«Технопарк у, ацы аз нӕ къухы саразын цы хорз хъуыддӕгтӕ бафтыд, уыдонӕн сӕ ахсджиагдӕр»

0
53

 

Знон нӕ республикӕйы байгом, сывӕллӕттӕ йӕ къӕсӕрӕй бахизынмӕ рагӕй кӕмӕн бӕллыдысты, уыцы технопарк «Кванториум». Кадджын мадзалы архайдтой РЦИ-Аланийы Сӕргълӕууӕг БИТАРТЫ Вячеслав, Хицауады Сӕрдары хӕдивӕг Иринӕ Азимова, республикӕйы ахуырад ӕмӕ наукӕйы министры хӕстӕ рӕстӕгмӕ ӕххӕстгӕнӕг Людмилӕ БАШАРИНА, Арӕзтадон компани «СТК 59»-ы генералон директор ХӕДАРЦАТЫ Игорь, сывӕллӕтты ныййарджытӕ, горӕты цӕрджытӕ. «Кванториум»-ы сывӕллӕттӕн фадат уыдзӕн лӕвар уӕлӕмхасӕн ахуырад райсынӕн. Ис дзы ӕхсӕз хайады: биоквантум, хай-тек лаборатори, робоквантум, промышленнон дизайн, IT-квантум ӕмӕ аэроквантум.

 

Уыцы-иу рӕстӕг сывӕл- лӕттӕн сӕ бон у англисаг ӕвзаг базоныны къорды ар- хайын, кӕнӕ шахмӕттӕй ахуыртӕм цӕуын. Ног азы фӕстӕ та ма дзы фӕзын- дзӕн математикон ахуыртӕ дӕр.

«Кванториум» республи- кӕйы фӕзынд Стратегион хъӕппӕристы агентад, УФ- йы Ахуырады министрад ӕмӕ Ахуырады ног хуызты райрӕзты агентады хъӕп- пӕрисӕй, технопаркты фе- дералон конкурсы архай- гӕйӕ цы грант рамбылдта, уый ‘руаджы. Йӕ саразынӕн бахъуыд 100 милуан сомӕй фылдӕр федералон ӕмӕ республикон бюджеттӕй. Ифтонггонд ӕрцыд бӕрзондтехнологон гӕрзтӕй, ис дзы диссаджы цымыдисаг музей.

— Махӕн не стырдӕр хӕс у нӕ кӕстӕрты ӕнӕниздзинад ӕмӕ рӕзтӕн хорз уавӕртӕ саразын, — загъта Битарты Вячеслав. — Технопарк у, ацы аз нӕ къухы саразын цы хорз хъуыддӕгтӕ бафтыд, уыдонӕн сӕ ахсджиагдӕр. Нӕ сывӕллӕттӕ тырнынц нырыккон наукӕтӕ базонынмӕ, ӕмӕ сын мӕ зӕрдӕ зӕгъы, цӕмӕй сӕ къухы стыр ӕнтыстдзинӕдтӕ бафта. Фидӕны бакусын хъӕуы, цӕмӕй хъӕуты цы сывӕллӕттӕ цӕры, уыдонӕн дӕр сӕ гӕнӕнтӕ фӕуӕрӕхдӕр уой. Ныр та уал сӕ бон у ардӕм цӕуын. «Кванториум»-ы уавӕртӕ куыд амонынц, афтӕмӕй сӕ бон у мин сывӕллоны райсын ахуыртӕм. Ныридӕгӕн уал сӕм ис ӕхсӕзсӕдӕйӕ фылдӕр курдиаты. Стыр бузныг мӕ зӕгъын фӕнды, ацы хъуыддаг саразын цыбыр рӕстӕгмӕ нӕ къухы кӕй фӕрцы бафтыд, уыдонӕн. Фыццаджыдӕр та, Хӕдарцаты Игорӕн, Калоты Русланӕн, республикӕйы Ахуырады министрадӕн ӕмӕ Хицауады минӕвӕрттӕн.

Битарты Вячеслав технопаркы директор Алексей Котецӕн балӕвар кодта кӕттагыл конд ныв. Уыдон та йын зӕрдылдарынӕн — нырыккон технологитӕм гӕсгӕ арӕзт цымыдисаг лӕвар. Алексей радзырдта технопарчы куысты тыххӕй. Иумӕ ӕрзылдысты кълӕстыл. Республикӕйы Сӕргълӕууӕг «Кванториум»-ы уавӕрӕй баззад разыйӕ. — Хуыцау ацы къахдзӕф сӕдӕйы фыццаг фӕкӕнӕд. Ахӕм бӕстыхӕйттӕ хъуамӕ Ирыстоны цалдӕр уа, цӕмӕй сывӕллӕттӕн се ‘ппӕтӕн дӕр сӕ бон уа сӕ курдиат рапарахат кӕнынӕн. Ног царды домӕнтӕм гӕсгӕ хъӕуы рӕстӕгимӕ ӕмдзу кӕнын. Хъуамӕ нӕм фидӕны цӕугӕ «Кванториум» дӕр фӕзына. Уый цӕудзӕн алы районтӕм, хъӕутӕм къуыри цалдӕр хатты, фидӕны та районты фӕзындзысты «Кванториум»-ы филиалтӕ. Информацион технологитӕ ивынц нымӕцон технологитӕм ӕмӕ 2024 азмӕ мах хъуамӕ сывӕллӕтты рахонӕм ног технологитӕм. Махӕн дӕр нӕ бон цас уа, уый бӕрц ыл бакусдзыстӕм. Ахуырады хӕрзхъӕддзинад цыфӕнды хъуыддагӕн дӕр йӕ бындур у ӕмӕ йӕм куыдфӕндыйы цӕстӕй кӕсӕн нӕй, — загъта РЦИАланийы информацион технологитӕ ӕмӕ бастдзинады управленийы сӕргълӕууӕг Сӕлбиты Алан.

С.А. Лавочкины номыл наукон-куыстадон иугонды сӕйраг специалист Къомайты Руслан технопарчы ахуыргӕнджытӕ ӕмӕ сывӕллӕттӕн арфӕ ракодта, ахуырады ног къӕпхӕныл кӕй ӕрлӕууыдысты, ног авналӕнтӕм кӕй бакъахдзӕф кодтой, уый тыххӕй. Балӕвар сын кодта ракетӕты макеттӕ, цӕмӕй сывӕллӕттӕм ӕвзӕрын кӕной стырдӕр ӕнтыстытӕм тырнындзинад. «Нӕ кӕстӕртӕ хъуамӕ нӕхицӕй хуыздӕр, сӕрӕндӕр ӕмӕ ӕнтыстджындӕр уой», — йӕ ныхӕстӕм ма бафтыдта канд Ирыстоны нӕ, фӕлӕ Уӕрӕсейы дӕр космонавтикӕйы къабазы йӕ ном хъуыстгонд кӕмӕн у, уый, Къомайты Руслан.

 

 

ХЕТЁГКАТЫ Оксанё

ОСТАВЬТЕ ОТВЕТ

Please enter your comment!
Please enter your name here