Богӕлтты ерыстӕ — Беслӕны

0
66

 

Беслӕны спортивон-дзӕбӕхгӕнӕн комплексы 14-15 декабры 23-ӕм хатт ацыд Уӕрӕсейы сгуыхт тренертӕ Дзӕгъойты Рамазан ӕмӕ Наниты Оледжы номарӕн турнир уӕгъдибар хъӕбысхӕстӕй

Ацы аз турниры сӕ хъару ӕмӕ арӕхстдзинад ӕвдыстой Ирыстоны алы районты ӕмӕ Дзӕуджыхъӕуы спортивон скъолатӕ ӕмӕ клубты хъомылгӕнинӕгтӕ. Гауызыл ерыс кодтой 21 азӕй кӕстӕр богӕлттӕ.

Турнир гом кӕнгӕйӕ богӕлттӕ ӕмӕ спортуарзджытӕн арфӕ кӕнынмӕ рацыдысты: Рахизфарсы районы сӕргълӕууӕг, Уӕрӕсе ӕмӕ Европӕйы чемпион Дзӕгъойты Рамазаны хъомылгӕнинаг Фрайты Сослан, РЦИ-Аланийы физикон культурӕ ӕмӕ спорты министры хӕдивӕг Гуылчеты Валери, Уӕрӕсейы сгуыхт тренер Багаты Славик ӕмӕ ерысты сӕйраг тӕрхонгӕнӕг Наниты Зураб.

Фрайты Сослан залы уӕвджытӕн цыбырӕй сӕ зӕрдыл ӕрлӕууын кодта, Рамазан ӕмӕ Олег фӕсивӕды хъомыладон куысты цас хӕрзты бацыдысты, куыд зӕрдиагӕй куыстой сӕ хъомылгӕнинӕгты канд спорты нӕ, фӕлӕ царды раст фӕндагыл саразыныл. «ӕз мӕхи амондджын хонын, Рамазаны хуызӕн ахуыргӕнӕг ӕмӕ мын Оледжы хуызӕн ӕрдхорд кӕй уыди, уымӕй. Хъыгагӕн, сӕ дыууӕ дӕр цардӕй ахицӕн сты ӕгӕр раджы, ӕндӕр ма цас ӕмӕ цас хорздзинӕдтӕ скодтаккой сӕ равзӕрст фӕндагыл. Махӕн нӕ хӕс у сӕ рухс нӕмттӕ нӕ рох кӕнын, ӕмӕ мӕ уырны, нӕ рӕзгӕ фӕсивӕдӕн дӕр Рамазан ӕмӕ Оледжы нӕмттӕ сӕ равзӕрст фӕндаджы ныфсы хос кӕй уыдзысты, уый», — загъта Фрайты Сослан.

Фӕсивӕд ерысты сӕхи равдыстой сӕрӕнӕй. Алы уӕзы дӕр фыццаг бынат бацахсыныл цыди ахъаззаг тох. Уый кӕдфӕнды дӕр вӕййы цымыдисаг, уӕлдайдӕр ма богӕлттӕн сӕ архайд ӕрхъуыдыджын ӕмӕ техникон ӕгъдауӕй хъӕздыг куы вӕййы, уӕд. Ахӕм хорз цӕттӕдзинад равдыстой къорд богалы.

Ӕхсызгон уыди, уӕлахиздзаутӕ алы районтӕй кӕй уыдысты, уый дӕр. Уый дзурӕг у нӕ уӕгъдибар хъӕбысхӕсты скъолайӕн йӕ авналӕнтӕ стыр кӕй сты, ууыл. Дӕс уӕзы ерыс кӕнгӕйӕ фыццаг бынӕттӕм рацыдысты: 57 кг — Хъызынты Дзамболат (Дыгуры район), 61 кг — Гаситы Алан (Андиаты Сосланы номыл скъола), 65 кг — Дзукъаты Георги (Андиаты Сосланы номыл скъола), 70 кг — Челдыты Давид (Алагиры район), 74 кг — Куыдзойты Алан (Андиаты Сосланы номыл скъола), 79 кг — Хосроты Арсӕмӕг (ӕрыдоны район), 86 кг — Тбойты Олег (ӕрыдоны район) 92 кг Багаты Алан (Рахизфарсы район) 97 кг — Коцойты Тамерлан. (Рахизфарсы район), 125 кг — Кодзырты Сергей (Андиаты Сосланы номыл скъола).

Уӕлахиздзаутӕ ӕмӕ раззаг бынӕттӕ бацахсджыты схорзӕхджын кодтой майдантӕй, кубоктӕй, дипломтӕй ӕмӕ ӕхцайы премитӕй.

Сӕрмагонд лӕвӕрттӕ скодтой Дзӕгъойты ӕмӕ Наниты мыггӕгтӕ: хуыздӕр техникон цӕттӕдзинад равдисӕг» (лӕвӕрд ӕрцыд Багаты Аланӕн), «Уӕлахизмӕ тырнындзинад» (райста йӕ Коцойты Тамерлан), «ӕппӕты хуыздӕр богал» (лӕвӕрд ӕрцыд Кодзырты Сергейӕн).

Наниты ӕмӕ Дзӕгъойты бинонтӕ стыр бузныг зӕгъынц, турниры аразджытӕ ӕмӕ йын йӕ хӕрдзтӕ йӕхимӕ чи райста, уыдонӕн. Фыццаджыдӕр, Рахизфарсы районы разамонджытӕн, РЦИ-Аланийы Физикон культурӕ ӕмӕ спорты министрадӕн, Рамазан ӕмӕ Оледжы ӕрдхӕрдтӕн, Цӕгат Ирыстоны хъӕбысхӕсты федерацийӕн йӕ сӕргъы Хӕдарцаты Махарбег, афтӕмӕй.

БАСКАТЫ Уырызм

 

ОСТАВЬТЕ ОТВЕТ

Please enter your comment!
Please enter your name here