Дæсны хæринаггæнæг

0
19

 

«Ирыстоны сабитæн балæггад кæнын æппæт коллективæй дæр нымайæм не стыр хæсыл», — зæгъы республикæйы сывæллæтты реабилитацион центр «Тæмисчъы» хæринаггæнæг ДЖЫККАЙТЫ-ОЛЫСАТЫ Ритæ.

Алы райсом, 6 сахатæй суанг æнафонтæм, Ритæ æмæ йе ‘мкусджытæ вæййынц къæбицы. Иуварсæй кæсгæйæ, ацы куысты зынæй ницы ис, фæлæ фæлтæрдджын хæринаггæнæг ацы хъуыдыимæ разы нæу.

Ритæ куыд зæгъы, афтæмæй стыр бæрнондзинад домы адæймагæй, фылдæр хæстæ йыл æвæры, уымæн æмæ хæринаг сывæллæттæн кæны. Уыдонæй бирæтæн се ‘нæниздзинадмæ гæсгæ саразынц хицæн хæринæгтæ. Дæнцæгæн æрхаста, иу чызгæн, дохтыры амындмæ гæсгæ мæнæуы ссадæй конд дзул хæрæн нæ уыд æмæ йын къæбицы кусджытæ æмбæлгæ хуыссæйæ фыхтой дзул.

— Хæрзад æмæ пайдайаг хæринаг, æнæмæнг, кæнын хъæуы зæрдæрайæ, истæуыл мæсты куы уай, кæнæ та æнкъард, уæд уый фæзындзæн хойраджы адыл дæр. Уарзын мæ куыст, разы дæн мæ коллективæй. Дæсны кусджытæ сты Дзбойты Анжелæ, Гаглойты Маринæ, Дзантиаты Томæ, Хъараты Маринæ, Мурасты Аланæ æмæ иннæтæ. Æрвылбон хæринаг кæнынц 165 адæймагæн, сæрды мæйты та ноджы фылдæр вæййынц сæ уазджытæ. Æппæт домæнтæм гæсгæ, алы боны меню цæттæ кæны дæсны дохтыр-диетолог Æгъуызарты-Лолаты Аллæ. Сывæллæттæн сæ фынгтыл вæййы æхсыры продукттæ, дзидза, кæсаг, дыргътæ æмæ халсартæ, адджын гуылтæ, фыр буцæй ма сын ирон чъиритæ дæр скæнæм.

— Хорз кусынæн нын ис æппæт уавæртæ, хæрæндоны къæбиц æххæст у æппæт хъæугæ ифтонггарзæй, уый тыххæй бузныг стæм нæ директор Цæгæраты Зæринæйæ. Архайæм, цæмæй нæ конд хæринаг сабитæн уа зæрдæмæдзæугæ, хæрзад æмæ хæрзхъæд, алы витаминтæй æххæст. Медицинон процедурæтимæ иумæ рæзгæ удæн уый хъуамæ æвдадзы хос уа,— зæгъы Ритæ.

Æхсызгон куыд нæ вæййы хæринаггæнджытæн, сывæллæттæй, кæнæ сæ ныййарджытæй арфæйы ныхæстæ фехъусын. Дæ фыдæбонæн адæм аргъ куы кæной, уæд уымæй хуыздæр ницы ис.

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here