Агропромышленнон комплексы райрæзтæн

0
74

 

Цæгат Ирыстоны фыццаг уæлдæр ахуыргæнæндоныл, Уæрæсейы Хуссары фыццаг хъæууонхæдзарадон институтыл, абон — Хæххон паддзахадон аграрон университетыл сæххæст 100 азы. Уæд дæр æмæ йын абон дæр ис стыр ахадындзинад æрмæст нæ республикæйæн нæ,фæлæ æппæт Цæгат Кавказы республикæты ‘хсæн

Кадджын юбилеймæ цæттæгæнгæйæ, аграрон университеты разамынд афæдзы дæргъы бацæттæ кодта бирæ цымыдисаг фембæлдтытæ, конференцитæ. Знон та йæ куыст райдыдта науконпрактикон конференци. «Хæххон æмæ хохрæбын территориты агропромышленнон комплексы æнæкъуылымпы райрæзт наукæйы бындурыл».

Уазджытæн фадат уыд, абон университетæн, наукæйы бындурыл цы æнтыстдзинæдтæ бафтыд, уыдон фенынæн. Кæрты рæнхъ лæууыдысты мæркусæн æмæ æндæр хъæууонхæдзарадон техникæйы ног хуызтæ, бахизæны æппæт факультеттæ цымыдисаг равдыст бацæттæ кодтой.

Конференцийы архайджытæн æмæ уазджытæн зæрдиаг æгасцуай загъта аграрон университеты ректор, хъæууонхæдзарадон наукæты доктор, профессор Темыраты Виктор.

— Æнусы бæрц хæххон аграрон университет цæттæ кодта æмæ кæны нæ бæстæйы агропромышленнон комплексæн дæсны специалисттæ æмæ наукон-педагогон кадртæ. Хъæздыг у йæ истори нæ университетæн. 85 мин чызджы æмæ лæппуйы алы азты каст фесты ацы ахуыргæнæндон. Уыдонæй бирæтæ систы стыр ахуыргæндтæ, паддзахадон кусджытæ. Абон дæр, рæстæджы домæнтæм гæсгæ, аразæм нæ куыст, алы факультетты ахуыр кæны 6 мин студенты. Ис нæм, зæрдæ цæмæй рухс кæны æмæ сæрыстыр цæмæй стæм, ахæм хъуыддæгтæ, — загъта ректор æмæ фехъусын кодта 7 декабры университет кадджын уавæры кæй сбæрæг кæндзæн йæ 100 азы юбилей.

Нæ республикæйы Хицауады Сæрдар Тускъаты Таймураз РЦИ-Аланийы разамынды номæй арфæ ракодта науконпрактикон конференцийы архайджытæн.

— 100-аздзыд университет мæнæн уæлдай уарзон у, уымæн æмæ ам арвыстон мæ студенты бонтæ. Бирæ ирд сыфтæ фыст æрцыд йæ историйы чиныджы. Йæ райрæзты алы къахдзæф дæр баст у нæ бæстæйы ахсджиагдæр хабæрттимæ, кæддæриддæр йæ студенттæ æмæ ахуыргæнджытæ активонæй архайдтой нæ республикæйы хъомысдзинад фæтыхджындæр кæныныл. Абон паддзахад ног домæнтæ æвæры, адæмон хæдзарадæн дæсны специалисттæ чи цæттæ кæны, уыдоны раз. Æмæ уыцы хъомыладон æмæ рухстауæн куысты Хæххон аграрон университет кæддæриддæр уыд цымыдисаг, — загъта Тускъаты Таймураз.

Фыццаг доклад «Университеты аграрон наукæ: йæ рæзты къæпхæнтæ, æнтыстдзинæдтæ, йæ райрæзты ахсджиагдæр къабæзтæ», — скодта профессор, наукон куысты фарстатыл проректор Кудзаты Анатоли.

Сæ хъуыдытæ, сæ фиппаинæгтæ, куысты фæлтæрддзинады тыххæй дзырдтой Дагестаны, Кæсæг-Балхъары республикæты æмæ Стъараполы аграрон университетты минæвæрттæ.

Конференци абон йæ куыст адарддæр кæндзæн секцитæм гæсгæ. Дыууæ боны куыстæй хатдзæгтæ скæндзысты æмæ дзы хицæн документ бацæттæ кæндзысты.

ГУГКАТЫ Жаннæ Къам систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here