Наркотиктæ парахатгæнджытимæ тох кæнын хъæуы æнауæрдонæй

0
13

 

РЦИ-Аланийы наркотикты ныхмæ арæзт къамисы æмбырды, йæ сæрдар — республикæйы Сæргълæууæг БИТАРТЫ Вячеславы разамындæй æркастысты, адæмæн, уæлдайдæр та фæсивæдæн, стыр фыдбылыз цы алыхуызон хъылматæ хæссынц æмæ уыдоны ныхмæ архайд куыд арæзт цæуы республикæйы, цавæр мадзæлттæ аразын хъæуы йæ фæхуыздæр кæнынæн, уыцы фарстатæм.

Республикæйы уыцы хъылмайы ныхмæ тохы скъоладзаутæ æмæ профессионалон ахуыргæнæндæтты рæзгæ фæлтæримæ уæлæмхасæн ахуыртæ, лæвар спортивон секцитæ æмæ сфæлдыстадон къордты фæрцы профилактикон куыст куыд цæуы, уый фæдыл æмбырды раныхас кодтой: РЦИ-Аланийы ахуырад æмæ наукæйы министры хæстæ рæстæгмæ æххæстгæнæг Людмилæ Башарина, республикæйы физикон культурæ æмæ спорты министр Гæбулаты Владимир æмæ Цæгат Ирыстоны регионалон æхсæнадон организаци «Æфсæддонпатриотон клуб «АС-Алани»-йы разамонæг Дзитойты Артур.

Докладгæнджытæ бæлвырд æмæ бæстон радзырдтой, разамынд цы организацитæн дæттынц, уымыты, наркотикты ныхмæ архайд куыд æвæрд у æмæ рæзгæ фæсивæды тæссаг хъылмайæ бахъахъхъæнынæн цы мадзæлттæ аразынц, уыдоны тыххæй.

Республикæйы ахуыргæнæндæтты, уыдонимæ, уæлдæр скъолаты дæр ахуырдзаутæ æмæ студенттæ наркотиктимæ баст кæй не сты, уый тыххæй анализтæ чи радта, уыдоны нымæц фæстаг рæстæг зынгæ фæфылдæр, республикæйы лæвар сфæлдыстадон къордтæ æмæ спортивон секцитæ кæй фæфылдæр сты, фæсивæдимæ патриотон хъомыладон куыст кæй фæхуыздæр, уæлдайдæр та регионалон æхсæнадон организаци «Æфсæддон-патриотон клуб «Ас-Алани»-йы æрдыгæй, уый хорзæрдæм зыны хъылмайы ныхмæ профилактикон куыстыл.

Фæлæ Битарты Вячеслав куыд бацамыдта, афтæмæй архайд æвдисын хъæуы ноджы бæлвырддæр хъуыддæгтæй. Æнгомдæр кусын хъæуы барадхъахъхъæнæг оргæнтимæ, иудадзыг аразын хъæуы рейдтæ афтектыл, бæрæг æмæ æргом кæнын хъæуы наркотиктæ чи парахат кæны, адæмы цæссыгтæй сæхицæн æхцатæ чи кусы, уыцы хъылмауæйгæнджыты æмæ хъуамæ æййафой карз æфхæрд.

Битарты Вячеслав республикæйы физикон культурæ æмæ спорты министр Гæбулаты Владимирæн бафæдзæхста, цæмæй спорты иугонд командæтæй допингы ныхмæ бæрæггæнæнтæ чи нæ радта, уыдонæн финансон æххуыс мауал уæд, зæгъгæ. Республикæйы разамынды кусджытæ се ‘ппæт дæр куы радтой ахæм бæрæггæнæнтæ, уæд спортсментæ цæуыннæ хъуамæ радтой. Республикæйы фæсивæдимæ æнæниздзинад фидар кæныны тыххæй æмæ сæ алы хъылмахостæй бахизыны тыххæй цы куыст цæуы, уый тыххæй раныхас кодтой РЦИ-Аланийы фæсивæдон парламенты сæрдар Биджелты Бертæ æмæ фæсивæды хъуыддæгты комитеты сæрдар Бекъойты Аслан.

Къамисы уæнгтæ ма æркастысты, наркотиктæ цы зайæгойтæм хæццæ кæны, уыдон куыд куынæггонд цæуынц, цæмæй фæсивæдмæ ма хæццæ кæной, уый тыххæй цы мадзæлттæ арæзт цæуы, уыцы фарстатæм.

Къамисы уæнгтæ скодтой бæлвырд хатдзæгтæ ивгъуыд азы архайдæй æмæ снысан кодтой 2019 азмæ ахадгæдæр мадзæлттæ.

КАСАТЫ Батрадз Къамтæ систа ЦÆГÆРАТЫ Дауыт

ОСТАВЬТЕ ОТВЕТ

Please enter your comment!
Please enter your name here