Сæ кад, сæ намыс

0
163

 

Хуыцаубоны, 9 декабры нæ бæстæ бæрæг кæндзæн — Фыдыбæстæйы хъæбатырты бон. Уый фæдыл знон Дзæуджыхъæуы Намысы аллейы уыд æхсæнадон организациты æмæ фæсивæды акци. Бацæттæ йæ кодтой нæ республикæйы Ветеранты совет æмæ РЦИ-Аланийы Фæсивæды хъуыддæгты фæдыл комитет. Акци райдыдта иуæндæс сахатыл, горæты сæрмæ иумæйаг æфсымæрон цыртдзæвæны — Æнусон арты цур. Мадзалы архайджытæн бæрæгбоны арфæтæ ракодта республикæйы Ветеранты советы сæрдар, авиацийы майор КЪАБОЛАТЫ Солтан. Уый фæстæ радзырдта, хуыцаубоны бæрæгбоны мадзæлттæ куыд цæудзысты, уый фæдыл.

Инæлар-майор Бедойты Руслан та акцийы архайджыты базонгæ кодта ацы бæрæгбоны историимæ æмæ радзырдта, ацы бонæн цы стыр ахадындзинад ис патриотон-хъомыладон куысты, уый фæдыл. Уый загъта:

— 249 азы размæ, 1769 азы Уæрæсейы ус-паддзах Екатеринæ II сфидар кодта уæлахизхæссæг Георгийы орден. Нæ бæстæйы цæрæг адæм кæддæриддæр аргъ кодтой, ацы хæрзиуæгæй хорзæхджын чи уыдис, уыцы хъæбатыртæн. 1934 азы та фидаргонд æрцыд Советон Цæдисы Хъæбатыры ном, 1943 азы — æртæ къæпхæны «Кады орден» æмæ 1992 азы та Уæрæсейы Федерацийы Хъæбатыры ном. Ирыстон Фыдыбæcтæйæн радта 79 Советон Цæдисы Хъæбатыры æмæ 12 Георгийы Дзуары æххæст кавалертæ. Хъыгагæн, абон сæ иу дæр не ‘хсæн нал ис. УФ-йы Хъæбатыртæ 14-æй æхсæз ацы хæрзиуæгæй хорзæхджын æрцыдысты сæ мæлæты фæстæ. Æмæ абон ардæм мах уый тыххæй æрбамбырд стæм, цæмæй сын сæ рухс ном ссарæм æмæ сын зæгъæм бузныг, сæрибар цард нын сæ тугæй кæй балхæдтой, уымæн. Хъыгагæн, абоны æхсæнады фæзындис, «горе-историктæ» кæй хонæм, ахæм æрдæгзонд ахуыргæндтæ, уыдон бахъавыдысты нæ истори зыгъуыммæ рацаразыныл, бендерæтæ æмæ æндæр националистты скадджын кæнынмæ, фæлæ сæ сау фæнд сæ къухы нæ бафтдзæн. Украинæйы цæуы «героизаци» æмæ уынæм, хъæбатыры кадæн кæй æвзарынц, уый. Æмæ зæрдæ æнцой нæ ары, нæ Советон Цæдисы Хъæбатыртæй 16 Украинæйы зæххыл ныгæд сты, æмæ сæ ингæнтæн знаггад конд куы цæуа, уый тыххæй. Уымæн æмæ сæм æндæр цæстæй кæсынц, — загъта Бедойты Руслан.

Акцийы раныхас кодта Дзæуджыхъæуы администрацийы сæргълæууæджы хæдивæг Гозымты Раман. Уый загъта, ирон адæм канд Фыдыбæстæйы Стыр хæсты æмæ нырыккон Уæрæсейы тырысайы бын се ‘фсæддон хæс не ‘ххæст кодтой, фæлæ кад æмæ намысимæ алы рæстæджыты хæстыты хъæбатырæй кæй архайдтой, уый фæдыл.

— Æхсызгон у, уыйбæрц кæстæртæ кæй æрбацыд Намысы аллеймæ. Æвзонг суворовонтæ — нæ фидæны Фыдыбæстæ хъахъхъæнджытæ сты æмæ сæ хæс у, мæнæ ацы Намысы фæзы цыртдзæвæнты цур дидинджытæ сæвæрын. Бæрæгбоны мадзæлттæ цæудзысты скъолаты. 450 скъоладзауы та архайдзысты гвардийы 19-æм бригады хыгъды полигоны æфсæддон ахуырты. Уый хорз хъæппæрис у, рагацау æвзонг лæппуты æфсæддон цардмæ цæттæ кæнынæн, — загъта Гозымты Раман.

Акцийы архайджытæ дидинджытæ сæвæрдтой Иосиф Сталины цыртыл, Плиты Иссæ æмæ иннæ æфсæддон хъæбатырты ингæнтыл.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here