«Ацы ӕвдисӕндартӕ уын уӕнт царды дуӕрттӕ гомгӕнӕг дӕгъӕлтау»

0
60

 

Нӕ республикӕйы Сӕргълӕууӕг БИТАРТЫ Вячеславы хъӕппӕрисӕй знон алы районты скъолатӕй дӕр ахуыр ӕмӕ спорты ӕнтыстытӕ чи ӕвдисы, уыцы фӕзминаг кӕстӕртӕй паспорттӕ райсыны афон кӕмӕн ӕрцыд, уыдонӕн сӕ кадджын уавӕры радтой Хицауады хӕдзары. Кӕстӕртӕ, сӕ ахуыргӕнджытӕ ӕмӕ ныййарджытӕ ацы цауыл сӕмбӕлдысты ӕхсызгон ӕнкъарӕнтимӕ. Сӕргълӕууӕджы номӕй сын арфӕ ракодтой Хицауады Сӕрдары фыццаг хӕдивӕг СÆБÆТХЪУАТЫ ӕхсар ӕмӕ РЦИ-Аланийы сӕйраг федералон инспектор ЧЕЛÆХСАТЫ Владимир.

— Фыццаджыдӕр, нӕ республикӕйы Сӕргълӕууӕджы номӕй бузныг зӕгъын, ацы рӕсугъд кӕстӕртӕ чи схъомыл кодта, уыцы арфӕйаг ныййарджытӕ ӕмӕ ахуыргӕнджытӕн. Абон у ахсджиаг бӕрӕгбон, Уӕрӕсейы Конституцийы бонимӕ цин кӕнӕм уӕ ӕнтыстытыл. Нӕ зӕрдӕ уын зӕгъы, цӕмӕй уӕ алчидӕр царды ссара йӕхи фӕндаг ӕмӕ йыл ныфсджын къахдзӕфтӕ акӕна. Цӕмӕй суа, нӕ сӕр бӕрзӕндты кӕмӕй хӕссӕм, ӕмӕ йӕ ном Ирыстоны историйы кӕмӕн баззайа, ахӕм адӕймаг! Ацы ӕвдисӕндартӕ та уын уӕнт царды дуӕрттӕ гомгӕнӕг дӕгъӕлтау, — загъта Сӕбӕтхъуаты ӕхсарбег.

Кадджын уавӕры паспорттӕ чи райста, уыдон ӕдӕппӕт сты, цыппӕрдӕс азы кӕуыл сӕххӕст, ахӕм 25 скъоладзауы, фӕйнӕ дыууӕ — алы районӕй дӕр ӕмӕ фараст — Дзӕуджыхъӕуӕй.

ДЖИГОЛАТЫ Аланӕ, Михайловскы астӕуккаг скъолайы ахуырдзау:

— Бузныг мӕ зӕгъын фӕнды нӕ республикӕйы Сӕргълӕууӕг Битарты Вячеславӕн, ацы мадзал кӕй сарӕзта, уый тыххӕй, уый нӕ разӕнгард кӕны ноджы фылдӕр ӕнтыстытӕм, уӕлахизтӕм. Махӕн та у стыр кады нысан. Мӕ зӕрдӕ дарын, мах дӕр ӕй фыдӕнхъӕл кӕй нӕ фӕкӕндзыстӕм ӕмӕ Ирыстонӕн аккаг кӕстӕртӕ кӕй разындзыстӕм.

ХЕТÆГКАТЫ Оксанӕ

 

ОСТАВЬТЕ ОТВЕТ

Please enter your comment!
Please enter your name here