Дулаты Казимæйы номарæн турнир

0
84

 

Дзæуджыхъæуы Дзарасаты Саукуыдзы номыл спортивон комплексы ивгъуыд къуыри цыдысты Ирыстоны аивадон гимнастикæйы скъолайы бындурæвæрæг, Уæрæсейы сгуыхт тренер Дулаты Казимæйы æрвылазон номарæн турниры ерыстæ.

Спортивон комплексы тыд гауызыл æртæ боны дæргъы сæ арæхстдзинад æвдыстой: Цæгат Ирыстоны, Кæсæг-Балхъары, Хуссар Ирыстоны, Саратовы облæсты, Стъарапол æмæ Краснодары крайты гимнасткæтæ, æдæппæтæй 350-йæ фылдæрæй. Чызджытæ ерыс кодтой цалдæр кары. Æппæты кæстæртыл цыд 8-9 азы.

Фыццаг дыууæ боны ерыстæ цыдысты хицæн спортсменты ‘хсæн. Æппæты кæстæр чызджыты ерысы 1-аг бынатмæ рацыд краснодайраг æвзонг гимнасткæ Янæ Вандышева. Ирыстойнаг чызг Мæргъиты Алинæ та бацахста 2-аг бынат. 2008 азы гуырд спортсменкæты ерысы дæр фыццаг бынат бацахста краснодайраг чызг Варварæ Пустыльникова, дзæуджыхъæуккаг Виктория Захарова та рацыд 2-аг бынатмæ. Ноджыдæр ма иу Краснодары минæвар чызг Алинæ Птухина фæуæлахиз 2007 азы гуырд спортсменкæты ерысы. Ацы кары дзæуджыхъæуккаг Гусаты Элинæ бацахста 3-аг бынат.

Нæ чызджытæй фыццаг уæлахиздзау ссис Вероникæ Прушина. Уый 1-аг бынат бацахста 2006 азы гуырд спортсменкæты ‘хсæн ерысы.

Спорты мастермæ кандидаты программæйæ ерысты ирыстойнаг чызджытæ Тедеты Валерия æмæ Туаты Аделинæ бацахстой 1-аг æмæ 2-аг бынæттæ.

Спорты мастеры программæйæ ерысты ирыстойнаг чызджытæ Кочиты Виктория, Заойты Аделинæ æмæ Маргаритæ Билимович бацахстой 1-аг, 2-аг æмæ 3-аг бынæттæ.

Уæлдай цымыдисаг æмæ зæрдæмæдзæугæ уыдысты командон ерыстæ. Æдæппæт ерысы бацыдысты 37 командæйы. Фыццаг æвзонг гимнасткæтæ ерыс кодтой 1-аг спортивон разряды программæйæ. Ам фæуæлахиз Ростовы облæсты горæт Аксайы командæ. Дзæуджыхъæуккаг командæ «Пчелка» бацахста 2-аг бы- нат, 3-аг призон бынатмæ та рацыд налцыккаг чыз- джыты командæ.

Æрыгæтты 1-аг спорты разряды программæйæ ерысты дæр фæуæлахиз Ростовы облæсты командæ ДЮСШ-1, дзæуджыхъæуккаг чызджыты командæ «Юные грации» та рацыд 2-аг бынатмæ. Ам 3-аг уыдис Ростовы иннæ командæ «Звездочки». Ас спортсменкæты 3-аг разряды программæйæ ерысты фæуæлахиз Сочийы командæ «Буги-Вуги», 2-аг разряды спортсменты ерысы 1-аг бынатмæ рацыд Ростовы облæсты командæ «Аксай», 1-аг разрядонтæй дæр фæуæлахиз иннæ ростоваг командæ ДЮСШ-1.

Спорты мастермæ кандидаты программæйæ ерысты фæуæлахиз Ессентукийы командæ «Форс». Сæ хæдфæстæ 2-аг бынатмæ схыз- тысты дзæуджыхъæуккаг чызджытæ, 3-аг бынат та бацахста Ростовы облæсты командæ «Морозовск».

Ирыстойнаг чызджытæ фыццаг æртæ бынаты бацахстой спорты мастерты программæйæ ерыс кæнгæйæ. Нæ чызджытæ турниры æппæты вазыгджындæр программæйæ ерысты зынгæ тыхджындæр уыдысты иннæтæй æмæ сæ архайд дæр уыд тынг зæрдæмæ- дзæугæ. 1-аг бынатмæ рацыд Дзæуджыхъæуы иугонд командæ, 2-аг бынат бацахста «Ультра» (Дзæуджыхъæу), 3-аг бынатыл та æрлæууыд «Арион» (Дзæуджыхъæу).

Æртæ боны дæргъы ацы ерыстæм чи каст, уыдон, кæй зæгъын æй хъæуы, банкъардтой бирæ æхсызгон, зæрдæмæдзæугæ минуттæ. Ацы спорты хуызæн, йæ ном йæ уæлæ ис, «Аивадон гимнастикæ»! Ома, спорт æмæ аивад кæм баиу сты, уыцы рæсугъд æрхъуыды. Ахæм спорты хуызмæ кæсын удæнцой у, фæлæ, хъыгагæн, ерыстæ кæм цыдысты, уым сæм спортуарзджытæ кæцæй кæсой, уый нæй. Уый тыххæй сæ фиппаинæгтæ дзырдтой ерыстæм æндæр рæттæй ссæуджытæ дæр. Ессентукийы командæйы тренер Светланæ Тимченко загъта: «Æз ардæм фыццаг хатт ссыдтæн, дзæнæты бадинаг Дулаты Казимæ ма йæ тæккæ кусгæйæ куы уыд, уæд. Мæнæн мæ зæрдæмæ тынг цæуынц уæ тренертæ, уæ адæм, уæ спортсментæ. Казимæйы номарæн турнир у тынг хъæугæ хъуыддаг æмæ йæ чи аразы, уыдон сты арфæйы аккаг. Хъыгагæн, ерыстæ кæм цæуынц, уым æмбæлгæ уавæртæ нæй, æмæ уый тыхсын кæны куыд спортсменты, афтæ ерыстæм кæсджыты дæр. Растдæр зæгъгæйæ та, спортуарзджытæн ам бынат дæр нæй æмæ уый, мæгуырхуыз кæны ахæм рæсугъд спорты бæрæгбон. Ноджы ма, гимнасткæтæ кæм ерыс кæнынц, уыцы гауыз æдзæллаг кæй у, уый дæр тынг ахады спортсменты архайдыл. Ирыстон спортивон республикæ у, æмæ уын мæ зæрдæ зæгъы уыцы хъæндзинæдтæй рæхджы фервæзын, уымæн æмæ мах кæдфæнды дæр Дзæуджыхъæумæ æхсызгонæй фæтырнæм».

Аивадон гимнастикæйы сæрмагонд спортивон скъолайы директор Таболты Людмилæ ерысты ацыды тыххæй зæгъы: «Кæй зæгъын æй хъæуы, æхсызгон у, азæй-азмæ нæм фылдæр уазджытæ кæй цæуы, уый. Уый бæрц спортсментæн парахатдæр уавæртæ хъæуы æмæ иннæ аз агурдзыстæм æндæр бынат. Ацы бонты нын лæвæрд æрцыдысты ног гауызтæ æмæ сæ тагъд байтаудзыстæм. Уый тыххæй бузныг зæгъæм нæ республикæйы Физикон культурæ æмæ спорты министрадæн.

Нæ турнир дæр алы аз арæзт æрцæуы нæ Министрады æххуысæй. Бузныг зæгъæм нæ хъомылгæнинæгты ныййарджытæн дæр. Уыдон дæр алы хатт нæ фарсмæ æрбалæууынц æмæ нæ ерыстæ цæмæй æнæкъуылымпыйæ ацæуой, уый тыххæй се ‘ххуысы хай бакæнынц».

Ерысты ацыдæй разыйæ баззадысты РЦИ-Аланийы физикон культурæ æмæ спорты Министр Гæбулты Владимир æмæ аивадон гимнастикæйы федерацийы президент Хабыцты Ларисæ.

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here