Турнир «Алантæ» цæудзæн Дзæуджыхъæуы

0
12

 

Афæдзы размæ нæ республикæйы Сæргълæууæг БИТАРТЫ Вячеславы хъæппæрисæй Дзæуджыхъæуы уæгъдибар хъæбысхæстæй арæзт æрцыд дунеон турнир «Алантæ». Уый цыди ноябры фæстаг бонты, æмæ дзы Уæрæсейы алы регионты богæлттæй уæлдай архайдтой цалдæр фæсарæйнаг бæстæйы минæвæрттæ.

Ерысты ацыдæй тынг разыйæ баззадысты Ирыстоны уазджытæ æмæ ныр дунеон турнир «Алантæ» дыккаг хатт кæй цæудзæн, уыцы хабарыл сæмбæлдысты æхсызгонæй.

Дунеон турнир «Алантæ» ацы аз цæудзæни 8-9 декабры Хъуылаты Бадзийы номыл Спортивон галуан «Манеж»-ы. Дзæуджыхъæумæ æрбацæуинаг сты 15 паддзахады богæлттæ. Уæрæсейы алы регионтæй уæлдай Дзæуджыхъæуы сæ хъару æмæ арæхстдзинад æвдисдзысты Гуырдзыстоны, Азербайджаны, Ираны, Сомихы, Турчы, Манголы, Индийы, Польшæйы, Белоруссийы, Казахстаны, АИШ-ы, Узбекистаны, Молдовæйы, Словакийы, Испанийы богæлттæ.

Ерыстæ цæудзысты дæс уæзы богæлтты ‘хсæн: 57, 61, 65, 70, 74, 79, 86, 92, 97 æмæ 125 кг онг.

Турнир аразджытæ сты РЦИ-Аланийы Хицауад, Хъæбысхæсты Дунеон Иудзинад æмæ Уæрæсейы спортивон хъæбысхæсты федераци.

Ерыстæ цæудзысты дунеон хъæбысхæсты федерацийы ног фæткмæ гæсгæ. Фыццаг бон хъуамæ сбæрæг уой, алы уæзы дæр кæронбæттæны 1-аг бынатыл чи тох кæндзæн, уыцы богæлттæ. Дыккаг бон та сбæрæг уыдзысты, 3-аг бынатыл чи ерыс кæндзæн, уыцы богæлтты нæмттæ. Уый фæстæ цæудзысты кæронбæттæн ерыстæ 3-аг æмæ 1-аг бынæттæ бацахсыныл.

Дызæрдыггаг нæу, дунеон турнир «Алантæ-2018» тынг цымыдисаг кæй рауайдзæн, уый.

Зæгъын хъæуы уый дæр, æмæ уæлахиздзаутæ æмæ призон бынæттæ бацахсджытæн сыгъзæрин, æвзист æмæ бронзæ майдантæй уæлдай кæй саккаг кæндзысты æхцайы лæвæрттæ. Афтæ: 1-аг бынат бацахсæг райсдзæн 5000 доллæры, 2-аг бынатмæ рацæуæг — 2000 доллæры, 3-аг бынæттæ бацахсджытæ та — фæйнæ 1000 доллæры.

Ерыстæ райдайдзысты райсомы 11 сахатыл

 

 

 

«Нæртон хъæзтыты» амбылдтой иууылдæр

 РЦИ-Аланийы Ахуырад æмæ наукæйы министрад, нæ республикæйы Фæсивæды хъуыддæгты комитет æмæ Æфсæддон-патриотон хъомылады центры хъæппæрисæй ноябры фæстаг къуыри 2-аг хатт арæзт æрцыдысты ирон адæмон хъæзтытæ æмæ спорты хуызтæй спартакиадæ «Нæртон хъæзтытæ».

 

Ирыстоны алы районты скъоладзаутæ сæ арæхстдзинад æвдыстой рагон ирон адæмон хъæзтыты цалдæр хуызæй: фатæй æхсынæй, дур æхсынæй, уæхсчытыл бадгæйæ хæцынæй, уæхскæй къуырынæй, бæндæн ивазынæй æмæ æндæртæй.

Æмткæй райсгæйæ, фыццаг бынатмæ дыккаг аз рацыдысты Камбилеевкæйы 1-æм скъолайы ахуырдзаутæ. Сæ физикон культурæйы ахуыргæнæг Джаджиты Уырызмæг зæгъы: «Нæртон хъæзтытæ”, æнæмæнг, хорз æххуыс сты хъомыладон куысты. Æз уынын, нæ ахуырдзаутæ куыд зæрдиагæй архайынц фыдæлты хъæзтытæ базоныныл, æмæ уый æхсызгон куыннæ хъуамæ уа! Афтæмæй нæ кæстæртæ æнувыддæр кæнынц нæ ирон æвзаг æмæ культурæйыл. Стыр бузныг зæгъæм ацы хъæзтытæ саразджытæн. Дарддæр дæр архайдзыстæм нæ кæстæрты фæлтæрæйфæлтæрмæ ирондзинадыл иузæрдион кæныныл».

Афтæ зæгъæн ис, æмæ «Нæртон хъæзтыты» архайджытæй хæрд ничи фæцис, уымæн æмæ сты нæ адæмон культурæйы вазыгджын хай.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here