Байгом ирон ӕгъдӕутты скъола-клуб

0
124

 

Ӕппӕтдунеон ӕхсӕнадон змӕлд «Иры Стыр Ныхас»-ы хъӕппӕрисӕй Дзӕуджыхъӕуы Фрунзейы уынджы 24-ӕм хӕдзары байгом «Ирон ӕгъдӕутты скъола-клуб». Нӕ республикӕйы цӕрджытӕй ирон ӕгъдӕуттӕ хуыздӕр базонын кӕй фӕнды, уыдонӕн сабаты «Иры Стыр Ныхас»-ы хистӕртимӕ фыццаг фембӕлд уыд Фӕсивӕды галуаны. Фыццаг ахуыртӕм ӕрбацыдысты фӕндзай адӕймагӕй фылдӕр. Уыдис дзы, суанг хъӕутӕй йӕ фӕндаг чи ракодта, ахӕмтӕ дӕр. Ӕхсызгон уыд, сӕ фылдӕр кӕстӕртӕ кӕй уыдысты, уый.

«Иры Стыр Ныхас»-ы сӕрдар Кучиты Руслан архайджыты базонгӕ кодта сӕ размӕвӕрд хӕстимӕ. Радзырдта, ӕгъдау ирон адӕймаджы царды цы ахсджиаг бынат ахсы, ӕмӕ нын ӕнӕ ӕгъдау фидӕнмӕ цӕуӕн цӕй тыххӕй нӕй, уый.

«Стыр Ныхас»-ы Ирон ӕгъдӕутты комитеты сӕргълӕууӕг Томайты Шамил куыд загъта, афтӕмӕй республикӕйы «Ирон ӕгъдӕутты скъола» байгом кӕнын рагӕй дӕр йӕ бӕллиц уыд. Арӕх ӕрбацӕуынц фӕсивӕды минӕвӕрттӕ «Стыр Ныхас»-ы хистӕртӕм алы хуызы фарстатимӕ нӕ ӕгъдӕутты тыххӕй. Базонын, йе сбӕрӕг кӕнын сӕ фӕфӕнды, абон бирӕтӕ цы бӕрӕгбӕттӕ схӕццӕмӕццӕ кодтой, уыдон растдӕр куыд кӕнын хъӕуы, уый. Сбӕрӕг кӕнын иу хъуыддаг у, фӕлӕ ма сын скъолайы амондзысты ӕгъдӕутты нысаниуӕг, цы хъуыды сӕ ӕвӕрд ис, цӕй тыххӕй сӕ ӕххӕст кодтой, уый дӕр. «Ӕз мӕ цард-цӕрӕнбонты бӕллыдтӕн ирон лӕджы ном кадимӕ хӕссынмӕ. Ӕнӕ ӕгъдау та ирон уӕвӕн нӕй», — бафтыдта ма йӕ ныхӕстыл нӕ буц хистӕр Шамил. Фӕлӕ ирон лӕджы уаргъ уӕззау у. Ӕнцон фӕндӕгтыл уайын чи сахуыр, уый йӕм нӕ бабӕлдзӕн, уый дзы дӕрдты лидзы. Мидисджын уыд йӕ раныхас сӕрдары хӕдивӕг Дзӕгъойты Вячеславӕн дӕр. Фыццаг фембӕлд, куыд хистӕртӕн, афтӕ кӕстӕртӕн дӕр уыд цымыдисаг. Алчидӕр сӕ йӕ хӕдзармӕ ацыд цыдӕр ногдзинӕдтӕ йӕ зӕрдыл бадаргӕйӕ. Скъолайы ахуырдзаутӕн «Стыр Ныхас»-ы уӕнгтӕ балӕвар кодтой, ӕрӕджы мыхуыры цы чиныг рауагътой, уый: «Чындзхаст, чызгӕрвыст ӕмӕ марды ӕгъдӕуттӕ».

Фембӕлд адарддӕр кодтой фарст-дзуаппы хуызы. Кӕстӕртӕй иронау чи нӕ ӕмбӕрста, фӕлӕ уӕддӕр ӕгъдӕуттӕ базонынмӕ тырнындзинад ацы ахуыртӕм кӕй ӕрбахаста, уыцы арфӕйаг кӕстӕртӕн нырма уал ӕгъдӕуттӕ ӕмбарын кодтой уырыссаг ӕвзагмӕ тӕлмац кӕнгӕйӕ. Ног азы фӕстӕ «Ныхас»-ы «Ирон ӕвзаджы скъола» кӕй байгом уыдзӕн, уыцы хъусынгӕнинагыл та сӕмбӕлдысты ӕхсызгонӕй.

«Ирон ӕгъдӕутты скъола-клуб»-ы кӕстӕрты ахуыр кӕндзысты сӕ фыдӕлты бындурон зондахастыл, фӕхайджын уыдзысты уыдоны фарн ӕмӕ ӕгъдауӕй. Ахуыры рӕстӕг сын бацамондзысты бӕгӕны фыцын, кусарт кӕнын, уӕливыхтӕ кӕнын, лӕггад кӕнын, ӕгъдау дӕттын, хъазты ракафын, зарын ӕмӕ бирӕ ӕндӕр хъуыддӕгтӕ. Куы фӕхъарм уа, уӕд фадат уыдзӕн ахуыртӕн сӕ фылдӕр ӕрдзы хъӕбысы аразын, ӕмӕ ӕндӕр рӕттӕм рахӕссынӕн. Ома, канд ныхасӕй нӕ, фӕлӕ практикон ӕгъдауӕй фидар кӕндзысты базонинаг хъуыддӕгтӕ. Амынддзинӕдтӕ канд «Стыр Ныхас»-ы уӕнгтӕ нӕ дӕтдзысты, фӕлӕ уый тыххӕй хуынд цӕудзысты уӕлдӕр ахуыргӕнӕндӕтты специалисттӕ дӕр, музейты наукон кусджытӕ, этнографтӕ, фӕлтӕрдджын хистӕртӕ. Скъола-клубмӕ сӕ бон ӕрбацӕуын у алы кары минӕвӕрттӕн дӕр.

«Ирон ӕгъдӕутты скъола»-йы ахуырдзауты дыккаг фембӕлд уыдзӕн цыппӕрӕмы, 20 декабры, 18.00 сахатыл, Фрунзейы уынджы 24-ӕм хӕдзары, дыккӕгӕм уӕладзыджы «Иры Стыр Ныхас»-ы ӕмбырдтӕгӕнӕн залы. Табуафси, нӕ фыдӕлты ӕгъдӕуттӕ хуыздӕр базонын кӕй фӕнды, уыдон саккаг кӕнӕнт.

ХЕТӔГКАТЫ Оксанӕ Авторы ист къам

ОСТАВЬТЕ ОТВЕТ

Please enter your comment!
Please enter your name here