5 декабрь – Бархионты бон

0
36

 

Сæ куыст арфæйаг

 

Куыд æй зонæм, афтæмæй фарон, 27 декабры, нæ бæстæйы Президент Владимир Путин Иугонд Нациты Организаци-ы Генералон Ассамблейы,  1985 азы 17 декабры хаст резалюцийы бындурыл бафыста бардзырд,  цæмæй 5 декабр бархионты бон  бæрæг кæнын райдайой Уæрæсейы дæр.

Кæд ацы бæрæгбон уæрæсейæгтæн хæрзæрыгон у, уæддæр бархионты истори у рагон æмæ бирæвæрсыг. Уæвгæ, адæмæн хæрзты бацæуынвæнд чи фæкæны, уыдоны уæлдай бонтæ хъæугæ дæр нæ кæнынц. Уый тыххæй ирон адæммæ баззад æмбисонд дæр: «Зæрдæйæ цы цæуы, зæрдæмæ дæр уый цæуы», кæнæ «Хорз ракæн æмæ йæ ферох кæн». Ацы хъуыдытæ хуымæтæг не сты, алкæй бындуры дæр сæ æвæрд ис арф философон хъуыды. Уымæн æмæ хорз ракæныны миниуæг алы адæймаджы уды нæй.

Нæ республикæйы кой куы кæнæм, уæд хæрзаудджытæй, бархионтæй стæм æххæст. Сæ фылдæр сты æрыгон фæлтæры минæвæрдтæ. Æрвылбон сæ рæзгæ удтæй арт цæгъдынц, архайынц цæмæй сæ амфамбылай цы æххуысхъуаг адæм ис, уыдонæн исты æххуыс бакæной. Ахæм, дæнцæгæн æрхæссæн кæй ис, æрмæст нæ республикæйы æмæ Уæрæсейы нæ, фæлæ ма фæсарæнты дæр кæй ном æмæ куыст зонынц, уыцы хæрзаудæн фонд «Быть Добру»-йы бархионтæ, сæ  сæргъы Хъуысаты Амырхан, афтæмæй. Адонæй бирæтæ  кæд нырма скъоладзаутæ сты, уæддæр сæ удысконд ныридæгæн у ас адæймаджы удау. Сæ куыст адæмæн хæссы æрмæст циндзинад нæ, фæлæ ма цард дæр.

Уæдæ куыд нæ хъуамæ зæгъæм, уынгты цы æрыгон фæсивæд фæзилы æмæ куыйтæн, гæдытæн чи хæрын кæны, уыдоны тыххæй. О, чи зоны æмæ исчи зæгъа, фæлтау адæмæн куы хæрын кæниккой, зæгъгæ, фæлæ афтæ йæ бон ахъуыды кæнын у æрмæстдæр дурзæрдæ адæймагæн.

Уæдæ ныридæгæн æртæ азы дæргъы, уалдзæгæй æрæгвæззæгмæ мæйы фæстаг сабаты уынгтæ æфснайынмæ цы дзыллæтæ рацæуы, уыдон куыд нæ ис схонæн патриоттæ æмæ бархионтæ. Стыр патриоттæ уымæй сты,  æмæ сæхицæй дарддæр уынынц иннæты дæр, фæнды сæ,  цæмæй нæ иумæйаг хæдзар-Ирыстон уа сыгъдæг, хъарм æмæ райдзаст.

Æвæццæгæн æмæ адæймаг йæ царды  хорздзинад кæнынмæ куы нæ  тырна,  уæд йæ цард хуымæтæг зайæгойы цардæй уæлдай нæу. Кæрдæг дæр æрзайы æмæ бахус вæййы.

Хъуысаты Амырханы куы бафарстон, цы дын у бархионы куыст, зæгъгæ, уæд афтæ загъта:

— Бархионы куыст ныридæгæн у мæ цард. Раст куы зæгъон, уæд æй æмбаргæ дæр нæ кæнын, куыд уыдаид мæ цард æнæ мæ ацы куыстæй. Уæвгæ,  уый æрмæст  мæ куыст нæу. Хуыцауы фæрцы  стæм дзæвгар. Иумæ та стæм æнусон гæнахæй фидардæр!

 

 

 

ОСТАВЬТЕ ОТВЕТ

Please enter your comment!
Please enter your name here