Инвестицион проекттæн Цæгат Ирыстоны æппæт фадæттæ дæр ис

0
23

 

РЦИ-Аланийы Сæргълæууæг БИТАРТЫ Вячеслав фембæлд Волжскаг техникон завод «Луч»-ы генералон директор Константин ЛАЗАРЕВИМÆ, заводы бындурæвæрджытæ Николай æмæ Виктор ЖИДОВИМÆ æмæ разамынддæттæг æмкусæг ХУЫБАТЫ Тимуримæ. Фембæлды рæстæг æрныхас кодтой Цæгат Ирыстоны нырыккон промышленнон фæзуæттæ саразыны нысантыл. Ныхасы ма архайдтой республикæйы Хицауады Сæрдар ТУСКЪАТЫ Таймураз, йæ хæдивджытæ ИКЪАТЫ Русланбег æмæ ДЗАНАЙТЫ Барис, промышленность æмæ транспорты министр Хайдарбек БУТОВ.

Уазджытæн арфæ ракæнгæйæ, нæ республикæйы разамонæг куыд загъта, афтæмæй хицаудзинады сæйрагдæр хæс у инвестортæн зæрдæмæдзæугæ уавæртæ саразын. Уый фæстæ Битарты Вячеслав амалхъомтæн бузныг загъта, Цæгат Ирыстонмæ се ‘ргом кæй раздæхтой, уый тыххæй. «Бузныг, уæ фæрæзтæ нæ республикæйы рæзты бавæрын кæй хъавут, уый тыххæй. Ахæм фембæлдтыты фæстæ, æнæмæнг, бамбардзыстут, Цæгат Ирыстоны инвестицион проекттæ аразынæн æппæт фадæттæ дæр кæй ис, уый. Махæн æхсызгон уыдзæн, уе ‘ххуысæй нæм ног куыстадтæ æмæ куысты бынæттæ куы фæзына, уый. Уыцы хъуыддаг нын у тынг ахсджиаг æмæ цæттæ стæм æххуысмæ», — бафиппайдта республикæйы Сæргълæууæг.

Завод «Луч»-ы генералон директор Константин Лазарев бузныг загъта Цæгат Ирыстоны разамонæгæн ацы фембæлды тыххæй. Уымæй дарддæр, Волжскаг завод Цæгат Ирыстоны цы проекттæ сæххæст кæнынмæ хъавы, уыцы пълантыл æрдзурыны фадат дæр банымадта тынг ахсджиагыл. Константин Лазаревы ныхасмæ гæсгæ уал фыццаг проектыл ныридæгæн куыст цæуы. «Проект «Заря Осетии» баст у рухс дæттыны техникон продукци уадзынимæ, рæхджы скусдзæн завод «Бином»-ы бындурыл. Цыдæриддæр юридиконбарадон документтæ хъæуы, уыдæттæ бацæттæ кодтам, уæдæ куыстадон проект дæр у рæвдз. Уырдæм хаст æрцыдысты хъæугæ специалисттæ ссарын, сахуыр сæ кæныны нысантæ дæр», — фæбæрæг кодта генералон директор.

Йæ ныхасмæ гæсгæ, инвестицион проект йæ тыхы бацæудзæн 2018 азы кæрон — 2019 азы райдайæны. Азы дæргъы куыстадон фæзтæ 500 квадратон метрæй хъуамæ фæфылдæр уой 3-4 мин квадратон метры онг. Ныртæккæ уал цехы кæнынц цалцæггæнæн куыстытæ, январмæ сласдзысты ифтонггæрзты иу хай. Рухсдæттæн цырæгътæй уæлдай куыстад уадздзæн электрон тыхимæ баст техникон продукци. Уыцы-иу рæстæг ма Волжскаг амалхъомтæ архайынц ноджыдæр иу проектыл, сæ зæрды ис Цæгат Ирыстоны донпырхгæнæн фыдыбæстаг машинæтæ «Кубань» æмæ «Фрегат» уадзын. Æппæт куыстадон хъуыддаг райдайæнæй кæронмæ хъуамæ æрбынæттон уа Дзæуджыхъæуы «Стройэлектронкомплекс»-ы фæзуæтты. Уый фæрцы дæр фæзындзæн ног нырыккон куыстад æмæ уæлæмхасæн кусæн бынæттæ.

 РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here