Цыртдзæвæн — Пипойæн

0
25

 

Нæ газеткæсджытæ æнæзонгæ нæ уыдзысты, Гуырцъыты мыггаджы курдиатмæ гæсгæ Цæгат Ирыстоны республикон æхсæнадон змæлд «Иудзинад» ацы азы райдайæнæй фæстæмæ сфæлдыстадон конкурс кæй расидт ирон адæмы хъæбатыр Гуырцъыты Пипойæн цыртдзæвæнæн хуыздæр эскизон проект саразыныл, уый. Республикæйы нывгæнджытæ, скульптортæ, архитектортæ ацы хъæппæрисмæ акастысты сфæлдыстадон цæстæй æмæ сæхицæн хæсыл банымадтой конкурсы архайын. Уымæн æмæ Гуырцъыты Пипо 1892 азы цы æнæмæлгæ хъæбатырдзинад равдыста, уый у сæнусон кæныны аккаг.

Уæд æвирхъау хæцгæ низ сыстад Ирыхъæуы цæрджытыл. Адæм æнæхъæн бинонтæй рынчын кодтой æмæ æмхуызонæй мардысты. Уæды статистикæйы бæрæггæнæнтæм гæсгæ æдæппæт фæрынчын 4852 адæймаджы æмæ дзы 1405 сæ адзал ссардтой.

Ахæм тыхст заман Ирыхъæуы кадджындæр лæгтæй иу — Гуырцъыты Пипо хæдзари-хæдзар зылди хъæуыл, йæ цæст дардта тыхст рынчынтæм, сабыр сæ кодта, хионтæ æмæ къабæзтимæ Хуыцаумæ куывта, цæмæй сæ æгъатыр рынæй фервæзын кæна.

Фæстæдæр Ирыхъæуы цæрджытæ Пипойы хъæппæрисæй куывд скодтой Хуыцауы дзуары номыл, кувгæ та кодтой, къусбарæй æмбырдгонд хъæбæрхорæй нæлгоймæгтæ цы бæгæны сфыхтой, уымæй. Алчидæр Стыр Хуыцауæй куырдта æнæниздзинад, куывтой, цæмæй адæмы чи цагъта, уыцы рын ныссабыр уа. Æцæгдæр, дыккаг бон рын æрбайсæфт. Уыцы бонæй фæстæмæ Ирыхъæуы ничиуал амард, стæй низ дæр никæуыл бахæцыд. Адæм фервæзтысты мæлæтхæссæг рынæй. Фæлæ Гуырцъыты Пипо йæхæдæг та амард куывды бон изæрæй. Иу ныхасæй, уый йæ цард нывондæн æрхаста, цæмæй йе ‘мзæххонтæ рынæй фервæзтаиккой, æмæ абон дæр йæ хъæбатырдзинад рох нæу Ирыхъæуы цæрджытæй. Сфæлдыстадон конкурсы цы скульптортæ архайдтой, уыдон Гуырцъыты Пипойы цыртдзæвæнæн бацæттæ кодтой 13 эскизон проекты. Цæгат Ирыстоны республикон æхсæнадон змæлд «Иудзинад»-ы советы уæнгтæ дзы равзæрстой æртæ хуыздæр куысты, æмæ сæм дарддæр æркæсыны тыххæй бавдыстой Дзæуджыхъæуы хиуынаффæйады бынæттон администрацимæ.

Æрæджы горæты сæргълæууæджы фыццаг хæдивæг Фæрниаты Тамерлан куыд фехъусын кодта, афтæмæй эскизон проекттæм каст æрцыд горæтаразæн советы кусæг къорды æмбырды æмæ хуыздæрыл нымад æрцыд Уæрæсейы Федерацийы сгуыхт нывгæнæг Дзукъаты Никъалайы эскизон проект. Гуырцъыты Пипойы цыртдзæвæн æвæрд æрцæудзæн, Дзæуджыхъæуы Кутузовы æмæ Винограднойы уынгтæ кæм баиу вæййынц, уыцы скверы.

Конкурсы уæлахиздзау Дзукъаты Никъалайы тыххæй куы зæгъæм, уæд уый у бирæ сфæлдыстадон куыстыты автор. Цыртдзæвæнтæ сарæзта Гуырдзыбегты Бласкайæн (Национ библиотекæмæ бацæуыны), Касаты Хъазыбегæн (Намысы аллейы), Абайты Васойæн (Цхинвалы), Къостайæн (Дзауы), æндæр зындгонд адæймæгтæн, Уастырджийæн та — Мæздæджы. Куыд радзырдта, афтæмæй ныртæккæ куыст цæуы Гуырцъыты Пипойы цыртдзæвæны арæзтадыл, йæ архитектор у Уæрæсейы Федерацийы сгуыхт архитектор Кодзырты Руслан.

ТОХСЫРТЫ Къоста

ОСТАВЬТЕ ОТВЕТ

Please enter your comment!
Please enter your name here