Ирон фарн тауӕг газет

0
45

 

Мӕ уарзон, нӕ ирон газет «Рӕстдзинад» 95 азы дӕргъы, бонӕй-бон аивдӕр, мидисджындӕр ӕмӕ цымыдисагдӕр уӕвгӕйӕ, рӕстӕгимӕ ӕмдзу кӕнгӕйӕ, хъахъхъӕны ирондзинад, хӕссы нӕм ирон дзырды фарн, тауы ирон ӕгъдау, у ирон культурӕйы фидиуӕг, ирон адӕмы иугӕнӕг.

Зынаргъ редакцийы кусджытӕ! Нӕ царды айдӕнӕн йӕ мидисджындӕр ӕмӕ аивгӕнӕг стут сымах, ӕмӕ уын уӕ иумӕйаг бӕрӕгбон, газет «Рӕстдзинад»-ы юбилейы фӕдыл кӕнын зӕрдӕбын арфӕтӕ. Фидар ӕнӕниздзинад, фӕрныгад ӕмӕ сфӕлдыстадон ӕнтыстдзинӕдтӕ уын зӕгъы мӕ зӕрдӕ. Ахӕм арфӕйаг бӕрӕгбон рауайӕд, ӕмӕ Иры дзыллӕтӕ стырӕй, чысылӕй, кӕстӕрӕй, хистӕрӕй, се ‘ппӕт дӕр се ‘ргом куыд раздахой нӕ зондамонӕг, нӕ цинхӕссӕг газет «Рӕстдзинад»- мӕ!

Æз кӕсын ацы фарнхӕссӕг газет, мӕхи ӕмбарынхъом куы фӕдӕн, уӕдӕй абонмӕ, дӕтты мын ӕхцондзинад. Цымыдисӕй фенхъӕлмӕ кӕсын йӕ радон номырмӕ. Æмӕ дзы цас зонындзинӕдтӕ райсдзынӕ, уый та! Цынӕхуызон ӕрмӕг дзы нӕ бакӕсдзынӕ! ӕвӕдза, цас фӕхъӕздыгдӕр уаид ирон адӕмӕн сӕ миддуне, ӕнӕсцухӕй куы кӕсиккой, газет «Рӕстдзинад»-ы цы зондамонӕн ӕрмӕджытӕ вӕййы, уыдон!

Цгъойты Хазби цы рухстауӕн фарс «ӕлутон» цӕттӕ кӕны, уый йӕхӕдӕг у ирон царды, ирон ӕгъдӕутты, ирон фарны скъола. Æз сӕ кӕддӕриддӕр кӕсын тынг зӕрдиагӕй. ӕмбырд сӕ кӕнын, ӕвӕрын сӕ хицӕнӕй. Бахъуыды рӕстӕг сӕ райсын ӕмӕ сӕ спайда кӕнын.

Уӕлдай цымыдисагдӕрӕй кӕсын, Тохсырты Къоста цы фарс «Адӕймаг. ӕрдз. Экологи» цӕттӕ кӕны, уыцы ӕрмӕджытӕ. Æз аст ӕмӕ дыууиссӕдз азы бакуыстон географийы ахуыргӕнӕгӕй ӕмӕ, кӕй зӕгъын ӕй хъӕуы, уымӕ гӕсгӕ мын уӕлдай цымыдисаг сты ӕрдзы хабӕрттӕ. Тынг зӕрдиагӕй кӕсын Къостайы фыст ӕмдзӕвгӕтӕ дӕр.

Зӕрдиагӕй кӕсын Дзуццаты Къостайы цыбыр, фӕлӕ мидисджын, ӕнцон кӕсӕн ӕмӕ ӕмбарӕн ӕрмӕджытӕ. Алкӕуылдӕр ӕмӕ алцӕуылдӕр ӕххӕссы.

Æцӕг ӕнцойбон банкъарын, Черчесты Хъасболат ӕмӕ Гасанты Валери цы фарс «ӕнцойбоны фарс», зӕгъгӕ, цӕттӕ кӕнынц, уымӕй. Цымыдисагӕй бакӕсын хъӕлдзӕг радзырдтӕ, фыдӕлтыккон ӕмбисӕндтӕ. Тынг мӕ зӕрдӕмӕ цӕуынц Черчесты Хъасболаты арфхъуыдыджын иннӕ ӕрмӕджытӕ дӕр.

Стыр аргъгӕнӕг дӕн фӕсивӕдон фарс «Нӕ Иры фидӕн«-ӕн. Ацы мадзалӕй Касаты Аслӕнбег пайда кӕны кӕстӕрты хорз хъуыддӕгтӕм разӕнгард кӕныныл, ирон ӕвзагмӕ сын се ‘ргом раздахыныл. Мӕ зӕрдӕ уӕлдай тынгдӕр хурварс абады, ацы фарсыл куы бакӕсын мӕ раздӕры ахуырдзауты ӕнтыстдзинӕдты тыххӕй, уӕд.

Адӕймаджы дисы ‘фтауы Бутаты Эльзӕйы ӕргом ныхас. Ныры фӕлдурӕджджын дуджы ӕнӕуаг митӕ хурмӕ ракалы. Кӕцыдӕр чиновникты ӕнӕзакъон хъуыддӕгтыл уӕндонӕй дзуры. Хӕссы сӕ газеткӕсджыты размӕ. Куыд ис хи фӕиппӕрд кӕнӕн ахӕм фарс «Нӕ уидӕгтӕ. Нӕ Ир. Нӕ бӕстӕ»-йӕ? Ацы фарс бакӕсгӕйӕ, адӕймаджы ныфсы хур батавы.

Куыд хъуамӕ ма бакӕса Ирыстоны цӕрӕг не ‘мзӕххонты хӕстон фӕндӕгты тыххӕй, кӕцытыл хорз фыссы Багаты Аврам. Ничи дзы ферох, ницы дзы ферох вӕййы. Бузныг зӕгъын Аврамӕн, абон сабыр дуджы кӕй фӕрцы цӕрӕм, уыцы намысджын ӕфсӕддонты нӕмттӕ нын рох кӕнын кӕй нӕ уыдзы, уый тыххӕй.

Стыр бузныг дӕн Абайты Эдуардӕй. Мӕ сабидуг, ме ‘взонджы бонтӕ мын мӕ зӕрдыл ӕрлӕууын кӕны. Нуарджын, хъӕздыг мадӕлон ӕвзагыл фыст уацты ӕнкъарын цавӕрдӕр ӕнахуыр удсыгъдӕггӕнӕн тафс. Диссаг дӕр, тӕхудиаг дӕр ӕмӕ бӕллиццагдӕр сты йӕ зӕрдылдарындзинад ӕмӕ дзырдаиваддзинад. Мадӕлон ӕвзагыл къӕм абадын нӕ уадзы. Рохуаты цы дзырдтӕ аззад, уыдон дӕр рӕстӕджы фӕлмы бынӕй ракъахы, сыгъзӕрин доны сӕ стулы ӕмӕ сӕ рӕдауӕй тауы адӕмыл. Цӕмӕй нӕ мадӕлон ӕвзаг тъымы-тъыматӕм цӕра, ууыл у йӕ удуӕлдай архайд Эдуардӕн.

Уӕдӕ куыд ӕхсызгонӕй бакӕсы адӕймаг: «Нӕ лӕппутӕ сӕхи равдыстой сӕрӕнӕй!», зӕгъгӕ. Баскаты Уырызмӕджы спортивон фарс «Зилахар» афтӕ хъӕздыг вӕййы алыхуызон цаутӕй, кӕцытӕ адӕймагмӕ ӕвзӕрын кӕнынц сӕрыстырдзинады ӕнкъарӕнтӕ. ӕхсызгон мын сты нӕ кӕстӕрты спортивон сгуыхтдзинӕдтӕ.

Ныры дуджы ахсджиаг хӕстӕ ӕххӕст кӕнынц барад хъахъхъӕнджытӕ. Цымыдисаг ӕмӕ ӕнӕмӕнг хъӕугӕ у, Касаты Батрадз цы тематикон фарс «Адӕймаг барадон паддзахады», зӕгъгӕ, цӕттӕ кӕны, уый. Батрадз ссары, не ‘мзӕххонтӕй Ирыстонӕй дард чи цӕры, уыдоны дӕр ӕмӕ газеткӕсджыты зонгӕ кӕны дард бӕстӕты сӕ царды хабӕрттимӕ.

“Куыд? Кӕм? Цы?” Куыннӕ сты цымыдисаг ахӕм фарстатӕ? Ацы фӕрстытӕн Дедегкаты Зӕлинӕ уырзӕй ӕвзарӕгау фӕагуры дзуаппытӕ ӕмӕ сӕ газеткӕсджыты размӕ рахӕссы.

Хӕрз мӕгуыр уаид адӕймаджы миддуне, национ культурӕ, аивад чи фидар кӕны, уыдоны куы нӕ зонид, уӕд. Æмӕ нын уымӕн та стыр ӕххуыс кӕны Хетӕгкаты Оксанӕ. Фарс «Фӕрнон»-ы сын сӕ сурӕттӕ равдисы ӕххӕстӕй. Уӕдӕ кӕй нӕ бафӕнддзӕн Ирыстоны хъӕуты хабӕрттӕ фехъусын. Табуафси, кӕс газет «Рӕстдзинад» -ы фарс «Куыд цӕрыс, хъӕу?», зӕгъгӕ. Гугкаты Жаннӕ ӕнӕзивӕгӕй фӕзилы Ирыстоны хъӕутыл ӕмӕ ӕрӕмбырд кӕны бирӕ цымыдисаг ӕрмӕджытӕ. Уӕлдай зӕрдиагдӕрӕй цин кӕнын ӕрыгон журналистты сфӕлдыстадон ӕнтыстдзинӕдтыл. Æмӕ ӕнӕнизӕй, уӕнгрогӕй сфӕлдыстады бӕрзонддӕр рындзтӕм куыд схизой, ахӕм амонд сӕ уӕд!

Газеты фӕрстыл ирдӕй зыны курдиатджын къамисджытӕ Къӕбысты Харитон ӕмӕ Цӕгӕраты Дауыты ӕрмдзӕф. Цӕстуарзонӕй архайынц газеты фӕлгонцадыл.

Кӕд, мыййаг, къуырийы дӕргъы алыхуызон хъуыдытӕ ӕмӕ куыстытӕй бафӕлладтӕ, уӕд райс сабаты газет «Рӕстдзинад», фӕстаг (цыппӕрӕм) фарс байгом кӕн, ӕмӕ дӕхи аирхӕфс Челӕхсаты Русланы конд дзырдбыдыл. Дӕ фӕллад цыдӕр фӕуыдзӕн, ноджы ма дӕ зӕрдылдарындзинад дӕр фӕхуыздӕр уыдзӕн.

Зӕгъын ма мӕ фӕнды редакцийы ӕппӕт кусджыты адӕймагдзинад, уӕздандзинады тыххӕй. Кӕдфӕнды сӕм бацу, кӕнӕ телефонӕй бадзур, кӕд цыфӕнды ӕнӕвдӕлон вӕййынц, уӕддӕр дыл бацин кӕндзысты, баузӕлдзысты. Лӕмбынӕг дӕм байхъусдзысты ӕмӕ дын бӕлвырд дзуаппытӕ ратдзысты. Уӕдӕ дӕ бафӕндыд уац ныффыссын, табуафси, ӕрбарвит сӕм де ‘рмӕг ӕмӕ дын ӕй бабӕстон кӕндзысты, афтӕмӕй мыхуыры рацӕудзӕн.

Сусӕггаг нӕу, кӕцыфӕнды куыстуатӕн дӕр йӕ фӕллойадон ӕнтыстытӕ аразгӕ кӕй сты ӕнгом, куыстхъом коллектив ӕмӕ дӕсны разамынд. Битарты Мӕринӕ кӕд ӕрыгон у, уӕддӕр иттӕг хорз кӕй ӕххӕст кӕны йӕ бӕрнон хӕстӕ, уый зын бамбарӕн нӕу, йӕ арӕхстдзинад — хурӕргом.

Ноджы ма уын фылдӕр бантысӕд, нӕ зынаргъ рухстауджытӕ, зондамонджытӕ! Уӕ удуӕлдай архайд, уӕ зӕрдиаг лӕггады тыххӕй ма уын иу хатт зӕгъын стыр бузныг!

Æвӕдза, куыд мӕгуыр уаиккам, зондӕй дӕр, удыхъӕдӕй дӕр ӕмӕ фарнӕй дӕр, нӕ ирон газет «Рӕстдзинад» нын куы нӕ уаид, уӕд! Хуыцау нын ахӕм арфӕ ракӕнӕд, ӕмӕ ирон адӕм куыд бамбарой, нӕ абоны цардӕн нын нӕ адӕмон газет цы стыр ахъаз у, уый ӕмӕ алчидӕр ӕвӕстиатӕй куы рафыссид газет «Рӕстдзинад»! Цӕй, уӕдӕ, Иры дзыллӕтӕ, ӕмхуызонӕй рафыссӕм 2019 азы фыццаг ӕмбисӕн ӕмӕ фӕрнӕй кӕсӕм нӕ ирон газет!

Газет «Рӕстдзинад»-ы иузӕрдион хӕлар — ФÆРНИАТЫ Рая

ОСТАВЬТЕ ОТВЕТ

Please enter your comment!
Please enter your name here