Фæсивæды наукон ерыстæ

0
26

 

Цæгат Ирыстоны ацыд æрыгон иртасджыты 20-æм республикон наукон конкурс «Шаг в будущее Осетии». Ацы аз конкурс сарæзтой номдзыд уырыссаг ахуыргонд Дмитрий Иваны фырт Менделеевы райгуырды 185 азы æмæ периодон закъоны бавдысты 150 азы кадæн.

Амæй размæ куыд уыд, афтæ ацы хатт дæр Цæгат Кавказы хæххон-металлургон институты бындурыл ацæуæг конкурсы архайæг 120 скъоладзауы æмæ студенты сæ проекттæ бавдыстой физикæйы, химийы, математикæйы, информатикæйы, биотехнологийы, дизайн æмæ æндæр номинациты. Хицæн номинациты раззаг бынæттæ бацахсæг скъоладзаутæ æмæ студенттæ хорзæхджын æрцыдысты РЦИ-Аланийы Ахуырад æмæ наукæйы министрады дипломтæй, майдантæ æмæ зынаргъ лæвæрттæй.

Конкурс нымад у наукон фæсивæды æппæтуæрæсеон форум «Шаг в будущее»-йы регионалон хайыл. Республикæйы территорийыл программæ æххæст кæнын куы райдыдтой, уæдæй нырмæ наукон конференциты архайдтой 50 ахуыргæнæндонæй æртæ мин скъоладзауы æмæ студентæй фылдæр. Ахуырадон-иртасæн архайды æнтыстдзинæдтæ æвдисгæйæ, наукæйы æмæ ахуырады ногдзинæдтæ кæй къухы æфтдзысты, республикæйы скъоладзаутæ ахæм разагъды фæсивæды фæзындæн ахъаз кæнынц.

Наукон-социалон программæ «Шаг в будущее» арæзт æрцыд 1991 аз Мæскуыйы Н.Бауманы номыл паддзахадон техникон университет кастфæуæг адæмы фæндонæй. Дунейы ахуырадон æхсæнад æй Сколковойы æмрæнхъ нымайы Уæрæсейы æппæтæй кадджындæр наукон программæтæй иуыл. Ацы æппæтнацион змæлды архайынц 150 мин скъоладзауæй, студенттæ æмæ æрыгон ахуыргондæй фылдæр.

Æрвылаз æппæтуæрæсеон программæ «Шаг в будущее» аразы Тайваны, АИШ-ы, Европæйы, Лондоны дунеон фæсивæдон наукон æмбырдтæ æмæ Европæйаг Цæдисы æрыгон ахуыргæндты ерыстæ æмæ равдыстыты архайынæн фæсивæды национ делегацитæ.

 

ОСТАВЬТЕ ОТВЕТ

Please enter your comment!
Please enter your name here