Республикæйы дзыллон хабархæссæг фæрæзты æнтыстджын архайд

0
48

 

Мин адæймаджы бæрц архайдта дыууæ боны Цæцæны Республикæйы Цæгат Кавказы дзыллон хабархæссæг фæрæзты минæвæртты VI форум «Медиа Кавказ2018»-ы. Ахсджиаг фарстатæ, цымыдисаг проекттæ, ног хæлæрттæ æмæ бастдзинæдтæ, нырыккон журналистикон амæлттæ, ног авналæнтæ, æнтыстытæ, уæлахизтæ æмæ цинтæ æрхаста архайджытæн форум

Нæ республикæйы дзыллон хабархæссæг фæрæзты минæвæрттæ форумы сæхи равдыстой хъæппæрисджынæй. Дыууæ боны дæргъы ныхас цыд нымæцон медиа фæрæзтæ æмæ мыхуыры фæрæзты фарстатæ æмæ фидæны рæзты мадзæлттыл. Журналисттæ æмæ блогертæ хицауады минæвæрттæ æмæ экспертон къамисы минæвæрттимæ архайдтой медиаæрмæдзты, цæлхæмбырдты, пленарон сесситæ æмæ æмбырдты, конкурсты. Арт-резиденцийы та сарæзтой равдыст.

Газет «Рæстдзинад»-имæ форумы архайджытæ базонгæ сты сæрмагонд фотозонæ, презентаци æмæ бæстон ныхасы фæрцы. Форум арæзт æрцыд Æхсæнадон хъæппæристы æхсæн регионалон центр «Северный Кавказ»-ы, Цæгат Кавказы УФ-йы Президенты Æххæстбарджын минæвары аппараты, Цæцæны Республикæйы Сæргълæууæджы, Хицауад æмæ УФ-йы Президенты грантты фонды æххуысæй.

Фыццаг боны мадзæлтты темæтæй иу уыд «СМИ и цифровая грамотность». Амыдта йæ УФ-йы Æхсæнадон палатæйы дзыллон хабархæссæг фæрæзты æмæ дзыллон коммуникациты информацион æмæхсæнады сæрдары хæдивæг Александр Малькевич. Архайдтой дзы УФ-йы Президенты Цæгат Кавказы федералон зылды Æххæстбарджын минæвары хæдивæг Сергей Стариков, Цæцæны Республикæйы Хицауады Сæрдар Муслим Хучиев.

Форумы иннæ фæзты темæтæ дæр уыдысты ахсджиаг: ахуырадон технологитæ фидæны медиа фæрæзты, цардæн тæссаг уавæрты куысты хицæндзинæдтæ, Уæрæсейы дзыллон хабархæссæг фæрæзтæ æмæ нациты æхсæн ахастдзинæдтæ, национ мыхуыры фæрæзты риссагдæр фарстатæ æмæ сæ фидæн.

Дыккаг бон форумы архайдтой Цæгат Каказы Федералон зылды субъектты сæргълæуджытæ: Рамзан Кадыров, Битарты Вячеслав, Казбек Коков, Юнус-бек Евкуров, Рашид Темрезов, Владимир Владимиров, Владимир Васильев, УФйы Президенты Æххæстбарджын минæвар Цæгат Кавказы федералон зылды Александр Матовников, Цæгат Кавказы хъуыддæгты федералон министр Сергей Чеботарев æмæ æндæр кадджын уазджытæ канд нæ сыхаг республикæтæй нæ, фæлæ Уæрæсейы алы горæттæй дæр.

Фыццаг уал иумæйагæй аргъ скодтой, форумы хицæн фæзыл Цæгат Кавказы регионтæ сæ дзыллон хабархæссæг фæрæзтæн цы сæрмагонд экспозицитæ бацæттæ кодтой, уыдонæн. Цæгатирыстойнаг делегацийы равдыст «Media@lania»-йы республикæйы традицион редакцитæ æвдыст æрцыдысты мультимедион хуызы. Уый фæстæ та архайдтой пленарон æмбырд «Цифровые медиа: новая реальность и перспективы развития»- йы. Амыдта йæ телеканал «Россия 24»-йы уацхæссæг æмæ амонæг Дмитрий Щугорев.

Александр Матовников йæ раныхасы арфæ ракодта ПТРК «Алания»-йы кусджытæн, æрæджы сын Уæрæсейы кадджындæр телевизион хорзæх «ТЭФИ-Регион» лæвæрд кæй æрцыд, уый тыххæй.

— Ахсджиаг фарстаты, адæм æмæ паддзахады ахастдзинæдты нысанхæссæг хъуыддæгты кæдфæнды дæр дзыллон хабархæссæг фæрæзтæ ахстой раззагдæр бынат æмæ уымæ гæсгæ цас размæдзыддæр, арæхстджындæр уой, уымæй аразгæ уыдзæн паддзахады кæнæ республикæйы абон æмæ фидæн, — загъта Битарты Вячеслав. — Ахæм форумтæ стыр ахъаз сты регионты ‘хсæн хæлардзинады ахастдзинæдтæ æмæ бастдзинæдтæн. Ахадынц, куыд журналистты профессионалон рæзтыл, афтæ регионы рæзтыл дæр.

Пленарон æмбырды куыд фехъусын кодтой, афтæмæй Уæрæсейы Конституцион тæрхондон уынаффæ рахаста, Цæцæн æмæ Мæхъæлы республикæйы æхсæн арæнтæ сфидар кæныны тыххæй. Уый фæдыл сæ хъуыдытæ æргом загътой Юнус-бек Евкуров æмæ Рамзан Кадыров. Кæй сын у ацы бæлвырддзинад æхсызгон хъуыддаг æмæ дарддæр уыцы уынаффæ æххæст кæныныл хæларæй кæй кусдзысты.

Фысым, Цæцæны Республикæйы Сæргълæууæг Рамзан Кадыров, сыхаг республикæты ‘хсæн бастдзинæдтыл дзургæйæ загъта, адæмы хæлардзинады нысанæн республикæты ‘хсæн арæнтыл цы пъæлицæйы посттæ ис, уыдон хъæуы айсын.

Мыхуыры фæрæзты абон Интернеты социалон хызæджы авналæнтæ сæ аууоны бакæнынвæнд кæй скодтой, уымæ гæсгæ сæ хъæуы уæлдай къæрцхъусдæрæй кусын. «Рæстдзинад»-ы редактор Битарты Маринæ газеты цардвæндаджы фæлтæрддзинадыл æнцой кæнгæйæ, форумы архайджытæн радзырдта, национ газетты сагъæссаг фарстаты тыххæй æмæ, сæ куыд хынцын хъæуы, уый.

Хорз хъуыддаг нæу, фылдæр хатт национ газетты журналистты æрмæджытæ конкурстæй здæхт кæй æрцæуынц, ома, уырыссаг æвзагыл фыст не сты, зæгъгæ. Суанг сæ тæлмацгондæй дæр нæ айсынц. Афтæмæй национ мыхуыры фæрæзты журналистты авналæнтæ къуындæгæй-къуындæгдæр кæнынц. Цæмæ бабæллой, цæмæ тырной, кæдæм сæхи ивазой? Куыд бахъахъхъæной газеттæ сæ тираж? Ацы фарстатыл лæмбынæг ныхас цыд этносты ‘хсæн журналистикæйы гильдийы президент Маргаритæ Лянгеимæ. Иннæ ахсджиаг фарста, абон социалон хызæджы йæ рæстæг чи æрвиты, уыдон иууылдæр фестадысты «журналисттæ». Арæхсынц алыхуызон æрмæджытæ фыссынмæ дæр. Бæстæ афтæ сæмтъеры кодтой, æмæ дзы цæвæг марæджы нал æвзары. Сарæзтой дзы информацион чъизидон æмæ, адæм кæуыл æууæндой, уый нал зонынц. Уымæн æмæ профессионалон фæрæзты электронон фæзтæ дæр дызæрдыггаг скодтой, иу кæримæ сæ бахæсгæйæ.

Форумы цы сфæлдыстадон конкурстæ уыд, уыдоны цæгатирыстойнаг медиа фæрæзтæ сæхи равдыстой бæрзонд æмвæзадыл. Къамисы уæнгтæ сын сæ дæсныдзинадæн скодтой хорз аргъ. Номинаци «Кавказ добрососедский»- ы уæлахиздзау ссис газет «Северная Осетия»-йы уацхæссæг Бедойты Зæлинæ йæ тематикон фарс «Соседи»-йы нациты æмæ конфесситы ‘хсæн ахастдзинæдтæ кæй æргом кæны, уый тыххæй. РЦИ-Аланийы паддзахадон телерадиокомпани «Алания»-йы минæвар Джыкккайты Заремæ райста хæрзиуæг, сæ радиостанци номинаци «Лучшая радиостанция»-йы уæлахиздзау кæй сисс, уый тыххæй. РЦИ-Аланийы паддзахадон телерадиокомпани «Алания»-йы журналист Гыбызты Зæринæ та ссис номинаци «Лучшая информационно-аналитическая программа»-йы уæлахиздзау. Информацион портал «15 регион»-ы журналисттæй номинаци «Лучшее интернет-СМИ»-йы уæлахиздзау ссис Гобозты Еленæ, номинаци «Лучший спецпроект в интернет-СМИ»-йы та — Нино Гудушаури. Кæд национ телекомпани «Осетия-Ирыстон»-ы фæзындæй афæдз йеддæмæ нæма рацыд, уæддæр сæхи æвдисынц æнтыстджынæй. Ныр дæр семæ æрхастой уæлахиз номинаци «Лучший спецпроект в эфире ТВ»-йы. Лæвæрд æрцыд журналист Мæдинæ Тоголоковайæн.

 ХЕТÆГКАТЫ Оксанæ ДзæуджыхъæуГрознаДзæуджыхъæу

ОСТАВЬТЕ ОТВЕТ

Please enter your comment!
Please enter your name here