Йæ ном — æнусон, йæ цард — цыбыр

0
27

 

Знон Иры дзыллæ йе ‘нусон дунемæ афæндараст кодтой, æфсæддоны ном кадимæ чи хаста, уый, Цæгат Ирыстоны республикон гвардийы командæгæнæг, майор Бæройты Эльбрусы. Райгуырд 1951 азы Æрхонкæйы, æгъдауджын бинонты æхсæн. Скъолайы фæстæ каст фæцис Дзæуджыхъæуы æфсæддон училище. Службæ кодта Германы. Куыста Орскы æфсæддон училищейы æмæ уырдыгæй бахъуыды рæстæг ацыд Афганистаны хæстмæ. Уæдмæ æрлæууыд 1992 аз æмæ райдыдтой Ирыстоны уæззау историон цаутæ. Алырдыгæй йын тыхтона куы кодтой, уæд йæхи равдыста аккаг хъæбулæй. Йæ бæрнондзинад æмæ хæрзхъæд куысты тыххæй хорзæхджынгонд æрцыд майдан «Ирыстоны Намысæн»-æй æмæ «Сырх Стъалы»-йы орденæй.

 

СУАНТЫ Станислав, инæлар:

— Майор Бæройты Эльбрус уыд Ирыстоны аккагдæр хъæбултæй иу, æцæг патриот. Дисы мæ алкæд æфтыдта йæ уæздандзинад, йæ хуымæтæгдзинад, йæ намысæй. Канд хъуыддаджы нæ, фæлæ ныхасы дæр уыд уæздан, фырнымд. Ирыстонæн алырдыгæй тыхтона куы кодтой, уæд фыццаг фæдисонтимæ уыд Эльбрус дæр.

1992 азы лæгæвзарæны рæстæг куы скодта, уæд, адæймагдзинады хуыздæр миниуджытæй æххæст, афицерæн куыд æмбæлд, афтæ хæдхæцæг къордты раззагдæртимæ æрлæууыд фыдæлты зæхх хъулгъайы экстремисттæй бахъахъхъæнынмæ. Эльбрусыл нæ республикæйы Хицауад баууæндыдысты æмæ йын бахæс кодтой ахсджиаг хъуыддаг, уыцы рæстæг республикæйы фыццаг хатт цы æфсæддон Гварди сарæзтой, уымæн разамынд раттын. Гвардийы сæйраг нысан уыд, Горæтгæрон районы центр Октябрыхъæу æмæ хæстæгдæр хъæутæм гæрзифтонгæй цы экстремисттæ æрбабырстой, уыдонæй ссæрибар кæнын. Быцæуы фыццаг сахæтты бахызт Октябрыхъæуы æмæ, йæ размæ цы хæстæ æвæрд уыд, уыдон сæххæст кодта, фыдгæнджыты фыдæнхъæл фæкæнгæйæ. Уыцы хъуыддаг къухы бафтыд, фыццаджыдæр, Эльбрусы арæхстджын разамынд æмæ гвардийы уæнгты хъæбатырдзинады æмæ быхсондзинады руаджы. Быцæуы дыккаг хайы стыр лæгдзинад æмæ хъæбатырдзинад равдыстой хæдхæцæг къордтæ. Радтой сын аккаг ныхкъуырд æмæ ссæрибар кодтой иннæ хъæутæ тыхгæнджыты фыдмитæй.

Афтæ æнтыстджынæй Эльбрус йæхи равдыста, 1992 азы июлы Хуссар Ирыстонмæ гуырдзиаг экстремисттæ куы æрбабырстой, уæд дæр, Сабырдзинад тауджытæн разамынд дæтгæйæ. Уæд тыхгæнджытæн ныхкъуырд ратгæйæ Хуссар Ирыстоны цы сæрибардзинад æрцард, уый ахаста 2008 азмæ. Гуырдзиаг хæстмондаг Михаил Саакашвили йе ‘фсæдтæ Хуссар Ирыстонмæ куы сарæзта, уæд Эльбрус архайдта Цæгатæй сын æххуыс бакæныны хъуыддæгты, афтæ бахаста йæхи æвæрæн уæлахизы бонмæ. Эльбрусы хуызæн лæгдзинад æмæ фыдыбæстæмæ уарзондзинадæй æххæст лæгтæ хъуамæ фæсивæдæн уой дæнцæг, сæ хъæбатырдзинадыл хъомыл кæной кæстæр фæлтæрты.

 

 БÆРОЙТЫ Иринæ, Дзæуджыхъæуы медицинон колледжы директоры хæдивæг:

— Эльбрус канд нæ мыггаджы кæстæртæн нæ, фæлæ иннæтæн дæр уыд фæзминаг йæ адæймаджы хуыздæр миниуджытæй. Уый кæйдæртау никæд кодта æхцайы, кады фæдыл дугъ. Нæ агуырдта хæрзиуджытæ. Газетты-иу, кæимæ хæцыд, уыдоны къамтæ куы федтон, уæд-иу æм загъд кодтон, ды дæр ма искæд семæ дæ къам сис, зæгъгæ. «Æз æххæст кодтон æрмæстдæр мæ хæс», — уыдис-иу цыбырæй йæ дзуапп.

Эльбрус йæ æфсæддоны ардбахæрдыл йæ къух никæд систа, уыдис ыл иузæрдион æмæ йæ æххæст кодта бæрзонд æмвæзадыл, сыгъдæгзæрдæйæ. Йæ хæстон фæндæгтæ йын чи нæ зыдта, уымæн йæ хъуыдыйы дæр никæд æрцыдаид, Эльбрусы хуызæн хæдæфсарм, уæздан лæг йæ къухмæ хæцæнгарз райсдзæн, уый.

Мыггагæй ахæм лæг куы ацæуы, уæд зæрдæ йæхи къултыл фæхойы хъыг æмæ рисæй. Афганистанмæ куы ацыд, уæд мæ мады инфаркт ныццавта, ме ‘фсымæрæн иунæг хъæбул у æмæ йыл исты куы æрцæуа, зæгъгæ. Мыггаг ыл цин кæнынæй нæ бафсæст. Эльбрусы хуызæн лæгтæй фæзæгъынц — патриот.

ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here