Журнал МАХ ДУГ “Рӕстдзинад”-ы уазӕг

0
268

Фидӕны аз — юбилейон аз

«Мах дуг» та ногӕй у «Рӕстдзинад»-ы уазӕг. 2019 азы «Мах дуг»-ӕн уыдзӕн юбилей — сӕххӕст ыл уыдзӕнис 85 азы. Цы рахӕсдзыстӕм журналкӕсджыты размӕ? Фыццаджы-фыццаг парахатӕй сбӕрӕг кӕндзыстӕм Къостайы райгуырды 160 азы бон.

Январы номыры та нӕ кӕсджытӕн радзурдзыстӕм Зӕнджиаты Бӕбуйы тыххӕй. Ацы фарны лӕджы райгуырдыл сӕххӕст уыдзӕни 150 азы. Ам ма бакӕсӕн уыдзӕни Колиты Виталийы ног ӕмдзӕвгӕтӕ йӕ райгуырды 60 азмӕ. Дӕбе ӕмӕ Хъамбердиаты Мысост райгуырдысты 110 азы размӕ, Цырыхаты Михал ӕмӕ Богазты Умар та — 100 азы размӕ. Уыдоны тыххӕй дӕр нӕм уыдзӕн ӕрмӕджытӕ. 90 азы ӕххӕст кӕны Цӕрукъаты Владимиры райгуырдыл, 85-гай азтӕ та — Ситохаты Саламджери, Тыджыты Юри ӕмӕ Айларты Чермены райгуырдыл, 80 азы — ӕлборты Хадзы-Умары райгуырдыл. Се ‘ппӕты нӕмттӕ дӕр ӕрымысдзыстӕм.

Ныр та, абон цардӕгас чи у, уыдоны тыххӕй. Айларты Измаил бӕрӕг кӕндзӕн йӕ 95 азы юбилей, Тедеты Ефим — 90 азы, Къибирты Амырхан — 75 азы, Кокайты Тотрадз дӕр — 75 азы, Джусойты Марат, Скъодтаты Эльбрус ӕмӕ Дыгъуызты Тенгиз — сӕ 60 азы юбилейтӕ.

«Разагъды лӕгтӕ», зӕгъгӕ, уыцы рубрикӕйы радзурдзыстӕм Байаты Гаппо ӕмӕ Тӕбӕхсӕуты Балойы тыххӕй.

Журнал фидарӕй хӕцдзӕн йӕ рагон традицитыл: джиппы уадздзӕн уырыссаг ӕмӕ дунейы адӕмты литературӕйы классикты уацмыстӕ. Уыдонимӕ — Иван Крылов, Александр Пушкин, Уолт Уитмен, Ованес Туманян, англисаг ӕмӕ немыцаг поэттӕ ӕмӕ афтӕ дарддӕр.

Журналы кусджыты сӕйраг хӕс у абоны ирон литературӕйы ахсджиагдӕр фӕллӕйттӕ цӕттӕ кӕнын. Гъемӕ уын хъусын кӕнӕм: сӕ ног уацмыстӕй нын зӕрдӕ ӕвӕрынц Дзасохты Музафер, Къадзаты Станислав, Хуыгаты Сергей, Брытъиаты Аслӕнбег, Агънаты Гӕстӕн, Дауыраты Дамир, Цомартаты Изӕтбег, Цгъойты Хазби, Дауыраты Зойӕ, Бабочиты Руслан, Абайты Эдуард, Черчесты Хъасболат, Годжыцаты Нелли, Фидараты Руслан, Хохойты Энвер.

 

Рох нӕ не сты нӕ хуссайраг ӕфсымӕртӕ дӕр. Хуссар Иры фысджытӕ иудадзыг ӕрбалӕууынц нӕ фарсмӕ, сты нӕ иузӕрдион автортӕ, ӕмӕ сын фидӕнмӕ дӕр, кӕй зӕгъын ӕй хъӕуы, мыхуыр кӕндзыстӕм сӕ уацмыстӕ. Бузныг стӕм хуссары ирӕттӕй, нӕ национ журнал рафыссынмӕ кӕй нӕ базивӕг кӕнынц, уымӕй дӕр, фӕлӕ хорз уаид, фидӕн азӕн ӕй ноджы фылдӕрӕй куы рафыссиккой, уӕд.

Журналы кусджытӕн сӕйрагдӕр не ‘взаг, нӕ истори, нӕ удварн, нӕ этнографи, фольклор ӕмӕ ӕндӕр фарстатӕн уыдонӕн парахатӕй бынат уыдзӕни рубрикӕты: «Разагъды лӕгтӕ», «Æвзаг — нацийы бындур», «Ног ном», «Уидӕгтӕ», «Аивад, культурӕ», «Рӕстӕг — рӕстӕвзарӕн», «Ахуыргӕнӕгӕн ӕххуысӕн», «Адӕмон сфӕлдыстад», «Литературӕйы фарстатӕ», «Сфӕлдыстадон бынтӕ», «ӕвыд-дывыдоны дуг», «Мах дуджы» равдыст», «Очерк, публицистикӕ».

 

ÆВЗАГ — АДÆМЫ ФАРН

Нацийӕн йе ‘ппӕт хъуыддӕгтӕ, йӕ царды уаг, историйы гуыргъахъ фӕндӕгтыл цыдӕриддӕр сарӕзта, уыдон сӕ фӕд ныууадзынц ӕвзаджы… ӕнӕгуырысхойӕ зӕгъӕн ис: ӕрӕджы позитивон чи ссис, уыцы филологи ӕнӕнхъӕлӕджы стыр хорзы бацыд историйӕн. «Æвзаджы хъуыддӕгты адӕм сты ӕвӕджиауы зондамонджытӕ». Платоны ацы ныхӕстӕ сты раст. Адӕм ӕвзаг аразынмӕ арӕхсынц хорз. Скӕнынц ӕй фӕлгонцтӕй аив, ӕнцонӕмбарӕн, цӕрдуд ӕмӕ рӕстдзӕвин. Уыцы хъуыддӕгтӕ ахуыргӕндтӕ куы кӕниккой, уӕд ӕвзаг уаид дыдзырухсау ӕнӕахадгӕ ӕмӕ уӕззау. Уыйхыгъд ын адӕм йӕ раст ӕгъдӕуттӕ мурмӕ дӕр нӕ дарынц. Уыдон наукон методтӕ-йедтӕн ницы ‘мбарынц. Адӕмӕн се ‘ххуысгӕнӕг у инстинкт, ӕрдзӕй рахӕсгӕ сусӕг тых… Уымӕ гӕсгӕ ӕппӕты зондджындӕр ӕмӕ дзаджджындӕр ӕвзӕгтӕ уӕфт сты «зыгъуыммӕ» фӕлдӕхт диссӕгтӕ ӕмӕ ӕнӕнхъӕлӕджы, ӕнахуыр фӕзилӕнтӕй. (…) Цӕвиттон, ӕвзӕгтӕ аразгӕйӕ уӕрӕх рауайы «хъаугъайаг» ӕмӕ, фӕткӕй иуварс чи ахизы, ахӕм хабӕрттӕ. Уый хауы ӕппӕт ӕвзӕгтӕм дӕр.

Анатоль ФРАНС

(Уацмысты ӕмбырдгонд 8 томӕй. 8-ӕм том. Гослитиздат. М., 1960, 70 ф.)

 

 

ФИППАИНАГ. Анатоль Франс цы «зыгъуыммӕ» фӕлдӕхтыты ӕмӕ ӕнахуыр фӕзилӕнты кой кӕны, уыдонӕн ӕвдисӕнты хуызы нӕ ирон ӕвзагӕй ӕрхӕссӕн ис бирӕ цӕвиттонтӕ. Æркӕсӕм ӕрмӕст ӕртӕ дзырдмӕ: ӕвдасарм, фынддӕс, цӕфхад.

  1. Æвдасарм арӕзт у ӕртӕ дзырдӕй: ӕд, фарс ӕмӕ армӕй. Фӕлӕ адӕмы сфӕлдыстадон куысты фӕрцы ӕртӕ хицӕн дзырдӕй рауад иу. Тӕккӕ райдайӕны хъуысти ӕдфарсарм, фӕлӕ адӕмӕн ӕнцондӕр дзурӕн куыд уыд, афтӕ йӕ рацарӕзтой: ӕвдасарм.
  2. Фынддӕс. Арӕзт у фондз (фӕндз) ӕмӕ дӕсӕй. Абайты Вассойы загъдау, «с ассимиляцией дзд > дд и перерождением ӕ > ы».
  3. Цӕфхад. ӕвдасармау ай дӕр «ӕнахъинон» дзырд у, ӕвӕдза. Æвзӕргӕ та цӕг ӕмӕ фад-ӕй ракодта.

Афтӕ адӕм сӕхи ӕнӕфыст уагӕвӕрдтӕм гӕсгӕ аразынц ӕвзаг

 

 

ХЪУЫЛАТЫ Ладимыр

Æртӕ зӕгӕлы

(Радзырд)

Бон базмӕлыди. Ног чындзытӕ сӕ сыхӕгты рудзгуытӕ гом кӕнынц. Уасынц уасджытӕ. Хъуысы Терчы сӕр-сӕр. Мӕнӕ устытӕ дон фӕхӕссынц. Сӕлимӕт Госӕдайы фӕурӕдта:

— Кыс-кыс! ӕрӕвӕр-ма дӕ бедратӕ. У, Госӕда, дӕлӕ Быдзыготӕм диссаджы дӕсны. Цӕмӕйдӕриддӕр ӕй бафӕрсай — уайтагъд дын ӕй зӕгъдзӕни. Цыфӕнды хъуыддаджы тыххӕй дӕр дын бӕлвырд ныхӕстӕ ракӕндзӕни. Мацы йын бавгъау кӕн. Алцыдӕр исы. ӕмӕ кӕд Батджерийӕн исты хос скӕнид…

Бады дӕсны Гикка цъӕтджын сынтӕджы. Исчи йӕм куы бацӕуы, уӕд ын сӕрӕй акувы ӕмӕ уӕздан хъӕлӕсӕй фӕзӕгъы: «Куыд хорз адӕм сты уӕвгӕйӕ та ацы хъӕу: фӕлмӕн, уазӕгыл ӕнувыд, кӕрдзындӕттон. ӕз тӕккӕ дӕр ахӕм адӕмы уарзын».

Мӕнӕ бацыд уатмӕ Госӕда дӕр. Гикка йӕ хъӕбысы стыр тӕбӕгъ бакодта, райста хъӕдуртӕ ӕмӕ сӕ ӕртыгӕйттӕй ӕвӕрын рай- дыдта. Нӕй, нӕ бадынц йӕ хъӕдуртӕ нывыл. Цыма сӕ дзых ӕппындӕр никӕуыл ис, уыйау ныхъхъус сты! Ахӕм «гоби» хъӕдуртимӕ Гиккайӕн йӕ бон нал уыди дарддӕр «кусын» ӕмӕ бахудти Госӕдамӕ:

— Цӕвиттоны хъуыддагӕй, тынг ӕхсызгон хъӕуынц ӕртӕ зӕгӕлы. Зӕгӕлтӕ хъуамӕ уӕ кӕртӕй рахӕсгӕ уой. Госӕда цӕрдӕг рауад, хъӕуы дуканийы алхӕдта зӕгӕлтӕ ӕмӕ сӕ бахаста. Гикка ӕртӕ зӕгӕлы куы ауыдта, уӕд сагъдӕй баззад, ныджджих. ӕппынӕрӕджиау сфӕрӕзта:

— М’ арт бауазал, адон та цы сты?

— Зӕгӕлтӕ.

— Мӕ хӕдзар бахорз, ӕмӕ дын ӕз ахӕмтӕ загътон?

— Уӕдӕ? Цӕфхады зӕгӕлтӕ хъуыд?

— Уӕууа, ныр мӕ куыннӕ бамбӕрстай? ӕз зӕгӕлтӕ цы хонын, уый зоныс? Цӕрвджын уӕливыхтӕ! Уӕ гормон, хуымӕтӕджы адӕмы хуызӕн ын дзурӕн нӕй, Хуыцау мын ӕй нӕ загъта, хъуамӕ йӕ фӕсномыгӕй ӕмбарат.

Цасдӕр рӕстӕджы фӕстӕ Госӕда, царвы чи ленк кодта, ахӕм тӕнцъар уӕливыхтимӕ бараст Гиккамӕ. Барухс дӕсныйы зӕрдӕ:

— Афтӕ, мӕ хур, гъе! Уыцы ныхасмӕ Госӕда Гиккайы раздарӕны дзыппы авӕрдта иу туман, стӕй йын йӕ дӕлармы бакодта ӕртӕ метры сау сатин.

— Мӕ хӕдзарыл, цы дзӕбӕх хъуымац у? Нал уӕм дзы ис? — бахудти Гикка, стӕй райдыдта Батджерийы тыххӕй.

— Фыры дзуар ӕй ралгъыста, ӕрӕджы йын кусарт кӕй нал акодтат, уый тыххӕй. Найфаты кувӕндоны йын кусарт акӕнут. Найфаты зӕдтӕн уӕ уӕрджытыл лӕугӕйӕ балӕгъстӕ кӕнут… Йӕд та, Госӕда, иу чысыл уӕм зад нӕ уыдзӕн?.. Айсӕтӕн та Лӕгты дзуары аххос у, ӕмӕ йӕ мысайнаг… нартхоры голлаг. Сӕлийӕн — МадыМайрӕмы аххос, йӕ мысайнаг… фондз туманы… Дыккаг бон Гикка йӕ «фӕллӕйттӕ» Быдзыгойы хӕрӕгуӕрдоны ӕрцамайын кодта, хӕрзбон загъта Таладжыны хъӕуӕн. Стыр фӕндагмӕ йӕ ныххӕццӕ кодтой Быдзыгойы дыууӕ фырты. Уым ыл райӕххӕсткомы машинӕ ӕрбамбӕлд, ӕмӕ Гикка Тӕтӕртуппы бынты дзӕгъ-дзӕгъгӕнгӕ ныффардӕг Каконджыны хъӕумӕ йӕ фӕрныг хӕдзармӕ. Уырдыгӕй ма райӕххӕсткомы сӕрты Таладжыны ‘рдӕм иу каст ракодта ӕмӕ загъта:

— Хъӕздыг хъӕу у, ӕвӕдза, Таладжын, стӕй нӕ райӕххӕсткомы сӕрдары ӕфтӕмӕбил дӕр дзӕбӕх у…

 

Рагон анекдоттӕ

 

* Иухатт техникӕйы ӕнтыстыты тыххӕй ныхаскӕнгӕйӕ Бернард Шоу афтӕ загъта:

— Ныр мӕргътау тӕхын базыдтам уӕлӕрвты, доны та кӕсагау ленк кӕнын. ӕрмӕст ма иу хъуыддагӕй цух стӕм: зӕххыл адӕймӕгтау цӕрын нӕма базыдтам.

 

* Иуахӕмы Шоу тынг нард джентльменимӕ уынджы фембӕлди. Нард лӕг мӕллӕг Шоумӕ куы бакаст, уӕд загъта:

— Дӕ бакаст ахӕм ӕнахъинон у, ӕмӕ адӕймаг ӕнӕбары банхъӕлдзӕнис, Англис сыдӕй мӕлы, зӕгъгӕ.

— Дӕумӕ бакӕсгӕйӕ та адӕймаг банхъӕлдзӕнис, Англис сыдӕй кӕй мӕлы, уый дӕу аххос у, зӕгъгӕ.

 

*Æнӕхатыр англисаг тӕрхонылӕг Джеффрис иуахӕмы йӕ лӕдзӕг систа, йӕ бакомкоммӕ цы зылынджын лӕг бадт, уый ‘рдӕм ӕй сарӕзта ӕмӕ загъта:

— Мӕ лӕдзӕджы кӕрон бады, а дунейыл кӕй нӕма фендӕуыд, ахӕм дӕлимон, ӕлгъаг, ӕнаккаг.

— Дӕ лӕдзӕгӕн йӕ кӕцы кӕрон бады уыцы дӕлимон? — афарста зылынджын

 

eeeeeeeeeeeeeeeeeeeeeeeeeeeeeeeeeeeeeeАрвистон

Эзопы ӕмбисӕндтӕй

Нӕзы ӕмӕ какон

Нӕзы каконы схъӕлхуызӕй ӕфхӕрдта: «Дӕуӕй мисхалы бӕрц дӕр ницы пайда ис, мӕнӕй та аразынц хӕдзӕрттӕ, кувӕндӕтты сӕртӕ». Уӕд ын какон афтӕ: «Дӕ зӕрдыл ма ӕрлӕууын кӕн, ӕнамонд, фӕрӕттӕ ӕмӕ дын хырхытӕ цы митӕ бакӕнынц, уый, ӕмӕ уӕд дӕхи бафӕнддзӕни какон фестын».

 

Домбай, Прометей ӕмӕ пыл

 

Домбай иу ӕмӕ дыууӕ хатты нӕ хъаст кодта Прометейӕн: стыр ӕмӕ, дам мӕ рӕсугъд скодтай, мӕ хъӕлӕсы — цыргъ дӕндӕгтӕ, мӕ къӕхтыл — фидар дзӕрныхтӕ, сырдтӕй, дам, мӕнӕй тыхджындӕр нӕй. «Фӕлӕ уӕддӕр, — дзырдта домбай, — тӕрсын уасӕгӕй!» Прометей йын дзуапп радта: «Мӕ бон цы уыд, уыдӕттӕ дын сарӕзтон, ницы дын бавгъау кодтон. Фӕлӕ дын ӕгӕр лӕмӕгъ уд ис!»

Домбай йӕхиуыл кӕуын байдыдта, тӕппуд цӕмӕн дӕн, зӕгъгӕ, ӕмӕ йӕхи амарыны онг ссис. Араст уыцы хъуыдыимӕ ӕмӕ пылыл хӕрхӕмбӕлд фӕци. Салам ын радта. Пыл иудадзыг йӕ хъустӕ цӕмӕн тилы, зӕгъгӕ, сцымыдис ӕмӕ йӕ фӕрсы: «Цы хабар у, дӕ хъустӕ иу ран цӕуылнӕ ӕруадзыс?» Уыцы сахат пылы алывӕрсты ӕхситгӕнгӕ тахти къогъо. «Мӕнӕ ацы гыццылы уыныс, мӕ алывӕрсты мамазила куыд кӕны. Уый мӕ хъусы куы фӕмидӕг уа, уӕд мын ӕнӕ мӕлгӕ нал и».

Уӕд домбай загъта: «Мӕхи цӕмӕн марын? Уасӕг къогъойӕ цӕйбӕрц тыхджындӕр у, ӕз хъуамӕ пылӕй уыйбӕрц амондджындӕр уон!»

Уыныс, къогъо куыд тыхджын у: суанг ма дзы пыл дӕр тӕрсы!

 

Нӕзы ӕмӕ какон

Нӕзы каконы схъӕлхуызӕй ӕфхӕрдта: «Дӕуӕй мисхалы бӕрц дӕр ницы пайда ис, мӕнӕй та аразынц хӕдзӕрттӕ, кувӕндӕтты сӕртӕ». Уӕд ын какон афтӕ: «Дӕ зӕрдыл ма ӕрлӕууын кӕн, ӕнамонд, фӕрӕттӕ ӕмӕ дын хырхытӕ цы митӕ бакӕнынц, уый, ӕмӕ уӕд дӕхи бафӕнддзӕни какон фестын».

 

Куыдз, рувас ӕмӕ уасӕг

Куыдз ӕмӕ уасӕг сфӕнд кодтой иумӕ цӕрын. Иуахӕмы балцы ацыдысты. Сӕ изӕр бахастой къохмӕ. Уасӕг бӕласмӕ спӕррӕст ласта ӕмӕ къалиуты бын ӕрбынат кодта, куыдз та бӕласы мӕрайы бафынӕй. Кӕркуасӕнты уасӕг йӕ хъӕлӕсы дзаг ныхъхъихъыри ласта. Рувас ӕй айхъуыста ӕмӕ йӕ ӕрфӕндыд уасӕджы бахӕрын. Хӕстӕг ӕрбацыди, бӕласы бын ӕрлӕууыд ӕмӕ хъӕр кӕны: «Диссаджы маргъ дӕ, зӕххардыстӕн, стӕй адӕмӕн пайда хӕссыс! ӕрхиз-ма, дӕ хорзӕхӕй, ӕмӕ иумӕ ныззарӕм — нӕ дыууӕйӕн дӕр уый ӕхцон уыдзӕни!» Уӕд дын ӕм уасӕг куы ‘рдзурид: «Хӕстӕгдӕр ма ӕрбацу, мӕ къона, ӕмӕ уым ӕхсӕвгӕсмӕ бадзур, бӕласмӕ ма, зӕгъ, бахой». Рувас йӕ коммӕ бакаст, «ӕхсӕвгӕсмӕ» бахъӕр кодта. Куыдз дын куы расӕррӕтт ласид ӕмӕ — дӕ фыдгул дӕр афтӕ! — рувасы акъабӕзтӕ кодта.

 

Æмбисонд ӕвдисы: ӕмбаргӕ адӕймӕгтӕ тӕссаг уавӕры куы бахауынц, уӕд се знӕгтыл фӕуӕлахиз вӕййынц.

 

Ныгъуыли цъиу

Ныгъуыли цъиу къӕппӕджы бахауд ӕмӕ дзыназын байдыдта: «Мӕгуыр мӕ бон, цӕй ӕнамонд дӕн, цӕй! Нӕдӕр сыгъзӕрин адавтон, нӕдӕр ӕвзист, мӕнӕуы иунӕг гагайы аххосӕй мӕхи бацарӕфтыд кодтон».

Æмбисонд арӕзт у, цыдӕр ницӕйаг пайдайы охыл фыдбылызы чи бахауы, уыдон ныхмӕ.

 

eeeeОскар Уайльды хабӕрттӕй

 

 

***  1885 азы Уайльд хӕрхӕмбӕлд фӕци, фатерты тыххӕй хъалонтӕ чи иста, ахӕм лӕгыл. Уый Уайльды рагӕй агуырдта ӕмӕ йын ныр дзуры:

— Демӕ мӕ аныхас кӕнын фӕнды фатеры хъалоны тыххӕй.

— Цавӕр хъалоны тыххӕй? — дисгӕнгӕ афарста Уайльд.

— Сэр, ацы хӕдзары цӕрыс, фынӕй дӕр ам кӕныс!

— О, раст зӕгъыс. Фӕлӕ куыд ӕвзӕр фынӕй кӕнын, уый куы зонис…

 

 

***  Уайльд науыл цыдис Америкӕмӕ. Иуахӕмы дын афтӕ куы сдзурид:

— Атлантикӕйӕ тынг разы нӕ дӕн. ӕз куыд ӕн- хъӕлдтон, ахӕм диссагӕй йӕм ницы ис.

Уый фӕстӕ газетты фӕзындис уацхъуыд: «УАЙЛЬД ФЫДÆНХЪÆЛ ФÆЦИС АТЛАНТИКÆЙÆ».

Газеттӕй иу та ахӕм уацхъуыд рауагъта: «Æз фыдӕнхъӕл фӕдӕн Уайльдӕй. Бынӕй та «авторы» ном: «АТЛАНТИКОН ОКЕАН».

 

 

***  1900 азы сӕрды Уайльд Парижы ныхас кодта фыссӕг Аннӕ Бремонимӕ.

— Цӕуылнӕуал исты фыссыс? — бафарста йӕ Аннӕ. Уайльд ын дзуапп радта:

— ӕз фыстон, цард цы у, уый куы нӕма зыдтон, уӕд. Ныр ӕй базыдтон, ӕмӕ фыссын мӕ бон нал у.

 

*** Уайльд казинойы хъазыд, ӕмӕ йын йе ‘хцатӕ иууылдӕр амбылдтой. Швейцар ын цӕстмӕмитӕ кӕнгӕйӕ дуар парахат гом бакодта. Уайльд ӕй фӕрсы:

— Ссӕдз франкы мын ӕфстау нӕ раттис?

— Табуафси, — загъта швейцар ӕмӕ йӕм дӕтты ӕхца. Уайльд ын уӕзданхуызӕй йӕ къух аиуварс кодта:

— Курын, дӕхицӕн сӕ уадз. Уыдон дын мӕ лӕвар.

 

Ногӕй ӕмӕ та ногӕй дзурӕм ирон адӕммӕ, ӕппӕты зӕрдиагдӕрӕй та — ирон ӕвзаг ӕмӕ литературӕйы ахуыргӕнджытӕм, ахуырад ӕмӕ культурӕйы кусджытӕм, нӕ республикӕйы районты администрацитӕм, нӕ Иры фӕсивӕдмӕ: «Курӕм уӕ: ма базивӕг кӕнут 2019 азы фыццаг ӕмбисӕн нӕ национ журнал «Мах дуг» рафыссынмӕ. Йӕ рафыссыны аргъ посты афӕдзы ӕмбисӕн — 310 сомы ӕмӕ 32 капеччы. Индекс 73247.

Дзӕуджыхъӕуккӕгтӕн, ныронг куыд уыд, афтӕ журнал рафыссӕн ис редакцийӕн йӕхи мидӕг дӕр. Уый сын асламдӕр сыстдзӕни — афӕдзы ӕмбисӕн — 150 сомы, ӕнӕхъӕн афӕдзӕн та — 300 сомы.

Редакцийы адрис: Дзӕуджыхъӕу, Къостайы проспект, 11, Мыхуыры хӕдзар, «Мах дуджы» редакци.

 

ОСТАВЬТЕ ОТВЕТ

Please enter your comment!
Please enter your name here