ТÆФÆРФÆС

0
44

 

Цæгат Ирыстоныл æрцыд уæззау зиан — цардæй ахицæн нæ зындгонд æмзæххон, республикæйы кадджындæр цæрджытæй иу, стыр спортсмен, уæгъдибар хъæбысхæстæй дыууæ хатты олимпаг чемпион, цыппар хатты дуне æмæ æртæ хатты Европæйы чемпион Андиаты Сослан Петры фырт.

Андиаты С.П. райгуырд 1952 азы 21 апрелы Дзæуджыхъæуы. Хъомыл кодта хъæбысхæстæй Цæгат Кавказы абсолютон чемпион Андиаты Петры бинонты ‘хсæн. Сосланæн йæ дыууæ æфсымæры дæр æмхиц уыдысты хъæбысхæстмæ, æмæ æфсымæрты хистæр Геннади хъæбысæй хæцæн залмæ ахуыдта 12-аздзыд Сосланы дæр.

Афтæ райдыдта Андиаты Сосланы спортивон фæндаг. 1969 азы Сослан фæуæлахиз дунейы фæсивæдон чемпионаты, 1971 азы та Андиаты æфсымæртæ архайдтой УСФСР-йы чемпионаты æмæ уæззау уæзы бацахстой фыццаг бынæттæ: Геннади сси чемпион, Сергей райста дыккаг бынат, Сослан та — æртыккаг. Уæдæй фæстæмæ ахæм æнтыстдзинад дунейы никæй къухы бафтыд.

1973 азы 20-аздзыд Сослан сси Советон Цæдисы чемпион, чысыл фæстæдæр та — дунейы чемпион. 1976 азы Монреалы Олимпиадæйы райдайæнмæ Андийы-фырт уыд Советон Цæдисы цыппар хатты æмæ дунейы дыууæ хатты чемпион. Монреалы Сослан равдыста хъæбысæй хæцæджы хуыздæр миниуджытæ æмæ рамбылдта йæ фыццаг олимпаг сыгъзæрин майдан.

Уыцы рæстæг Сослан стыр æргом здæхта ахуырадмæ дæр. 1974 азы Андийы-фырт каст фæци Хæххон хъæууонхæдзарадон институт, райста дзы агроном-экономисты дæсныйад. Фæстæдæр бахъахъхъæдта диссертаци æмæ сси хъæууонхæдзарадон наукæты кандидат.

1975 азы службæмæ бацыд Цæгат Ирыстоны Мидхъуыддæгты министрадмæ — 1989 азы онг дзы бакуыста спортивон инспекторæй.

1980 азы Мæскуыйы Олимпиадæйы Андиаты Сослан уыд Советон Цæдисы иугонд командæйы капитан. Уыцы бæрнон ерысты дæр Сосланæн ныхмæлæууæг нæ разынд — фондз тохы дæр фæуæлахиз. Афтæмæй рамбылдта йæ дыккаг олимпаг сыгъзæрин майдан.

Андийы-фырт йæхи бæргæ цæттæ кодта 1984 азы Лос-Анджелесы Олимпиадæмæ дæр, фæлæ хъысмæт æндæр уынаффæтæ рахаста. Куыд зонæм, афтæмæй Советон Цæдисы олимпаг делегаци Америчы Иугонд Штаттæм нæ ацыд. 1985 азы Андиаты Сослан сси Советон Цæдисы уæгъдибар хъæбысхæстæй иугонд командæйы тренер.

1989 азы Андиаты Сослан нысангонд æрцыд ЦИАССР-йы Физикон культурæ æмæ спорты комитеты сæрдарæй, уыцы бынаты бакуыста 2004 азы онг.

Уыцы азты нæ республикæйы спортсменты къухы бафтыд бирæ æнтыстдзинæдтæ, физикон культурæйы æмвæзад дæр зынгæ райрæзт. Кæй зæгъын æй хъæуы, уыцы хъуыддаджы Андиаты Сосланы сгуыхтдзинад дæр ахадгæ уыд. Физикон культурæ æмæ спорты рæзты сæйраг дæр бæрæггæнæнтæм гæсгæ уыцы азты Цæгат Ирыстон бахауд дæс хуыздæр уæрæсейаг регионы номхыгъдмæ.

1990-1998 азты Андийыфырт уыд Уæрæсейы Олипаг комитеты вице-президент, уыцы бæрнон бынаты кусгæйæ, стыр æвæрæн бахаста бæстæйы олимпаг змæлд парахатдæр кæнынмæ.

2004 азæй 2007 азмæ уыд РЦИ-Аланийы Президенты уынаффæгæнæг.

Андийы-фырт æртæ хатты æвзæрст æрцыд республикæйы Парламенты депутатæй, уым куыста йæ царды фæстаг бонты онг.

Фыдыбæстæ аккаг аргъ скодта Андиаты Сосланы спортивон æмæ куыстады æнтыстдзинæдтæн. Саккаг ын кодтой ССР Цæдисы спорты сгуыхт мастеры, Уæрæсейы сгуыхт тренеры, Уæрæсе æмæ Цæгат Ирыстоны физикон культурæйы сгуыхт кусæджы кадджын нæмттæ. Хорзæхджынгонд æрцыд Фæллойадон Сырх Тырысайы, Кады, Адæмты хæлардзинады, Хæлардзинады æмæ Ирыстоны Намысы ордентæй, «Фæллойадон сгуыхтдзинады тыххæй», «Ирыстоны Намысы», «Кады нысаны» майдантæй æмæ Уæгъдибар хъæбысхæсты дунеон федерацийы сыгъзæрин орденæй.

Олимпаг чемпион, таурæгъон спортсмен, æхсæнадон архайæг Андиаты Сосланæн Цæгат Ирыстоны цæрджытæ алкæддæр кодтой стыр аргъ. Не ‘мзæххон, Ирыстоны патриот Андиаты Сосланы сыгъдæг ном æнустæм цæрдзæн нæ зæрдæты, баззайдзæн Уæрæсейы спорты историйы æмæ нæ республикæйы фллойадон азфысты.

БИТАРТЫ В.З.

МАЧНЕВ А.В.,

ТУСКЪАТЫ Т.Р.

 

ОСТАВЬТЕ ОТВЕТ

Please enter your comment!
Please enter your name here