Фысджыты цæдисы — ног сæрдар

0
18

 

Æрцыдис ахæм рæстæг, æмæ фыссæджы кад фæцудыдта. Интернет æмæ æндæр информацион технологитæ сæ бон калынц чиныджы кæвдæсарды бынатмæ раппæрстой. Фæлæ фыссæгæн рæстæджы ахæм цæхгæр фæзилæнты хъуамæ æхсида йæ зонд, йæ зæрдæ. Уымæн фæцудыны бар нæй, адæмæн сæ зын рæстæджы хъуамæ уа ныфсæнцой.

Нæ фысджытæ уыцы бæрнондзинад сæ адæмы раз кæй æнкъарынц, уый бæрæг уыд, æрæджы Национ наукон библиотекæмæ Фысджыты цæдисы сæрдары æвзарæн æмбырдмæ разæнгардæй кæй æрбацыдысты, уымæй.

Цæгат Ирыстоны Фысджыты цæдисы сæрдары хæдивæг Скъодтаты Эльбрус æрдзырдта боны фæткы фарстатыл æмæ ныхасы бар ратта фыссæг Дзасохты Музаферæн. Уый куыд загъта, афтæмæй Фысджыты цæдисы сæрдар равзарын бæрнон хъуыддаг у. Равзарын хъæуы ахæм адæймаджы æмæ йæхæдæг фыссæджы ном кад æмæ радимæ чи хæссы, стæй цæдисы абон æмæ фидæныл дæр чи хъуыды кæна, уымæй йæ алы уæнгыл дæр.

Æргом хъæлæс кæнгæйæ, æвзæрст æрцыдысты президиумы уæнгтæ: Скъодтаты Эльбрус, Дауыраты Дамир (сæрдар) Дзасохты Музафер, Будайты Милуся, Къубалты Эльбрус (культурæйы министр), æмæ нымайæн къамисы уæнгтæ: Дауыраты Зойæ, Дыгъуызты Тенгиз æмæ Хуыгаты Сергей.

Фидаргонд æрцыдысты Фысджыты цæдисы сæрдары бынатмæ æртæ кандидаты: Агънаты Гæстæн, Хозиты Барис, Тъехты Тамерлан.

Сусæг хъæлæс кæнгæйæ, Цæгат Ирыстоны Фысджыты цæдисы ног сæрдарæй æвзæрст æрцыд Цæгат Ирыстоны адæмон фыссæг Агънаты Гæстæн.

Газет «Рæстдзинад»-ы бæрнон редактор, фыссæг Цгъойты Хазби дзы уый размæ куыд загъта, афтæмæй уый сæрдары бынатмæ у аккаг адæймаг, цæдисы кад йæ кæддæры бынаты сбадын кæныныл зæрдиагæй чи бацархайдзæн, ахæм.

Президиумы сæрдар Дауыраты Дамир куыд загъта, афтæмæй Ходы Камал бирæ азты дæргъы кад æмæ радæй фæкуыста сæрдары бынаты, уæдæ ирон литературæйæн цы хæрзты бацыд, уый дæр зындгонд у. Гъе уымæ гæсгæ, фысджытæ се ‘мбырды æргом хъæлæсæй сфидар кодтой Фысджыты цæдисы кадджын сæрдары ном. Уыцы ном лæвæрд æрцыд Ходы Камалæн.

РЦИ-Аланийы культурæйы министр Къубалты Эльбрус зæрдиаг арфæ ракодта Агънаты Гæстæнæн йæ зын, фæлæ бæрнон бынаты тыххæй. Уый йæ зæрдиаг, йе ‘нæзæрдæхудт куысты тыххæй Культурæйы министрады Кады грамотæйæ схорзæхджын кодта Фысджыты цæдисы сæрдары хæдивæг Скъодтаты Эльбрусы. Фысджыты цæдисы ног сæрдар Агънаты Гæстæны ныхасмæ гæсгæ нæм ахæм æмзонд, æмуд æмбырд рагæй нал уыд.

Фысджыты цæдис цæмæй йæ къæхтыл слæууа, уый аразгæ уыдзæн не ‘ппæтæй дæр. Иумæ куы кусæм, уæд нæ хъæлæс дæр тынгдæр хъуысдзæн, адæмы дæр тынгдæр хъæудзыстæм. Нæ республикæйы Хицауад нæм йе ‘ргом раздæхта, æмæ нын уый ныфс дæтты æнтыстджын куыстæн.

Хозиты Барис куыд загъта, афтæмæй ма бирæ азты фæстæ абон æмбырдæй кæрæдзи кæй федтам, кæрæдзи цæстытæм комкоммæ кæй бакастыстæм, зæрдæбын ныхас кæй акодтам, уый дæр бирæйы аргъ у.

Хозиты Барис зæрдиаг арфæ ракодта Агънаты Гæстæнæн, æмæ фæндон бахаста, цæмæй Фысджыты цæдисы арæзт æрцæуа, æрыгон курдиатджын фæсивæдимæ чи куса, ахæм секци — «Фыццаг чиныджы секци». Æрыгæттимæ кусын хъæуы, уымæн æмæ фæлтæр фæлтæры хуыздæрæй-хуыздæрмæ куы нæ ива, уæд цард мынæг кæны.

АБАЙТЫ Эдуард

 

ОСТАВЬТЕ ОТВЕТ

Please enter your comment!
Please enter your name here