«Æвæрут уæ размæ бæрзонддæр нысантæ æмæ сæм уæндон, ныфсджын къахдзæфтæй цæут»

0
20

 

Знон РЦИ-Аланийы Хицауады Сæрдар ТУСКЪАТЫ Таймураз фембæлд Цæгат Кавказы Хæххон-металлургон институты экономикон факультеты студенттимæ институты конференцитæгæнæн залы. Фембæлд уыд фарст-дзуаппы хуызы. Уыцы хъæппæрис равдыстой студенттæ сæхæдæг. Фæнды сæ республикæ æмæ æхсæнадæн сæ хъуыдытæ æмæ фæндонтæй пайда хæссын. Уый фæдыл цы бирæ фæрстытæ бацæттæ кодтой, уыдонæн Хицауады Сæрдар радта бæстон дзуæппытæ.

Республикæйы цы заводты куыст æрлæууыд, уыдон ног æркусдзысты æви нæ, информацион системæмæ цы цæстæй кæсы республикæйы Хицауад, куыд цæудзæн куыст биоэтанол уадзыны фарстатыл, зæххыты хъалонтыл, цас райсы республикæ дотацитæ æмæ сæ куыд спайда кæны æмæ бирæ æндæр ахсджиаг фæрстытæ радтой фæсивæд Тускъайыфыртмæ.

— Фæсивæдимæ æргом фембæлдтытæн ис стыр нысаниуæг. Ахсджиаг у, сæ хъуыдытæ, сæ сагъæстæ сын сæхицæй фехъусын, сæ фарсмæ балæууын. Радзурын сын Хицауады куысты тыххæй, цы мадзæлттæ арæзт цæуы, куыд цæуы куыст республикæйы лыггæнинаг фарстатыл. Мæнæн мæ зæрдæ барухс ацы фембæлдæй. Фæсивæдмæ ис тырнындзинад ахуырады фæндагыл æнтыстдзинæдтæ æвдисынмæ, фылдæр базонынмæ. Мæнæн мæхицæн дæр цымыдисаг уыд сæ хъуыдытæ базонын. Ме ‘мкусджытæн дæр зæгъдзынæн, цæмæй арæхдæр цæуой адæмы ‘хсæнмæ æмæ æхсæнады хъуыдытыл æнцой кæнгæйæ аразой сæ куыст. Æхсызгон мын уыд, республикæйы социалон-экономикон рæзты стратегийы фæдыл бирæ фарстатæ кæй лæвæрдтой, уый дæр. Уый та нысан кæны, кæй сæ фæнды хорз ахуырад райсын æмæ республикæйы рæзтмæ хи æвæрæн бахæссын, — загъта Тускъаты Таймураз.

Кæронбæттæны Хицауады Сæрдар арфæ ракодта студенттæн, сæ республикæйыл иузæрдион кæй сты æмæ сын сæ куыстæн сæ архайдæй се ‘ххуысы хай кæй хæссынц, уый тыххæй. Æмæ ма йæ ныхасмæ бафтыдта: «Æз бирæ рæстæг фæкуыстон Аграрон университеты ахуыргæнæгæй æмæ мын абон дæр фæсивæдимæ кусын у уæлдай æхсызгон. Зæгъын мæ фæнды, нæ фæсивæд кæй сты æппæтæй рæсугъддæр æмæ зондджындæр. Æвæрут уæ размæ бæрзонддæр нысантæ æмæ сæм уæндон, ныфсджын къахдзæфтæй цæут. Кусут ноджы фылдæр уæхиуыл æмæ уыдзыстут æнтыстджын!»

ХЕТÆГКАТЫ Оксанæ Къамтæ систа КЪÆБЫСТЫ Харитон

 

ОСТАВЬТЕ ОТВЕТ

Please enter your comment!
Please enter your name here