Ерыстæй ссардтой Милдзыхты Юрийы рухс ном

0
18

 

Беслæны спортивон-дзæбæхгæнæн комплексы 24-25 ноябры лæгæй-лæгмæ тохты хуыз «панкратион»-æй цыдысты Уæрæсейы спорты сгуыхт мастер Милдзыхты Юрийы 4-æм номарæн турниры ерыстæ.

Милдзыхты Юри уыд зындгонд богал. Æнтыстджынæй хæцыд уæгъдибар хъæбысхæстæй, сумойæ æмæ лæгæй-лæгмæ тохты хуызтæй. Сумойæ ссис Уæрæсейы æмæ Европæйы чемпион, дунейы чемпионатты та дыууæ хатты бацахста 2-аг бынæттæ. Юри уыд хæларзæрдæ, æмгаруарзаг æмæ хæрзæгъдау адæймаг. Уый тыххæй йыл æнувыд уыдысты, чи йæ зыдта, уыдон хионæй, æмбалæй. Хъыгагæн, Юри æгæр раджы ахицæн ацы дунейæ, фæлæ йын йæ иузæрдион æмбæлттæ йæ рухс ном нæ рох кæнынц.

Юрийы номарæн турниры Ирыстоны богæлттæй уæлдай архайдтой КæсæгБалхъары, Цæцæны республикæйы æмæ Стъараполы крайы минæвæрттæ.

Ерыстæ цыдысты командæты ‘хсæн. Уымæй уæлдай ма фыццаг хатт тох цыд Цæгат Ирыстоны панкратионы профессионалон лигæйы чемпионы рон рамбулыныл.

Командæты ‘хсæн фыццаг бынат бацахста, тренертæ Къадзты Инал æмæ Геннади разамынд кæмæн дæттынц, уыцы клуб «Арс». Дыккаг бынатмæ рацыд Кæсæг-Балхъары республикæйы командæ «Файт-зон» (тренер Алим Машев), æртыккаг бынат та бацахста дзæуджыхъæуккаг клуб «Звезда» (тренер Дзабиты Руслан).

Профессионалон лигæйы Ирыстоны чемпионы рон рамбулыныл тохы фембæлдысты Тыбылты Зæрæт (клуб «Восток») æмæ Челдыты Хъазыбег (клуб «Арс»). Сæ тох рауад тынг цымыдисаг. Дыууæ богалы дæр равдыстой хорз цæттæдзинад æмæ уæлахизмæ тырнындзинад. Æппынфæстаг тох ахицæн Челдыты Хъазыбеджы пайдайæн, æмæ уый ссис панкратионы профессионалон лигæйы Ирыстоны фыццаг чемпион.

Ерысты уæлахиздзаутæ æмæ призертæн хæрзиуджытæ æмæ лæвæрттæ радтой Милдзыхты Юрийы фыд Валери, йе ‘фсымæр Милдзыхты Владимир æмæ йæ иузæрдион æмбæлттæ: Фрайты Сослан, Джызойты Витали, Зелимхан Ахмадов, Зассеты Тенгиз æмæ Олимпаг хъæзтыты уæлахиздзау Богъиты Вадим.

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here