Цины бон — Цыколайы

0
250

 

Цины бон уыдис знон ӕрӕфы районы, Цыколайы цӕрджытӕн. Хъӕуысӕр, цыколайӕгтӕ Заводы поселок кӕй хонынц, уым байгом, цӕрджытӕ рагӕй кӕмӕ ӕнхъӕлмӕ кастысты, уыцы рӕвдауӕндон. Объекты арӕзтад цыдис, УФ-йы паддзахадон программӕ «Обеспечение доступным и комфортным жильем и коммунальными услугами граждан Российской Федерацийы»-мӕ гӕсгӕ. Сӕххӕст ӕй кодта арӕзтадон организаци «Спецтепломонтаж».

Рӕвдауӕндоны ис 120 бынаты, ӕппӕты хуыздӕр ӕмӕ нырыккондӕр уавӕртӕ.

Цыколайӕгты бӕрӕгбонмӕ ӕрбацыдысты РЦИАланийы Сӕргълӕууӕг Битарты Вячеслав, нӕ республикӕйы Хицауады Сӕрдары хӕдивӕг Иринӕ Азимова, ӕрӕфы районы сӕргълӕууӕг Хидирты Батрадз, районы разамынды минӕвӕрттӕ, цӕрджытӕ. Битарты Вячеслав зӕрдиаг арфӕтӕ ракодта хъӕуы цӕрджытӕн.

— Канд сымахӕн нӕу бӕрӕгбон, фӕлӕ ӕнӕхъӕн республикӕйӕн дӕр. Ацы рӕвдауӕндон цыппӕрӕм у ацы аз, фӕлӕ ма араздзыстӕм ноджыдӕр ахӕм социалон объекттӕ. Фидӕны ма байгом кӕндзыстӕм 10 ахӕм рӕвдауӕндоны. Афтӕмӕй нын гӕнӕн уыдзӕн, рӕвдауӕндӕттӕм дӕргъвӕтин рӕстӕг рады чи лӕууы, уыцы адӕмы нымӕц фӕкъаддӕр кӕнынӕн. Уымӕй уӕлдай ма нӕм ӕрӕфы районы бирӕ арӕзтадон хъуыддӕгтӕ ӕнхъӕлмӕ кӕсы. Арӕзт цӕуынц ног хӕдзӕрттӕ, цӕмӕй цӕрджытӕ кӕлӕддзаг цӕрӕнуӕттӕй ногтӕм раивой. Цалцӕг кӕндзыстӕм фӕндӕгтӕ ӕмӕ ӕндӕр социалон объекттӕ. Бузныг зӕгъын аразджытӕн, ахӕм рӕсугъд ӕмӕ хӕрзвадат бӕстыхай чи сарӕзта сабитӕн, — загъта Битарты Вячеслав ӕмӕ рӕвдауӕндонӕн зӕрдылдарӕн лӕвар дӕр ракодта.

Мадзалы архайджытӕн арфӕйы ныхӕстӕ загъта Хидирты Батрадз дӕр:

— Ахӕм бӕстыхайы сабитӕн уӕвын амондджын сабидуджы нысан у. Хуыцау зӕгъӕд, ӕмӕ дзы ӕнӕниз ӕмӕ зӕрдӕрухс фӕлтӕртӕ куыд хъомыл кӕна. Ацы объект нӕм республикӕйы хицауады фӕрцы фӕзынд, ӕмӕ уый иу хъуыддаг нӕу. Бӕлвырд ӕргом здӕхт цӕуы нӕ районмӕ ӕмӕ, нӕ зӕрды цы бирӕ ног фӕндтӕ ис, уыдон сӕххӕст кӕныныл архайдзыстӕм.

Хъӕуы хистӕрты номӕй ӕртӕ чъирийы скуывта ӕмӕ сывӕллӕтты Стыр Хуыцауыл бафӕдзӕхста Саккаты Артур. Уый фӕстӕ Битарты Вячеслав уазджытимӕ ӕрзылд рӕвдауӕндоныл, йӕхи цӕстӕй федта ног объекты фадӕттӕ, уавӕртӕ ӕмӕ зӕрдӕрухсӕй баззад.

САУТӔТЫ Тамилӕ Къамтӕ систа ЦӔГӔРАТЫ Дауы

ОСТАВЬТЕ ОТВЕТ

Please enter your comment!
Please enter your name here