ГАЛУАНТЫ Людмилӕ: “Чиныг рауад ӕргом, курдиатджын ӕмӕ уарзтӕй хайджын”

0
131

Ирон литературӕйы ӕмӕ аивады дзаджджын ӕмӕ бӕркадджын къӕбицмӕ йӕ зынгӕ ӕмӕ ӕвидигӕ хуынтӕ цӕстуарзонӕй чи фӕхаста ӕмӕ абон дӕр чи хӕссы, уыдоны фыццӕгты рӕгъы лӕууы дыууӕ Ирыстоны адӕмон артисткӕ, поэт, Ирыл «хъарӕггӕнӕг» ус, йӕ хуыздӕр чызджытӕй иу ГАЛУАНТЫ Графы чызг Людмилӕ

Литературӕ ӕмӕ аивад чи зоны, чи уарзы, уыдон тынг хорз зонынц, Галуанон нӕ Ирӕн цы стыр хӕрзты бацыд, уый. Фӕлӕ Хуыцауы ацы сконд сылгоймаджы цӕмӕй Ирыстонӕй дарддӕр иннӕтӕ дӕр базоной, уый тыххӕй та ӕнӕмӕнг хъуыд йӕ цард ӕмӕ йе сфӕлдыстады тыххӕй иу чиныджы ныффыссын. Ахӕм стыр куыст бакӕнын та ӕнцон никуы уыд. Уӕлдайдӕр та ма, кӕуыл фыссай, уымӕн йӕ архив хӕсты цӕхӕры сырхпиллон арты куы басудза уӕд.

Фӕлӕ иннӕмӕй та Галуаноны хуызӕн адӕймагӕн балӕггад кӕнын Хуыцауӕн балӕггад кӕнынӕй уӕлдай нӕу. ӕмӕ ахӕм ныффыссыны хӕс йӕхимӕ райста Цӕгат Ирыстон-Аланийы адӕмон газет «Рӕстдзинад»-ы хистӕр уацхӕссӕг, УФ-йы Журналистты цӕдисы уӕнг Хетӕгкаты — Уаниты Оксанӕ. Оксанӕ йӕ дыстӕ мидӕмӕ басчъил кодта ӕмӕ йе ‘ккой цы уаргъ сӕвӕрдта, уый кӕрӕй-кӕронмӕ фӕхаста. Уыцы уаргъ куы ӕристӕуыд, уӕд дзы райгуырд чиныг «Мӕ адӕм, уӕ разы лӕууын ӕз ныфсджынӕй».

Чиныджы рацыд стыр ӕхсызгондзинад ӕрхаста Ирыстоны интеллигенцийӕн. Чидӕриддӕр ын йӕ кой фехъуыста, уыдоны-иу уыцы уысм бафӕндыд, цӕмӕй чиныг тагъддӕр бафта сӕ къухы дӕр. Уыимӕ чиныг рухс куы федта, уӕд йӕ автор Хетӕгкаты Оксанӕйӕн хӕрз чысыл рӕстӕджы фӕстӕ лӕвӕрд ӕрцыд Республикӕ Хуссар Ирыстоны Джусойты Нафийы номыл паддзахадон преми. Уый та ууыл дзурӕг у, ӕмӕ чиныг кӕй у биноныг ӕмӕ арфхъуыдыджын. Зӕгъӕн ис, ӕмӕ ацы чиныг у, 2018 азы дыууӕ Ирыстоны дӕр рухс цы чингуытӕ федтой, уыдонӕн у сӕ тӕккӕ ирддӕртӕй иу.

Ивгъуыд къуырийы кӕрон, майрӕмбоны, РЦИАланийы Национ наукон библиотекӕйы чиныгӕн арӕзт ӕрцыд презентацион изӕр. Архайдтой дзы: УФйы адӕмон ӕмӕ РЦИ-Аланийы адӕмон артист, Людмилӕйы хуыздӕр хӕлӕрттӕй иу — Гӕздӕнты Булат, РЦИ-Аланийы аивӕдты сгуыхт архайӕг, режиссер Бекъойты Розӕ, Ирыстоны зындгонд поэттӕ Кокайты Тотрадз, Касаты Батрадз, Хъамбердиаты Мысосты номыл паддзахадон литературон премийы лауреат, ӕрыгон поэт Баситы Зӕлинӕ, «Иры Стыр Ныхас»-ы координацион советы сӕрдар Кучиты Руслан ӕмӕ йӕ хӕдивӕг Еналдыты Хъазыбег, РЦИ-Аланийы мыхуыры фӕрӕзты комитеты сӕрдары хӕдивӕг Гӕбӕлаты Мӕдинӕ, газет «Рӕстдзинад»-ы сӕйраг редактор Битарты Маринӕ, йӕ хӕдивӕг, чиныджы редактор Колыты Иринӕ, ӕхсӕнадон змӕлд «Иудзинад»-ы уӕнгтӕ Мӕрзойты Тамерлан ӕмӕ Токты Валодя, Дзӕуджыхъӕуы 13- ӕм скъолайы директор Сӕлбиты Иринӕ, Уӕрӕсейы чемпион боксӕй Айларты Зауыр, Оксанӕйы райгуырӕн хъӕу СтавдДурты минӕвӕрттӕ, чиныгкӕсджытӕ ӕмӕ скъоладзаутӕ.

Мадзал амыдта РЦИ-Аланийы культурӕйы сгуыхт кусӕг Налдыхъуаты Зӕлинӕ. Раздӕр уал иууылдӕр бакастысты Галуанты Людмилӕйыл ист чысыл киноныв. Уым Галуанон Хуссар Ирыстоны фӕсхӕст уынгтыл цӕугӕйӕ кӕсы йӕхи фыст зӕрдӕмӕхъаргӕ ӕмдзӕвгӕ.

Уый фӕстӕ ныхасы бар лӕвӕрд ӕрцыд газет «Рӕстдзинад»-ы сӕйраг редактор, Джусойты Нафийы номыл литературон премийы къамисы уӕнг Битарты Маринӕйӕн. Уый загъта: — ӕвӕццӕгӕн ӕмӕ цыфӕнды чиныг дӕр рухс куы фены, уӕд уый ахсджиаг хъуыддаг вӕййы. Фӕлӕ абон цы чиныгыл дзурдзыстӕм, уымӕн та йӕ фӕзынд уыд бӕрӕгбоны хуызӕн. Ӕмӕ уыдон рӕсугъд ныхӕстӕ не сты.

Галуанты Людмилӕйы тыххӕй ныхас куы уа, уӕд уый хуымӕтӕджы ныхас нӕ уыдзӕн, фӕлӕ арф ӕнкъарӕнтыл амад. Кӕддӕр, афтӕ загътой, зӕгъгӕ, адӕймаг курдиатджын куы уа, уӕд уыцы курдиат вӕййы алывӕрсыг. Ӕмӕ ацы ныхӕстӕ комкоммӕ хауынц нӕ абоны хъайтар Галуанты Людмилӕмӕ. Уымӕн сценӕйыл уӕвгӕйӕ, сценӕйыл сурӕттӕ ӕвдисгӕйӕ йӕ алы ныхас, йӕ алы сызмӕлд дӕр буары куыд хизы, афтӕ йӕ фыст ӕмдзӕвгӕты йӕ алы рӕнхъ дӕр зӕрдӕйы тӕгтӕ агайынц. Чиныгӕн йӕ арф мидисыл та дзурӕг у уый, ӕмӕ кӕй ссис Джусойты Нафийы номыл премийы лауреат. Галуанты Людмилӕйы адӕм, фыццаджыдӕр, базыдтой куыд артист. Йӕ алы сурӕтӕй дӕр адӕмты зӕрдӕтӕ чи ӕнкъуысын кодта, сценӕмӕ йӕ алы рахызтӕй дӕр адӕмты зӕрдӕтӕ циндзинадӕй чи дзаг кодта, йӕ ныхасы уӕз кӕмӕн уыд, йӕ дзырды — кад, ахӕм артистӕй.

— Стыр бузныг мӕ зӕгъын фӕнды ацы чиныгыл ӕнӕзивӕгӕй, зӕрдӕрайгӕйӕ цы сылгоймӕгтӕ бакуыстой, уыдонӕн. Фӕлӕ уӕлдай бузныг зӕгъын ӕмӕ йын мӕ сӕрӕй ныллӕг кувын, чиныджы автор Хетӕгкаты Оксанӕйӕн. Ахӕм куыст бакӕнын ӕнцон нӕу. Людмилӕ Ирон театры сценӕйыл цы фӕд ныууагъта, уый бирӕтӕн не ‘нтысы. У диссаджы, цавӕрдӕр ӕрвон, зӕгъӕн дӕр кӕмӕн нӕй, ахӕм курдиаты хицау. ӕрмӕст «Ныййарӕджы кадӕджы» мады сурӕт куыд равдыста, уый йӕхӕдӕг дзурӕг у Галуаноны курдиатыл, — загъта Бекъойты Розӕ.

Чиныджы тыххӕй йӕ хъуыдытӕ загъта Баситы Зӕлинӕ:

— Хетӕгкаты Оксанӕйы чиныг у абон аргъ зын скӕнӕн кӕмӕн у, ахӕм лӕвар дыууӕ Ирыстоны интеллигенцийӕн. Адӕймаджы бӕлвырд, биноныг нӕ зонгӕйӕ, цӕуыл банцой кӕнай ахӕм ӕрмӕг дӕм нӕ уӕвгӕйӕ, ахӕм чиныг бацӕттӕ кӕнын зын у. Фӕлӕ Оксанӕйӕн бантыст. Нӕ бацауӕрста йӕ тыхтыл, йӕ размӕ сӕвӕрдта нысан ӕмӕ йӕм уӕззау, уӕндон къахдзӕфтӕй бахӕццӕ. Йӕ фыдӕбонӕй та райгуырд чиныг. Ӕмӕ абон Галуанты Людмилӕйы лӕгӕй лӕгмӕ чи нӕ зоны, уыдонӕн дӕр ацы чиныджы фӕрцы ис фадат йемӕ базонгӕ уӕвын. Ӕмӕ кӕд чиныг ӕгомыг у, дзурын нӕ зоны, уӕддӕр ӕй чи бакӕса, уый йӕ банкъардзӕн зӕрдӕйӕ! Оксанӕйӕн та йӕ ацы йӕ фидӕны иннӕ чингуыты цауддӕр фод!

Фыдӕлтӕ афтӕ дзырдтой, ӕрдзы фӕзындтыты ныхмӕ никӕй ӕмӕ ницӕй бон у, зӕгъгӕ. Ӕмӕ куыд раст уыдысты! Уый та уымӕн зӕгъын, ӕмӕ ацы изӕрмӕ хъуамӕ Хуссар Ирыстонӕй ӕрцыдаиккой бирӕ уазджытӕ, сӕ сӕргъы Паддзахады Президент Бибылты Анатоли афтӕмӕй. Фӕлӕ ӕфцӕгыл мит кӕй ныууарыд ӕмӕ фӕндӕгтӕ ӕхгӕд кӕй ӕрцыдысты, уыцы аххосӕгты тыххӕй сын нӕ бантыст. Уый хыгъд сын уыд фадат сӕ арфӕйы ӕмӕ бузныджы ныхас зӕгъын бастдзинады фӕрцы. Уыдонӕй ӕппӕты зӕрдӕмӕхъаргӕдӕр уыдис, Галуанты Людмилӕ Оксанӕмӕ аудиофыстӕй цы арфӕйы ныхас рарвыста, уый:

«Оксанӕ мӕ зынаргъ, ӕз стыр цымыдисимӕ бакастӕн дӕ чиныг. Ахӕм ӕнкъарӕн мӕм сӕвзӕрд, цыма мӕ ды базонгӕ кодтай мӕхиимӕ ногӕй. Мӕхи тыххӕй базыдтон бирӕ диссаджы ӕмӕ ӕнӕнхъӕлӕджы цаутӕ. Дӕ фӕрцы цыма мӕ цард ногӕй рацардтӕн, афтӕ мӕм фӕкаст. Куыд дын бантыст ӕртымбыл кӕнын, уыйбӕрц ӕрмӕг? Бирӕ цаутӕ дзы мӕнӕн мӕ хъуыдыйы дӕр нал уыдысты.

Афтӕ мӕм фӕкаст, цыма ды ӕдзухдӕр уыдтӕ мӕ фарсмӕ мӕ цардвӕндагыл цӕугӕйӕ. Уый ӕмрӕнхъ ды афтӕ арф аныгъуылдтӕ мӕ царды хабӕртты, мӕ зӕрдӕйы ӕнкъарӕнты, мӕ аивадон сфӕлдыстады, ӕмӕ чиныг дӕр рауад ӕргом, курдиатджын ӕмӕ уарзтӕй хайджын. Нӕй гӕнӕн бакӕнӕн ахӕм егъау куыстӕн, искӕй хъысмӕт дын дӕ зӕрдӕ куы нӕ бацагайа, уӕд. ӕмӕ дын уый тыххӕй зӕгъын стыр бузныг!»

Изӕр сфидыдта ирон зарӕг ӕмӕ фӕндырдзагъдӕй. Галуанты Людмилӕйы ӕмдзӕвгӕтыл конд зарджытӕй адӕмы зӕрдӕтӕ барухс кодтой: РЦИ-Аланийы адӕмон артисттӕ Дзуццаты Сослан, Хуытыгаты Маринӕ, Илурты Риммӕ, РЦИ-Аланийы культурӕйы сгуыхт кусӕг, Хуссар Ирыстоны сгуыхт артисткӕ Хъуысаты Эльвирӕ, РЦИ-Аланийы Композиторты цӕдисы сӕрдар Махъоты Ацӕмӕз, Тӕбӕхсӕуты Балойы номыл Ирон академион театры артисткӕ, зарӕггӕнӕг Цӕрикъаты Римӕ. Махъоты Ацӕмӕз ма ацагъта, Людмилӕйы номыл цы музыкалон уацмыс ныффыста, уый.

КАСАТЫ Аслӕнбег Авторы ист къамтӕ

ОСТАВЬТЕ ОТВЕТ

Please enter your comment!
Please enter your name here