзæрста, уыдон. Бæлвырд куыд у, афтæмæй та ахуырады къабазы хатдзæгтæм гæсгæ, хими æмæ биологийæ сæ бæрæггæнæнтæ зæрдæмæдзæугæ нæ вæййынц. Уый фæдыл стратегимæ хаст æрцыд ацы фарстайыл лæмбынæгдæр бакусыны тыххæй сæрмагонд программæ бацæттæ кæныны хъуыды. Нæ Республикæйы Сæргълæууæджы хъуыдымæ гæсгæ — хъæууонхæдзарадон къабазы рæзтыл кусыны хъуыддаджы та ацы предметтæ сты æнæмæнгхъæугæ æмæ уымæ гæсгæ ахсджиаг.

Уæлæмхасæн ахуырады райрæзты проекты сæйраг бынат ахсы курдиатджын сывæллæттимæ куыст. Уый фæдыл республикæ райста субсидитæ, балхæдта хъæугæ нырыккон ахуырадон техникæ, байгом уыдзысты уæлæмхасæн къордтæ, центр.

Ахуырадон системæйы хорз специалисттæ бацæттæ кæныны программæйы сæр нæ абон ахсджиагæй хъæуы. Скъолаты кусын, хъыгагæн, бирæты нал фæнды. Кусынмæ чи бацæуы, уый та дзы бирæ нæ афæстиат вæййы. Уый канд Ирыстоны нæ фæлæ Уæрæсейы иннæ регионты дæр у риссагдæр фарстатæй иу. Арæзтадон техникумы бындурыл нæ республикæйы арæзт æрцæудзæн профессионалон кадртæ цæттæгæнæн центр. Уыцы хъуыддаг сæххæст кæныны тыххæй УФ-йы 14 регионимæ нæ республикæйæн дæр лæвæрд æрцыд 55 милуан сомы.

Республикæйы социалон-экономикон рæзты стратегийы тыххæй сæ хъуыдытæ хистæр фæлтæры минæвæрттæ куыд æргом дзырдтой, кæстæртæ дæр афтæ. Разы нæ уыдысты, ирон æвзаг ахуыр кæныны фарстатæм фылдæр æргом ‘здæхт кæй нæй программæйы, ууыл. Сæ æнæниздзинадмæ гæсгæ сæ авналæнтæ цыбыр кæмæн сты, уыцы сывæллæтты тыххæй дæр бахастой курдиæттæ фылдæр сæм хъус æрдарыны фæдыл. Æмбырды ма раныхас кодтой: РЦИ-Аланийы Рæзты агентады разамонæг Павел Игнатьев, РЦИ-Аланийы экономикон рæзты министры хæдивæг Цориты Алетæ, РЦИ-Аланийы Парламенты депутат Тохъайты Нох.

ХЕТÆГКАТЫ Оксанæ

Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here