Зæрдæйæ-зæрдæмæ ныхас

0
31

 

РЦИ-Аланийы Парламенты Сæрдар Алексей МАЧНЕВ æмæ йæ хæдивæг ГУТНАТЫ Аслæнбег Хицауады хæдзары фембæлдысты нæ республикæйы алы районтæй бирæсывæллонджын мадæлтимæ, сæрмагондæй медицинæйы чи фæллой кæны, ахæм сылгоймæгтимæ. Фембæлды рауадис зæрдæйæ-зæрдæмæ ныхас хуымæтæг æмæ вазыгджын фарстатыл. Алексей Мачнев арфæтæ ракодта сылгоймæгтæн ивгъуыд бæрæгбон — Мады боны фæдыл. Уый загъта:

— Абон нæ Хицауады хæдзар тынгдæр ныррухс ис уæ уындæй. Сылгоймаг цардаразæг у, амондхæссæг. Дзырд «мад»-æй рæсугъддæр, хъармдæр æмæ уарзондæр ныхас дзырдуаты дæр нæй. Царды цæрын æнцон никуы уыд, никæцы дуджы, фæлæ дæ фарсмæ дæ ныййарæг мад куы уа,уæд никæцы зынтæ сты адæймагæн уæззау. Мады стырдæр амонд йæ хъæбулы æнæниздзинад у, йæ бæллиццаг рæсугъд фидæн, æмæ сымах архайут уыцы æнæниздзинадыл дæр. Дывæр хæстæ æвæрд уыл ис: уæ сывæллæтты дæр хъомыл кæнут, бахъуаджы сахат рынчынмæ дæр æххуысмæ тагъд кæнут. Ацы аз нæ бæстæйы Хицауад расидт сæрмагонд программæ «Сабидуджы дæсазон». Программæйы нысантæ æххæстгонд цæудзысты 2027 азмæ. Уымæ гæсгæ, Уæрæсейы æппæт субъектты дæр сывæллæтты æнæниздзинадмæ лæмбынæгдæр каст цæудзæн. — Нæ раздæры паддзахад Советон Цæдисы стыр æргом здæхт цыд æрыгон бинонты цардмæ, фадæттæ, уавæртæ сын арæзтой, цæмæй сывæллæтты нымæц фылдæр кодтаид, уый тыххæй. Абон дæр уыцы фарста ахсджиаг у, æмæ йыл архайдзыстæм, зæрдæ бавæрдта Парламенты Сæрдар.

Гутнаты Аслæнбег дæр арфæ ракодта сылгоймæгтæн æмæ радзырдта, мады номæн табу кæныны æгъдау нын нæ рагфыдæлтæй кæй баззад. — Мæхи мадыл 88 азы цæуы, уæддæр махмæ, йæ цотмæ, чысыл сабиты æвзагæй фæдзуры. Æз сывæллæтты дохтыр дæн. Бирæ зындзинæдтæ федтон рынчындоны уæззау низты ахæст сабитимæ æмæ мæнæй хуыздæр чи æмбары, хъæбулы æнæниздзинады сæраппонд ныййарæг мад йæхи цард дæр кæй ратдзæн, уый. Мадæн абарæн никæимæ ис. Фæнды мæ, цæмæй алы ныййарæг мадæн дæр йæ сывæллæттæ æнæниз æмæ амондджын уой, — загъта Гутнаты Аслæнбег.

Алексей Мачнев сылгоймæгты схорзæхджын кодта РЦИ-Аланийы Парламенты Кады гæххæттытæ æмæ Арфæйы фыстæджытæй. Ракодта сын лæвæрттæ дæр.

САУТÆТЫ Тамилæ

 

ОСТАВЬТЕ ОТВЕТ

Please enter your comment!
Please enter your name here