Афæдзы бæрæггæнæнтæ

0
17

 

Нæ газеткæсджытæ æнæзонгæ не сты, 2018 азы райдайæнæй фæстæмæ Æрдзхъахъхъæныны æппæтуæрæсеон æхсæнады Цæгат Ирыстоны регионалон хайады хъæппæрисæй конкурс «Бахъахъхъæнæм æрдз» кæй цæуы республикæйы, уый. Æрæджы ацы конкурсы жюри бахыгъдта афæдзы бæрæггæнæнтæ æмæ уыдон фехъусын кæныны тыххæй Цæгат Кавказы хæххонметаллургон институты Наукон центрмæ æрцыдысты конкурсы архайджытæ — нæ горæты уæлдæр скъолаты ахуыргæндтæ, аспиранттæ, студенттæ æмæ республикон дзыллон хабархæссæг фæрæзты минæвæрттæ.

Кадджын мадзал цыбыр разныхасæй байгом кодта Æрдзхъахъхъæныны æппæтуæрæсеон æхсæнады Цæгат Ирыстоны республикон хайады сæрдары хæдивæг Гæзæццаты Алевтинæ æмæ ныхасы бар радта РЦИ-Аланийы Хицауады Сæрдар — Æрдз хъахъхъæныны æппæтуæрæсеон æхсæнады Цæгат Ирыстоны регионалон хайады сæрдар Сæбæтхъуаты Æхсарбегæн.

Уый арфæ ракодта конкурсы æппæт архайджытæн дæр, ахæм стыр хæс сæхимæ кæй райстой æмæ дзы бирæтæ уæлахиздзаутæ дæр кæй систы, уыдæтты тыххæй. Проект, дам, у тынг бæрнон, æмæ æз афтæ æнхъæл дæн æмæ нырæй фæстæмæ дæр ыл журналисттæ кæй кусдзысты æппæт хъарутæй дæр.
Медицинон наукæты доктор Бутаты Таймураз йæ раныхасы бафиппайдта, зæгъгæ, æрдз æмæ адæймаджы æнæниздзинады æхсæн ис фидар бастдзинад, æмæ, дам, алкæй хæс дæр у нæ алфамбылай алыварсы сыгъдæгдзинадыл архайын. Дарддæр уый, куыд конкурсон къамисы сæрдар, афтæ конкурсы фыццаг, дыккаг æмæ æртыккаг наукон-техникон куыстыты тыххæй премитæ ратта Цæгат Ирыстоны медицинон академийы ректор, медицинон наукæты доктор Олег Ремизовæн, Цæгат Кавказы хæххон-металлургон институты ахуыргæнæг,техникон наукæты кандидат Цгъойты Таймураз æмæ иннæтæн. Зæрдæлхæнæн призтæ та райстой Цæгат Кавказы хæххон-металлургон институты ректор, техникон наукæты доктор Юрий Дмитрак, ацы институты ахуыргæнæг, техникон наукæты доктор Æлборты Иван, Цæгат Кавказы хъæды хæдзарады техникумы ахуыргæнæг Кæсæбиты Фæизæ.

Нæ горæты уæлдæр ахуыргæнæндæтты аспиранттæ æмæ студентты æхсæн фыццаг æмæ дыккаг бынæттæ бацахстой Баситы Алан, Гаглойты Таймураз, Датиты Иннæ, Хуыдæлты Фатимæ æмæ иннæтæ — æдæппæт 9 адæймаджы.

Экологион конкурсы бæрæггæнæнтæ хицæнæй хыгъд æрцыдысты Цæгат Ирыстоны журналисттæн дæр. Фыццаг премийæ хорзæхджынгонд æрцыд газет «Северная Осетия»-йы сæрмагонд уацхæссæг Суанты Сергей, дыккагæй — РЦИ-Аланийы Æрдзон фæрæзтæ æмæ экологийы министрады пресс-службæйы кусæг Дзодзиаты Аленæ æмæ газет «Слово»-йы уацхæссæг Сæбанты Миленæ. Конкурсы Гранпри та райста «Рæстдзинад»-ы сæрмагонд уацхæссæг Тохсырты Къоста, æмæ йын нæ газеты кусджытæ арфæ кæнынц, цæмæй дарддæр йæ къухы æнтыстдзинæдтæ æфтой.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here