«Ирон дæн æз»

0
172

 

 

Ацы аз сæрдыгон каникулты райдайæны агъоммæ республикæйы иумæйагахуырадон кусæндæтты скъоладзау чызджыты æхсæн цыд Цæгат Ирыстоны республикон æхсæнадон змæлд «Иудзинад»-ы республикон æркаст-конкурс «Ирон дæн æз». Ныр дæр ахæм мадзæлттæ арæзт цæуы республикæйы астæуккаг скъолаты ахуырдзау лæппуты æхсæн, æмæ уал ныронг æнтыстджын уыдысты Мæздæджы, Æрæфы æмæ æндæр районты

 

Æрæджы та æркаст-конкурс «Ирон дæн æз» Æрыдоны фыццæгæм скъолайы арæзт æрцыд районы скъолаты лæппу фæсивæды æхсæн. Ардæм æрбацыдысты горæт æмæ районы хъæуты астæуккаг скъолаты ирон æвзаг æмæ литературæйы ахуыргæнджытæ, æркастконкурсы архайджыты ныййарджытæ, скъоладзаутæ æмæ хуынд адæм.

Мадзал райдыдта Джеоргуыбайы бæрæгбоны æртæ чъирийы æмæ æртæ фæрсчы бæгæныйы кæхцæй скувынæй, æмæ Цæгат Ирыстоны республикон æхсæнадон змæлд «Иудзинад»-ы координатор Байсонгъуырты Мухтар йæ фæндиæгты загъта, цæмæй, æркаст-конкурсмæ чи æрцыд, уыдоны уа Ирыстоны зæдтæ æмæ дауджыты хорзæх, æнтыстдзинæдтæ сæ къухы æфта фæллой æмæ ахуыры дæр.

Ахæм ракуывды фæстæ æркаст-конкурсы жюрийы уæнгтæ Байсонгъуырты Мухтар, Цæгат Ирыстоны республикон æхсæнадон змæлд «Иудзинад»-ы советы уæнгтæ Дзуццаты Феликс, Токты Валодя, Базраты Агуындæ, Æппæтдунеон æхсæнадон змæлд «Иры Стыр Ныхас»-ы Æрыдоны районы хайады Сылгоймæгты комитеты сæрдар Калоты Эммæ, Æрыдоны сывæллæтты сфæлдыстады хæдзары методист Иринæ Мамедкеримова бацахстой сæ бынæттæ. Конкурсы архайджытæ та уыдысты: Æрыдоны фыццæгæм астæуккаг скъолайы ахуырдзау Гæбуты Алан, Æрыдоны дыккæгæм астæуккаг скъолайы ахуырдзау Тотойты Георги, Красногоры астæуккаг скъолайы ахуырдзау Дзитойты Алыксандр, Къостайыхъæуы астæуккаг скъолайы ахуырдзау Хъулаты Сослан, Мичурины астæуккаг скъолайы ахуырдзау Гаглойты Марат. Нартыхъæуы астæуккаг скъолайы ахуырдзау Гаглойты Мурат. Уыдон ирон национ уæлæдарæсы сценæмæ æмхуызонæй куы рацыдысты, уæд сын залы бадджытæ сарæзтой тыхджын къухæмдзæгъд.

Æркаст-конкурс амонæг — Æрыдоны цыппæрæм скъолайы ирон æвзаг æмæ литературæйы ахуыргæнæг Боциты Зæлинæ лæппутæм фæсидт, бæрæгбоны программæ кæй райдыдта, уый тыххæй. Æркаст-конкурсы архайджытæ ралæууыдысты сценæйы æмæ райхъуыст:

— Æз райгуырдтæн алайнаг зæххыл, Ирыстоны, æмæ æз мæхи хонын ирон, стæй лæппутæ цалдæр хатты æмхъæлæсæй сфæлхат кодтой: «Ирон дæн æз, ирон дæн æз, мах иууылдæр — Иры лæппутæ!»

Дарддæр Боциты Зæлинæ фехъусын кодта лæппутæн æркаст-конкурсы фыццаг хæслæвæрд кæй уыдис, «Ирон дæн æз», зæгъгæ, ахæм темæйыл нывæцæн ныффыссын. «Ирон зарæг куы фехъусын, уæд мыл базыртæ базайы», — загъта Тотойты Георги, æмæ, дам, худинаг фæуæд, уый гæвзыкк уавæрмæ чи æруагъта, уымæн. «Мах та йæ хъуамæ æмхуызонæй бахъахъхъæнæм», — ахæм уыдис Георгийы кæронбæттæн хъуыды. «Æцæг ирон уый у, æмæ йæ фыды уæзæг, Нарты кадджытæ, аргъæуттæ, æмбисæндтæ зæрдæйæ чи уарзы», — дзырдта Дзитойты Алыксандр. «Адæм се ‘гъдау æмæ се ‘фсармæй адæм сты», — ахæм уыдис Гаглойты Мураты ныхас.

Амонæг куыд бацамыдта, афтæмæй, йæ бæрæгбон чи куыд кæны, уый дзурæг у адæмы культурæйыл. Уымæ гæсгæ æркаст-конкурсы архайджытæй алчидæр æхсызгонæй дзырдта ирон бæрæгбæтты тыххæй. Хетæджы Уастырджийы бæрæгбон Æрыдоны цæрджытæ куыд фæкæнынц, уый тыххæй уыдис Гæбуты Аланы раныхас. Суанг ма мониторыл къамтæ дæр равдыста, Тотойты Георги та радзырдта, Уациллайы бæрæгбон ирон адæм куыд кодтой, уый тыххæй. Дæргъæвсы Уациллайы кувæндонмæ, дам, æнæгъдауæй чи бацæуа, уымæн æй зæд нæ ныббардзæн, дзырдта Георги.

Æцæгдæр, æгъдау у æппæты сæр, æмæ уый тыххæй ерысдзау лæппутæн бацайдагъ бæлвырд ныхас. Лæппу-иу фыццаг хатт æмдзуарджын æмæ къухылхæцæгимæ йæ каистæм куы бацыд, уæд-иу сæ цавæр æгъдау раттын хъуыд, уый тыххæй бæлвырд радзырдта Гæбуты Алан. Бæлвырд æмæ мидисджын уыдысты Гаглойты Мурат æмæ Гаглойты Мараты раныхæстæ дæр.

Хæслæвæрд «Мыггæгты равзæрд»-мæ дæр ерысдзау лæппутæ хорз бацæттæ кодтой. Ацы хатт дæр та йæхи уæлдай арæхстджындæрæй равдыста Гæбуты Алан. Куыд загъта, афтæмæй Гæбутæ равзæрдысты Ос-Бæгъатырæй. Мыггаджы мæсыг ис Дагомы æмæ бæрзондæй фæлгæсы йæ алыварс хæхбæстыл. Дарддæр Алан мониторыл равдыста Гæбуты хæдзары æмæ мыггаджы хистæрты къамтæ. Мыггагæн, дам, стыр кад скодтой партийы Æрыдоны райкомы раздæры секретарь Гæбуты Эльбрус, Цæгат Ирыстоны адæмон артисткæ Гæбуты Жаннæ æмæ иннæтæ.

Гаглойты стыр мыггаджы тыххæй та радзырдта Мурат. Мидисджын уыдис Дзитойты Алыксандры раныхас дæр йæ мыггаджы тыххæй, æмæ хæслæвæрдæн лæппутæ цы дзуаппытæ радтой, уымæ гæсгæ сын æркаст-конкурсы жюрийы уæнгты бæрæггæнæнтæ æппæтæй дæр уыдысты фондзтæ.

Нæ фыдæлтæ, хæхбæсты цæргæйæ, цы кусæнгæрзтæй пайда кодтой, уый тыххæй дæр ерысдзау лæппутæ хорз радзырдтой. Гæбуты Алан æркаст-конкурсмæ æрбахаста уæрдон æмæ дзоныгъы макеттæ, Тотойты Георги — фыдис, Дзитойты Алыксандр — фæрæт, Хъулаты Сослан — дзылар, Гаглойты Мурат — цæвæг, Гаглойты Марат — хъæсдарæг. Æмæ сæ алчидæр бæлвырд радзырдта, нæ фыдæлтæ сæ цавæр куыстытæ æмæ хъуыддæгты пайда кодтой, уый тыххæй.

Æркаст-конкурсы архайджытæн фæстаг хæслæвæрд уыдис аивадон фæлварæн. Лæппутæ сæ тыхтæ фæлвæрдтой кафынæй, зарынæй, аив ныхас кæнынæй. Иннæ хæслæвæрдты куыд уыдис, афтæ та ныр дæр Гæбуты Алан равдыста стыр арæхстдзинад. Уый аив æмæ зæрдæмæдзæугæ бакаст «Къостайы монолог». Фæлæ иннæ ерысдзау лæппутæй кæцыдæртæ фаг цæттæгонд не ‘рцыдысты æркаст-конкурсмæ. Хицæн хæслæвæрдтæн дзуаппытæ дæтгæйæ, сæхи равдыстой лæмæгъæй, æмæ-иу сын æркаст-конкурсы жюрийы уæнгтæ радтой æппæты ныллæгдæр бæрæггæнæнтæ — æртæтæ. Уымæ гæсгæ ма радон ахæм æркаст-конкурс куы уа, уæд ирон æвзаг æмæ литературæйы ахуыргæнджыты уымæ хуыздæр бацæттæ кæнын хъæудзæн сæ хъомылгæнинæгты.

Ныр та уал Байсонгъуырты Мухтар фехъусын кодта æркаст-конкурсы бæрæггæнæнтæ. Æртыккаг бынат бацахста Нартыхъæуы астæуккаг скъолайы ахуырдзау Гаглойты Мурат. Йæ ахуыргæнæг Дулаты Маринæимæ сын лæвæрд æрцыд фæйнæ 3 мин сомы. Дыккаг бынатмæ рацыд Къостайыхъæуы скъолайы ахуырдзау Хъулаты Сослан. Йæ ахуыргæнæг Цхуырбаты Зарæимæ райстой фæндзгай мин сомтæ. Фыццаг бынат бацахста Æрыдоны фыццæгæм астæуккаг скъолайы ахуырдзау Гæбуты Алан. Йæ ахуыргæнæг Лохты Ритæимæ сын лæвæрд æрцыд фæйнæ авд мин сомы.

Уымæй уæлдай, Æрыдоны районы ирон æвзаг æмæ литературæйы ахуыргæнджыты стыр къордæн лæвæрд æрцыд Цæгат Ирыстоны республикон æхсæнадон змæлд «Иудзинад»-ы Кады гæххæттытæ.

ТОХСЫРТЫ Къоста Авторы ист къам

 

ОСТАВЬТЕ ОТВЕТ

Please enter your comment!
Please enter your name here