Завод «Электроцинчы» дарддæры куысты тыххæй

0
33

 

РЦИ-Аланийы Парламенты депутат, Завод «Электоцинчы» дарддæры куысты фарстатæ æвзарæг къамисы социалон-экономикон къорды разамонæг УАТАТЫ Зелим нæ курдиатмæ гæсгæ зæгъы йæ хъуыдытæ, цы саразæн ис, цæмæй ацы зианхæссæг завод йæ куыстæй æрлæууа, кæнæ рацарæзт æрцæуа, æмæ адæм сæ риуы дзаг сулæфой, уый тыххæй.

— Бæлвырд у, ацы уæззау фарста иу, дыууæ æмæ суанг сæдæ адæймагæй аразгæ дæр кæй нæ у, уый. Мах, Парламенты депутаттæ, адæмы æвзæрст стæм, уымæ гæсгæ сæ фарсмæ æрбалæууыдыстæм.

Республикæйы Сæргълæууæг Битарты Вячеслав адæмимæ иузæрдион уæвгæйæ, йæ бон цас у, уыйбæрц архайы, фæлæ уый дæр фаг нæу. Завод цы закъонхæлдтытæ æруагъта, уый тыххæй тæрхондонмæ лæвæрд æрцыд, нæ къамис фæсидт «Роспотребнадзор»-ы республикон службæмæ, мæхæдæг уыдтæн Промышленнон районы тæрхондоны тæрхонгæнæгмæ, фыстæджытæ арвыстон сæрмагонд инстанцитæм, абон дæр сæ рæстмæ дзуапп нæ райстон.

Хъæуы æндæр мадзæлттыл ахъуыды кæнын. Завод кæй у, уый æнæуынгæйæ, мах нæхимидæг йемæ тох кæнæм. Хуыздæр уаид, йæхи йын фенын, лæгæй-лæгмæ йемæ комкоммæ аныхас кæнын, фæсаууонмæ нæ, фæлæ. Мæнмæ гæсгæ та нæ хъæуы сæрмагонд делегаци бацæттæ кæнын Ирыстоны разагъды лæгтæй, æмæ фембæлын Урайлаг холдинджы президент Искандер Махмудовимæ, уымæн æмæ хъуыддаг аскъуыддзаг кæнын æрмæст уый бон у. Хъуамæ дзуапп ратта Ирыстоны æвзæрст лæгтæн. Бамбарын ын кæнæм нæ регионы экологион уавæр заводы аххосæй тынг æвзæр кæй у, заводы архайдæй адæммæ алыхуызон æвзæр низтæ кæй фæзынд. Уый дæр адæймаг куы у, уæд нæ куыд нæ бамбардзæн. Саразæд дзы æндæр завод, пайдайаг чи уа, нæ республикæйы цæрджыты æнæниздзинад кæмæй нæ цуда.

Делегацийы уæнгтæм та, æнæмæнг, бахæссын хъæуы, сæ хорз хъуыддæгтæй æнæхъæн дунейыл кæй ном айхъуыст, уыдоны: Гергиты Валерийы, Калоты Виталийы, Боллоты Таймуразы, Таймазты Артуры æмæ, адæм сæхæдæг кæй равзарой, уыдоны.

Арфæйы ныхæстæ мæ зæгъын фæнды, заводы зынгсирвæзты рæстæг фæдисонæй цы зынгхуыссынгæнджытæ архайдтой, æмæ нæм Прохладныйæ æххуысмæ цы сæрмагонд поезд ссыд, уыдонæн. Хъыгагæн, зынгхуыссынгæнджытæй иу, Александр Ермаков фæмард (рухсаг уæд). 22 октябры Хицауады хæдзары раз «Электроцинк» сæхгæныны тыххæй цы адæм æрæмбырд, уыдонæн та мæ зæгъын фæнды стыр бузныг, Хицауадимæ æргом ныхасы иу хъуыдымæ кæй æрцыдыстæм, уый тыххæй. Ацы ныхæстæ загътон Парламенты æмбырды дæр æмæ ма сæ ноджыдæр зæгъдзынæн. Республикæйы цæрджытæ стыр æххуыс фесты, мах цы фарстатыл тох кодтам, уыдонæн.

Завод «Электоцинчы» дарддæры куысты фарстатæ æвзарæг къамис дихгонд æрцыд æхсæз къордыл. Алкæй размæ дæр сæ ис сæрмагонд хæстæ æвæрд. Арæзт æрцыд республикæйы дзыллон хабархæссæг фæрæзты минæвæрттæй дæр сæрмагонд къорд.

Мæн уырны, Урайлаг холдинджы президент Искандер Махмудовимæ фембæлд æмæ зæрдиаг ныхас хорзæрдæм кæй сахаддзысты нæ нысан сæххæст кæныныл.

Ныхас ныффыста ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here