Сидзæр сывæллæттæн — ног фадæттæ

0
18

 

Дыгуры районы Дур-Дуры сидзæр сывæллæтты хæдзар-интернаты бирæ азты дæргъы нæ уыдис нывыл фадæттæ æмæ уавæртæ ахуырадæн. Æмæ дæргъвæтин рæстæджы фæстæ сывæллæттæн сæ цард хорзæрдæм аивта. Цалдæр азы размæ, бæлвырддæрæй та — дыууæ азы размæ ног азы бæрæгбоны фæдыл, лæвæрттæ æмæ арфæтимæ ацы «мæгуыр» æмæ адæмæй «рох» хæдзармæ æрцыд нæ республикæйы Сæргълæууæг БИТАРТЫ Вячеслав. Куы федта цардæй æмæ хъысмæтæй æфхæрд мæгуыр сывæллæтты уавæртæ, уæд æвæстиатæй бафæдзæхста, уыцы аз РЦИ-Аланийы арæзтад æмæ архитектурæйы министр ИКЪАТЫ Русланбегæн, цæмæй куыд тагъддæр, афтæ хæдзар-интернат цалцæггонд æрцæуа. Сывæллæттæ къухæй ми кæнынмæ тынг арæхсынц, курдиатджын сты. Фæлæ сын хуымæтæг кълæстæй уæлдай нырыккон сфæлдыстадон куыстытæн фадæттæ нæ уыд. Битарты Вячеслав Сæргълæууæджы фæстауæрцы фондæй радих кодта 400 000 сомы æхца, цæмæй интернаты байгом кæной сывæллæттæн ахуыргæнæн æрмадзтæ. Æппæт ацы хъуыддæгтæ æххæстгонд æрцыдысты æмæ ивгъуыд октябры мæй сывæллæттæн фæллойы ахуыртæ райдыдтой чысыл æндадзæн æмæ хуыйæн цехты

 

— Æндадзæн æрмадзы агъуысты æппындæр ницы уыдис, гом къултæ æмæ царæй уæлдай, — загъта интернаты директоры хæдивæг Бериты Виктор. — Нæ республикæйы Сæргълæууæг нын æппæт уавæртæ дæр сарæзта æмæ ныр нæ хъомылгæнинæгтæн фадат ис сæ дарддæры царды фæндагмæ сæхи «барæвдз» кæнынæн. Ам цы зонындзинæдтæ райсой, уыдон сын дарддæр стыр ахъаз фæуыдзысты училищейы.

Чызджытæ хуыйыныл ахуыр кæнынц. Хуыйæн машинæтæ сын нæ уыд, уæддæр сæхи къухтæй хуыдтой, карстой. Ис дзы хи хуытæдарæн чысыл хæдзарад, цæхæрадон, халсартæ кæм æрзайын кæнынц, ахæм зæххы гæппæл. Фæткъуыты дыргъдон ныссадзынæн сын баххуыс кодта нæ республикæйы мидхъуыддæгты министр Михаил Скоков. Ауды сыл Фæрниаты Тельмæн дæр.

Знон интернаты ног уавæртæ бабæрæг кодта нæ республикæйы ахуырад æмæ наукæйы министры хæстæ рæстæгмæ æххæстгæнæг Людмилæ Башарина. Интернаты директор Мæхæмæтты Галинæ куыд радзырдта, афтæмæй сидзæр сывæллæтты уавæртæ дзуапп дæттынц нырыккон ахуырады домæнтæн.

— Битарты Вячеслав нын нæ мæгуырдзинад куы федта, уыцы бонæй фæстæмæ нæ «цард» хуыздæрæрдæм аивта. Сцалцæг кодтой бæстыхæй. Æппæт агъуыстытæ дæр ифтонг сты хъæугæ æрмæг æмæ дзаумайæ, — загъта Мæхæмæтты Галинæ.

Людмилæ Башарина журналисттæн радзырдта, нæ республикæйы Сæргълæууæг сидзæр сывæллæтты хæдзæрттæм бæлвырд йæ цæст кæй дары, уый тыххæй.

— Национ проект «Ахуырад»-ы бындурыл ацы аз цалцæггонд æрцыд «Хуры тын»-ы бæстыхай дæр. Кусдзыстæм, хъусæй лæмæгъ чи хъусы, уыцы сывæллæтты интернат сцалцæг кæныныл дæр. Æнæмæнг хъуыддаг у сывæллæтты фæллойыл ахуыр кæнын. Хуымæтæг дæсныйæдтыл сæ рагацау уымæн ахуыр кæнæм, цæмæй сын дарддæр царды æнцондæр уа сæхи «ссарынæн», — загъта министр.

Дур-Дуры интернаты æдæппæт ис 53 сывæллоны, æнæ ныййарджытæй чи баззад, кæнæ та ныййарæджы бартæй цухгонд чи æрцыд закъоны бындурыл, ахæм ныййарджыты сывæллæттæ. Интернаты кусджытæ, директорæй райдай æмæ æфснайæгæй фæу, иууылдæр сæ хи хъæбултау рæвдауынц. Сæ мæгуырдзинад уынгæйæ, йæ риуы зæрдæ кæмæн ис, уыцы адæймаг æндæрхуызон нæ базондзæн семæ. Ног уавæртыл та канд сывæллæттæ нæ, фæлæ ахуыргæнджытæ дæр цин кæнынц.

САУТÆТЫ Тамилæ

 

ОСТАВЬТЕ ОТВЕТ

Please enter your comment!
Please enter your name here