Паддзахад Аланийы чырыстон динрайст

0
51

 

Знон Цæгат Ирыстоны Хетæгкаты Къостайы номыл паддзахадон университеты уыд наукон-практикон конференци ахæм темæйæ «Аланийы чырыстон динрайст: истори, наукæ, культурæ». Ацы аз октябры Уæрæсейы Президент Владимир Путин «Аланийы чырыстон динрайсты 1100 азы бæрæгбоны тыххæй» Указ кæй бафыста, уый дзурæг у, уæлдæр паддзахадон Хицауад Аргъуан æмæ наукон æхсæнадты хъуыдыимæ разы кæй у, — астæуккаг æнусты алайнаг чырыстон паддзахад æмæ нырыккон Ирыстон-Алани сты æнгом баст.

Паддзахад Аланийы чырыстон динрайст æвдисы æрмæст монон иудзинад нæ, фæлæ идейон-политикон æмæ культурон иудзинад Уæрæсеимæ. Уый у, скифаг, византийаг æмæ фæстагмæ уæрæсейаг æртæ егъау цивилизацион системæты чи сфидар, ахæм иудзинад.

Наукон-практикон конференци арæзт æрцыд Республикæ Цæгат Ирыстон-Аланийы Парламенты хъæппæрисæй. Архайдтой дзы Парламенты депутаттæ; чырыстон дины минæвæрттæ, университеты ахуыргæндтæ æмæ студенттæ. Амыдта йæ РЦИАланийы истори æмæ археологийы институты директор, профессор, историон наукæты доктор Бзарты Руслан. РЦИ-Аланийы Парламенты Сæрдар Алексей Мачнев зæрдиаг арфæ ракодта конференцийы архайджытæн, бацамыдта 2022 азмæ цы бæрæгбон нысангонд цæуы, уый егъау ахадындзинад. Владикавказаг æмæ Алайнаг алчер Леонид радзырдта, Дзæуджыхъæумæ æрбацæуыны фæстæ Уæрæсейы Президент Владимир Путины Указ, цæмæй равзæрдаид, ууыл цæйбæрц куыст æрцыд, уыцы хабæрттæ. Фысымты номæй конференцийы архайджытæн зæрдæбын арфæйы ныхæстæ загъта университеты проректор Уадати Сулейман.

Паддзахад Алани чырыстон дин куы райста, ууыл 1100 азы сæххæсты историон-культурон ахадындзинады тыххæй цыбыр, фæлæ цымыдисаг доклад скодта Бзарты Руслан. Науконпрактикон конференцийы архайджытæ: РЦИ-Аланийы национ ахастдзинæдты министр Цуциты Аслан, РЦИ-Аланийы Парламенты депутат Моурауты Алан, РЦИ-Аланийы истори æмæ археологийы институты хайады сæргълæууæг Сланты Алан, институты наукон кусджытæ Габоты Людмилæ, Мамиаты Михал, Хуадонты Фатимæ, Сергей Малахов, Дмитрий Асратян скодтой арфхъуыдыджын, историон мидисджын æмæ бæстон наукон докладтæ.

Кæронбæттæны конференцийы архайджытæ скодтой бæлвырд хатдзæгтæ æмæ баныхас кодтой конференцийы æрмæджытæ хицæн чиныгæй рауадзыныл.

КАСАТЫ Батрадз Къамтæ систа ЦÆГÆРАТЫ Дауы

 

ОСТАВЬТЕ ОТВЕТ

Please enter your comment!
Please enter your name here