“Мах хъӕуы размӕцыд. Хъуамӕ рахизӕм ног технологион цардыуагмӕ”

0
132

 

Уӕрӕсейы Федерацийы Президент Владимир Путин знон йӕ ӕрвылазон пресс-конференцийы фембӕлд нӕ бӕстӕйы ӕмӕ фӕсарӕнты дзыллон хабархӕссӕг фӕрӕзты минӕвӕрттимӕ. ӕдӕппӕтӕй дзы архайдтой 1702 уацхӕссӕджы. Пресс-конференци конд ӕрцыд Дунеон базарады центры. 2011 азӕй нымайгӕйӕ ацы пресс-конференци Владимир Путинӕн у цыппӕрдӕсӕм. Ацы аз майы Президенты бынатмӕ ногӕй ӕвзӕрст куы ‘рцыд, уӕдӕй та у фыццаг.

Уӕ бон хорз, зынаргъ ӕмбӕлттӕ!

Ног азы бӕрӕгбоны размӕ райдайӕм не ‘рвылазон фембӕлд ӕмӕ йӕ схонӕм прессконференци.

Алкӕд куыд вӕййы, афтӕ ацы хатт дӕр та райдайӕм ивгъуыдмӕ цӕуӕг азӕн иумӕйаг хатдзӕгтӕ скӕнынӕй. Ныхас сыл бирӕ цыд, фӕлӕ мӕм ис фӕстагдӕр, суанг зноны ӕмӕ ацы боны бӕрӕггӕнӕнтӕ. Ацы азы дӕс мӕймӕ мидбӕстон иумӕйаг продукты бӕрц сырӕзыд 1,7 проценты. Экономикӕйы рӕзты министрады прогноз уыд 1,8 проценты. Тынг тагъд рӕзыд промышленнон куыстад. Ивгъуыд аз мидбӕстон иумӕйаг продукт кӕд 2,1 проценты сырӕзыд, уӕд ацы аз январь-октябры та 2,9 проценты. Прогнозмӕ гӕсгӕ, афӕдзы кӕронмӕ хъуамӕ схӕцца уа 3 процентмӕ. Уыимӕ, хъомаггуыстгӕнӕг къабӕзтӕ рӕзынц ноджы тагъддӕр — 3,2 проценты.

Афӕдзы ӕртӕ кварталмӕ инвестициты бӕрц рауад 4,1 проценты. Фылдӕр кӕны розницӕйы базарад ӕмӕ уӕзӕгты зилдух, уыдон фӕфылдӕр сты 2,6 проценты. Афтӕ тагъд кӕд нӕ, уӕддӕр фылдӕр кӕнынц адӕмы ӕфтиӕгтӕ. Фӕстагдӕр бӕрӕггӕнӕнтӕм гӕсгӕ, уыдон фӕфылдӕр сты 0,5 проценты. Мӕ зӕрдӕ дарын, дарддӕр дӕр кӕй фылдӕр кӕндзысты, ууыл, уымӕн ӕмӕ мызды бӕрц дӕр кӕны фылдӕр. Ацы азы фараст мӕймӕ мызды бӕрц фӕфылдӕр 7,4 проценты, афӕдзы кӕронмӕ та хъуамӕ фӕфылдӕр уа 6,9-7 проценты.

Инфляци нырма ис, фӕлӕ йӕ бӕрц тӕссаг нӕу — 4,1-4,2 проценты.

Ӕхсызгон у, ӕгуыст адӕмы нымӕц къаддӕр кӕй кӕны. Фарон ӕгуыст адӕм кӕд 5,2 проценты уыд, уӕд ацы аз та — 4,8 проценты.

Рӕзы базарадон балансы профицит: 2017 азы уый уыд 115 миллиард доллӕры, ацы азы ӕртӕ кварталмӕ та — 157 миллиард доллары. Нӕ зӕрдӕ куыд дарӕм, афтӕмӕй афӕдзы кӕронмӕ уыцы профицит уыдзӕн 190 миллиард доллары.

Фидардӕр кӕнынц нӕ финанстӕ. Сыгъзӕрин ӕмӕ валютӕйы фӕстауӕрцы фонд фӕфылдӕр 7 процентӕй фылдӕр. Афӕдзы райдайӕны уыцы ӕхцайы бӕрц уыд 432 миллиарды, ныртӕккӕ та 464 миллиарды.

Рӕзы национ фӕрныгады фонд, уый фӕфылдӕр 22 проценты. Кармӕ гӕсгӕ фӕдзӕхстадон пенсийы рӕстӕмбис бӕрц 2017 азы уыд 13 677 сомы, ацы азы кӕронмӕ та уыдзӕн 14 163 сомы. Адӕм цӕрын райдыдтой фылдӕр: 2017 азы адӕймаг рӕстӕмбисӕй цард 72,7 азы, ацы аз та уыцы бӕрӕггӕнӕн у 72,9 азы.

Уыдон сты иумӕйаг бӕрӕггӕнӕнтӕ. Ныр та рахизӕм фӕрстытӕм, ӕмӕ сын дзуаппытӕ радтыныл бацархайдзынӕн.

Национ проектты тыххӕй

2018 аз сбӕттӕн ис национ проекттӕ ӕххӕст кӕнынимӕ. Сӕ амидингӕнӕг уыдысты Президенты майы указтӕ, ӕмӕ сӕ сӕххӕст кӕнын домы егъау финанстӕ. Фӕлӕ уыцы указтӕн сӕххӕстӕгӕн кӕй нӕй, уӕвгӕ, хъуыдысты ӕви нӕ, уый дӕр ӕххӕст бӕрӕг кӕй нӕу, Паддзахадон Советы уӕнгтӕй иуӕй-иутӕ сты ахӕм хъуыдыйыл хӕст.

Ацы фарстӕн Президент радта ахӕм дзуапп: “Мах хъӕуы размӕцыд. Хъуамӕ рахизӕм ног технологион цардыуагмӕ. Ӕнӕ уымӕй нӕ бӕстӕйӕн фидӕн нӕй. Уый у сӕйраг фарста, ӕмӕ йӕ хъуамӕ ӕмбарӕм. Фӕлӕ куыд бакӕнын хъӕуы? Ссарын хъӕуы фӕрӕзтӕ ӕмӕ сӕ аздахын рӕзты сӕйраг нысантӕм. Куыд саразын хъӕуы уыцы куыст? ӕхцатӕ байуарӕм, ӕмӕ ууыл хъуыддаг ахицӕн?

Фыццаджыдӕр, уыцы ӕх- цатӕ ссарын хъуыд. ӕмӕ 2017 азы дӕргъы Хицауад дӕр, Администрации дӕр сӕ агуырдта ӕмӕ уынаффӕтӕ кодта, цавӕр нысантыл сӕ бахардз кӕнын хъӕуы, ууыл. 20,8 триллион со- мы спълан кодтам ӕрмӕст нац- проекттӕн, 6,5 триллион сомы — инфраструктурӕйы райрӕзты хицӕн пъланыл. Цыфӕнды дӕр сӕ схонут уыцы пълантӕ. Мах сӕ схуыдтам «национ проекттӕ». Ӕппынфӕстаг, уый ӕмбӕрстгонд у, хӕстӕ бӕрӕг сты. Фыццаг — уый у ӕнӕниздзинад, ахуырад, наукӕ, адӕймаджы капитал, ӕнӕ уымӕй ницавӕр размӕцыдӕн ис гӕнӕн. Ӕмӕ дыккаг — куыстад, экономикӕ. Алцыдӕр баст у экономикӕимӕ. Фыццаг хай дӕр, дыккаг хай дӕр — уыдон комкоммӕ сты нымӕцон эконо- микӕ, роботехникӕйы рӕзт ӕмӕ афтӕ дарддӕр. Амӕйразмӕ Хъырымы, Ялтӕйы дӕр уый тыххӕй ӕрӕмбырд стӕм ӕмӕ Хицауадӕй, стӕй регионтӕй дӕр не ‘мкусджытимӕ ныхас кодтам, куыст куыд рацаразӕм, ууыл. Уымӕн ӕмӕ, ӕцӕгӕй- дӕр, ис цӕстдардимӕ баст фарстатӕ, ӕмӕ, федералон центрӕй регионтӕм кӕсгӕйӕ, уыцы цӕстдард хъуамӕ уа ахадгӕдӕр. Регионты ис фарстатӕ, уый раст у. Фӕлӕ уыцы фарстатыл ныртӕккӕ кусӕм. Хъуыддаг цӕй мидӕг ис? Хъуыддаг ис уый мидӕг, ӕмӕ ӕхцатӕ сты федералон, программӕтӕм гӕсгӕ куыстытӕн та сӕ фылдӕр арӕзт цӕуынц регионты, ӕмӕ ахӕм куыстмӕ регионтӕ хъуамӕ уой цӕттӕ. ӕмӕ адӕм хъуамӕ уый ӕнкъарой. Уый у фыццаджыдӕр.

Дыккаджыдӕр, хъӕуы бамбарын — регионтӕ сӕрӕхсдзысты ӕви нӕ? Уымӕ гӕсгӕ иуӕй-иутӕ зӕгъынц: нӕ сарӕхсдзысты. Фӕлӕ афтӕ дзурынц, кӕройнаг бӕрӕггӕгӕн аразгӕ кӕмӕй у, уыдон. ӕмӕ афтӕ ма хъуыды кӕнӕнт, фӕлӕ кусӕнт, ӕмӕ сӕ бон кусын нӕу, зӕгъгӕ, кӕд уый ӕмбарынц, уӕд сӕ бынӕттӕ суӕгъд кӕнӕнт ӕмӕ сӕ раттӕнт, кусын кӕй фӕнды, уыдонӕн. Раст зӕгъгӕйӕ, кусын кӕй нӕ фӕнды ӕмӕ, хъуыддагӕй ницы рауайдзӕн, зӕгъгӕ, чи зӕгъы, ӕз ахӕмты нӕ уынын. Ахӕм ныхӕстӕ кӕнынц, иуварсӕй чи кӕсы, уыдон. Нӕ размӕ стыр хӕстӕ куы нӕ ӕвӕрӕм, уӕд нӕ къухы ӕппындӕр ницы бафтдзӕн. Уымӕ гӕсгӕ мӕ зӕрдӕ дарын бӕстон, лӕмбынӕг куыстыл, федералон центр ӕмӕ регионты ӕнгом куыстыл. О, цавӕрдӕр бӕрӕггӕнӕнтӕ хъӕуы сраст кӕнын. Уый фӕдыл уынаффӕтӕ бахастой не ‘мкусджытӕ регионтӕй, ӕмӕ мӕ зӕрдӕ дарын, Хицауад сӕ кӕй фехъусдзӕн ӕмӕ куыст кӕй фӕбӕлвырддӕр кӕндзӕн, ууыл. ӕмӕ уӕд куыст размӕ цӕудзӕн ноджы хъуыздӕр”.

Социалон рӕстдзинад

Ӕхсӕнады ныртӕккӕ тынг карз у социалон рӕстдзинады фарста. «Левадӕцентр»-ы бӕрӕггӕнӕнтӕм гӕсгӕ, адӕмӕн сӕ 65 проценты абон стыр ӕхсызгонӕй мысынц Советон Цӕдис. Пресс-конференцийы райхъуыст социализм Уӕрӕсемӕ раздахынимӕ баст фарст.

Владимир Путины хъуыдымӕ гӕсгӕ уымӕн уӕвӕн нӕй. “Мӕнмӕ афтӕ кӕсы, ӕмӕ ӕхсӕнады ныры онг уыйбӕрц ивддзинӕдтӕ ӕрцыд, уыцы хуызы социализмӕн фӕстӕмӕ раздахӕн нӕй. Гӕнӕн ис социализмы хицӕн элементтӕн экономикӕйы, социалон къабазы, фӕлӕ уыдӕттӕ алкӕддӕр баст сты, хӕрдзтӕ ӕфтиӕгтӕй куы фӕфылдӕр вӕййынц, уыимӕ. Ахӕм фӕндаг экономикӕйы ӕркӕны къуырцдзӕвӕнмӕ. Фӕлӕ ресурстӕ адӕмы ‘хсӕн ӕмхуызон дих кӕнын, абон мӕгуыр цард чи кӕны, уыцы адӕммӕ рӕстзӕрдӕ дарын, мӕгуыр адӕмы нымӕц къаддӕрӕй-къаддӕр кӕнын, адӕмӕн сӕ фылдӕрмӕ аккаг уавӕрты хӕццӕ кӕнын ӕнӕниздзинад хъахъхъӕнынады, ахуыры лӕггӕдтӕ — уыцы хуызы паддзахадон политикӕ ӕххӕст кӕнӕм ныртӕккӕ дӕр, социализацийы кой кӕд кӕнут, уӕд. Комкоммӕ уыдӕттӕм арӕзт сты, райдайӕны ныхас цы национ проекттыл кодтам, уыдон”, — бафиппайдта Президент.

«Экономикӕйӕн хъуамӕ уа инновацион бындур»

Зындгонд куыд у, афтӕмӕй ӕрӕджы Уӕрӕсейы Федерацийы Президент Владимир Путин Хицауады раз сӕвӕрдта экономикӕйы ахъаззаг размӕкъахдзӕф акӕныны хӕс. Прессконференцийы архайджытӕ сӕвӕрдтой фарст, ома, уыцы размӕцыды хъуамӕ рӕзты бӕрӕггӕнӕнтӕ уой цыппар-фондз хатты бӕрзонддӕр. Кӕд Уӕрӕсейы Хицауад зӕрдӕ ӕвӕры хӕстӕ сӕххӕст кӕнынӕй, уӕддӕр сӕ хатдзӕгтӕм гӕсгӕ хӕстӕгдӕр цалдӕр азмӕ мидбӕстон иумӕйаг продукты рӕзты бӕрӕггӕнӕнтӕ дыууӕ процентмӕ дӕр не схӕццӕ уыдзысты. Афтӕмӕй хъуамӕ Уӕрӕсейы экономикӕ цӕй фӕрцы акӕна уыцы къахдзӕф?

Бӕстӕйы Президенты дзуапмӕ гӕсгӕ 2008 азӕй 2018 азы онг экономикӕйы рӕзт рауадис 7,4 проценты. ӕппӕт уыцы хъуыддӕгтыл цыдысты дунеон экономикон къуырцдзӕвӕны рӕстӕг, уый фӕстӕ та 2014- 2015 азты райдыдта къуырцдзӕвӕны ног уылӕн. Нефты аргъ ӕрхауд, афтӕ — нӕ иннӕ экспортон сӕйраг товарты хуызтыл аргъ дӕр. «ӕцӕгдӕр мидбӕстон иумӕйаг продукты рӕзт у ӕппӕты сӕйрагдӕр бӕрӕггӕнӕн, уавӕрӕй рахизӕн ис ӕрмӕстдӕр экономикӕйы структурӕ аивгӕйӕ. Национ проекттӕ конд ӕрцыдысты уыцы нысанимӕ, лӕвӕрд сын ӕрцӕудзӕн егъау фӕрӕзтӕ. Экономикӕйӕн хъуамӕ уа инновацион бындур, афтӕмӕй аивдзӕн йӕ хӕрзхъӕддзинад», — загъта Владимир Путин.

Хицӕн ныхас бацахста, 2019 азы 1 январӕй хицауадон уынаффӕты фӕстӕ бирӕ товартӕ ӕмӕ лӕггӕдты ӕргътӕ кӕй фӕбӕрзонддӕр уыдзысты, уый дӕр. Зӕгъӕм, аргъыл бафтауыны тыххӕй хъалон фӕфылдӕр уыдзӕн 20 проценты, уый фӕдыл цӕрӕнуӕтты коммуналон хӕдзарады фиддонтӕ ӕмӕ аф- тӕ дарддӕр. Уацхӕсджыты хъуыдымӕ гӕсгӕ уыдон ӕгӕр стыр уаргъ сты уӕрӕсейӕгтӕн ӕмӕ экономикӕйӕн. Владимир Путины ныхасмӕ гӕсгӕ аргъыл бафтауыны тыххӕй хъалон иннӕ бӕстӕты у ноджы бӕрзонддӕр, Уӕрӕсейы дӕр иу рӕстӕг фӕкъаддӕр ис, ныр та йыл бафтаудзысты. Уыцы-иу рӕстӕг бирӕ льготӕтӕ хъахъхъӕд ӕрцӕудзысты. Президент куыд загъта, афтӕмӕй та фӕстӕдӕр уыцы бӕрц фӕкъаддӕр уыдзӕнис.

Цӕрӕнуӕтты-коммуналон хӕдзарады лӕггӕдты ӕргътыл бафтдзӕн, фӕлӕ йӕ скӕндзысты дыууӕ хайӕ: фыццаг хатт бафтаудзысты 1,7 проценты, уый фӕстӕ та — 2,4 проценты. Иумӕйагӕй рауайдзӕн — 4,1 проценты.

«Мах нӕ бӕстӕ бахъахъхъӕндзыстӕм»

Фӕстаг рӕстӕг дунейы хъомысджындӕр бӕстӕты ‘хсӕн фӕкарздӕр сты ахастдзинӕдтӕ, цӕмӕдӕр гӕсгӕ арӕхӕй-арӕхдӕр ныхас цӕуы хӕцӕнгарзыл тохы бацӕуыныл. Пресс-конференцийы архайджытӕ рӕгъмӕ рахастой ядерон хӕст ӕрцӕуыны фарста дӕр. Владимир Путин куыд бафиппайдта, афтӕмӕй уыдон сты тынг ахсджиаг фарстатӕ, кӕд сын исчи аккаг аргъ нӕ кӕны, уӕд уымӕй дунейы мидӕг карздӕр ӕмӕ тӕссагдӕр кӕнынц уавӕртӕ. Уӕрӕсейы Президенты хъуыдымӕ гӕсгӕ нырыонг хӕцӕнгӕрзтӕй ифтонг кӕныны хъуыддаг урӕд цыдис, куыста сӕрмагонд дунеон системӕ. Америчы Иугонд Штаттӕ Ракетӕтӕй хъахъхъӕныны бадзырдыл сӕ къух куы систой, уӕд уый бынтондӕр фӕбӕрӕг.

Владимир Путины ныхасмӕ гӕсгӕ Уӕрӕсе уыцы хъуыддӕгты фӕстӕ бавнӕлдта хӕцӕнгарзы ног системӕтӕ аразынмӕ. Президент ма ӕрхаста ӕндӕр дӕнцӕгтӕ дӕр, уыдонмӕ гӕсгӕ Ныгуылӕны бӕстӕтӕ халынц ӕндӕр бадзырдтӕ дӕр. Кӕд ӕмӕ Уӕрӕсе йӕ размӕ гӕрзифтонгдзинад фӕхъомысджындӕр кӕныны нысан нырыонг не ‘вӕрдта, уӕд ӕй нырыккон уавӕр уый домы. ӕрмӕстдӕр цӕмӕй йӕ адӕмы, йӕ бӕстӕ бахъахъхъӕна, уый охыл. «Мах нӕ бӕстӕ бахъахъхъӕндзыстӕм, куыд скӕнгӕ у, уый дӕр зонӕм. Фӕлӕ ӕппӕт дунейӕн ацы уавӕртӕ сты тӕссаг, уӕддӕр мӕ зӕрдӕ дарын, дзыллӕтӕм уыййас зонд кӕй разындзӕн ӕмӕ хӕсты арт кӕй не ссудздзысты, ууыл», — загъта Президент.

 

Сабырдзинады бадзырды тыххӕй

Курилаг сакъадӕхты фарста рӕгъмӕ иу ӕмӕ дыууӕ хатты хаст не ‘рцыдис. Фӕстаг азты Японы разамынд ӕвӕрынц дыууӕ бӕстӕйы ‘хсӕн Сабырдзинады бадзырд сфидар кӕнын ӕмӕ сын сакъадӕхтӕ радих кӕныны хъуыддаг. Уӕрӕсейӕгты хъуыдымӕ гӕсгӕ та хъуамӕ уыцы сакъадӕхтӕ баззайой нӕ бӕстӕйы. Пресс-конференцийы япойнаг уацхӕссӕг бафарста Владимир Путины, дыууӕ бӕстӕйы ‘хсӕн ахастдзинӕдтӕ уӕлдӕр, хуыздӕр ӕмвӕзадмӕ сисынӕн цавӕр мадзӕлттӕ хъӕуы, уымӕй. Иннӕ ахӕм, америкаг хӕцӕнгӕрзтӕ ӕмӕ ӕфсӕдтӕн Японы бынат скӕныны хъуыддаг дӕр у ахсджиаг.

Владимир Путин куыд загъта, афтӕмӕй ныртӕккӕ дӕр Окинавӕйы ис америкаг хӕстон инфраструктурӕ. Кӕд ӕмӕ цӕрджытӕ уыцы хъуыддаджы ныхмӕ сты, уӕддӕр уавӕр нӕ ивы. «Ныр Сабырдзинады бадзырд куы бафыссӕм, уӕд цы уыдзӕн, уый нӕ зонӕм. Ацы фарстӕн нӕм дзуапп куы нӕ уа, уӕд нӕ бон ахъаззаг уынаффӕтӕ хӕссын нӕу. ӕнӕмӕнг мах тыхсын кӕнынц ракетӕты ныхмӕ системӕтӕн бынӕттӕ скӕныны пълӕнттӕ. Уыдон хи бахъахъхъӕныны хӕцӕнгӕрзтӕ кӕй не сты, фӕлӕ америкаг ядерон хъомысы стратегион хай — уый мах бирӕ хӕттыты загътам америкаг разамонджытӕн. Мах алцыдӕр хорз ӕмбарӕм, фӕлӕ уӕддӕр тырнӕм, цӕмӕй нын Японимӕ уа Сабырдзинады бадзырд, хъуамӕ нӕ ахастдзинӕдтӕ банывыл уой. Кӕд хъуыддаг вазыгджын у, уӕддӕр цӕттӕ стӕм нӕ япойнаг ӕмкусджытимӕ ӕмархайдмӕ», — фӕнысан кодта Уӕрӕсейы Президент.

Терроризмимӕ тох

Ацы бонты Америчы Иугонд Штатты Президент Дональд Трамп фехъусын кодта, се ‘фсӕдтӕ Сирийӕ кӕй рахуыдтой ӕмӕ «ИГИЛ»-ыл, кӕй фӕуӕлахиз сты, уый. Пресс-конференцийы Уӕрӕсейы Президенты бафарстой ацы цауты тыххӕй. Владимир Путины дзуапмӕ гӕсгӕ Сирийы террористтӕн тыхджын ныхкъуырд лӕвӕрд кӕй ӕрцыд, уыимӕ разы у америкаг Президентимӕ. Фӕлӕ уыцы къордтӕй чидӕртӕ хӕстӕгдӕр регионтӕм ӕмӕ Афганистанмӕ кӕй бафтдзысты, уымӕй тӕссаг у.

Уӕрӕсейы Президенты хъуыдымӕ гӕсгӕ уавӕр хъуамӕ тыхсын кӕна ӕрмӕст нӕ бӕстӕйы нӕ, фӕлӕ Америчы, европӕйаг, азиаг ӕмӕ ӕндӕр паддзахӕдты разамонджыты дӕр. Уымӕн ӕмӕ терроризмы ныхмӕ гӕрӕнтӕ хъуамӕ ӕвӕрд цӕуой иумӕйагӕй. «Америкаг ӕфсӕдты Сирийӕ кӕй рахуыдтой, уый мын зын бамбарӕн у. Афганистаны кӕдӕй сты америкӕгтӕ? 17 азы дӕргъы дзурынц, мӕнӕ-мӕнӕ не ‘фсӕдтӕ ардыгӕй ракӕндзыстӕм. Ныртӕккӕ мах иумӕйагӕй стӕм политикон нывылдзинады фарс: Уӕрӕсе, Турк, Франц, Герман, Иран — архайӕм нӕ нысантыл ӕмӕ, ӕвӕццӕгӕн, иннӕ азы райдайӕны уавӕр фӕнывылдӕр уыдзӕн. Кӕд ӕмӕ нӕм цавӕрдӕр ныхмӕлӕудтӕ рауайы, уӕддӕр нӕ специалисттӕ, министрадтӕ, сӕрмагонд службӕты ‘хсӕн Сирийы терроризм сыскъуыны тыххӕй куыст цӕуы», — загъта Владимир Путин.

Хъӕууон хӕдзарады уавӕр

Статистикӕ куыд амоны, афтӕмӕй фӕстаг азты хъӕууон хӕдзарады рӕзт фӕкъуылымпы. Уӕрӕсейы Президент ацы аз цы национ проекттӕ сфидар кодта, уыдоны ‘хсӕн нӕй хъӕууон хадзарады рӕзтимӕ баст документ. Уымӕ гӕсгӕ пресс-конференцийы ныхас рауад ацы ахсджиаг темӕйыл дӕр. Владимир Путины дзуаппмӕ гӕсгӕ хъӕууон хӕдзарадӕн паддзахады ‘рдыгӕй ӕмбӕлгӕ фӕрӕзтӕ дихгонд цӕуынц, дарддӕр дӕр афтӕ уыдзӕн, егъау хӕдзарӕдтӕн фермертӕн ӕмӕ архайды иннӕ хуызтӕн. Къабазы рӕзт къуылымпытимӕ кӕй у, уый Президент бӕтты хъӕууонхӕдзарадон продукциуадзджытӕ уӕззау уавӕрты кӕй кусынц, уыимӕ. Фӕбӕрӕг ма кодта, нӕ бӕстӕйы ныхмӕ цы экономикон цӕлхдуртӕ ӕвӕрд ӕрцыд, уый дӕр.

Владимир Путин куыд загъта, афтӕмӕй сӕйрагдӕр у ерысхъомдзинад фӕбӕрзонддӕр кӕнын, инфраструктурӕйыл бакусын ӕмӕ нӕ продукци ӕндӕр бӕстӕтӕм уӕй кӕныны хъуыддагыл бацархайын. Кӕд ӕмӕ фарон продукци ауӕй кодтам 20 миллиард сомы аргъ, уӕд ацы аз та схӕццӕ уыдзысты 25 миллиард соммӕ. Инфраструктурон рӕзтӕн радих кӕндзысты 400 миллиард сомы, уыдоны фӕрцы арӕзт ӕрцӕудзысты фӕндӕгтӕ, портытӕ, цӕттӕгонд цӕудзысты специалисттӕ, фылдӕр ӕргом аздахын хъӕудзӕн хӕрзмыггаджы куыстмӕ ӕмӕ афтӕ дарддӕр.

 Бӕрнон журналистикӕ

Рӕстдзинад ӕргомӕй дзурыны хӕс хауы ӕппӕт журналисттӕм дӕр, уымӕй дарддӕр хъуамӕ ӕппӕт цаутӕ дӕр ӕвдисой ӕргомӕй ӕмӕ бӕрнонӕй. Цы кусынц, уый тыххӕй хъуамӕ дзуапп раттынхъом уой. Фӕлӕ уый хъуамӕ уа «фӕлмӕн тых», ноджы нырыккон карз уавӕрты. Владимир Путины бафарстой, ома, Уӕрӕсейы ахӕм «фӕлмӕн тых» ис ӕви нӕ, ӕмӕ бӕрнон журналистикӕйы ахадындзинадӕй. Президент куыд загъта, афтӕмӕй тыхтӕ агургӕ сты рӕстдзинады, хъуамӕ уымӕ гӕсгӕ кусой дзыллон хабархӕссӕг фӕрӕзтӕ дӕр. Уыцы бындуртыл ӕнцой кӕнгӕйӕ уыдзысты дзыллӕты ӕууӕнкӕй хайджын.

«Цы йӕ сусӕг кӕнӕм, нӕ цард коммерциимӕ куы сбастам, уӕд дзыллон хабархӕссӕг фӕрӕзтыл адӕм нал ӕууӕндыдысты. Фӕлӕ уӕддӕр хъӕуы ӕууӕнкмӕ тырнын, нӕ бӕстӕйӕн, дунейӕн ахсджиаг цы у, уыцы фарстатӕн се ‘цӕгдзинад ӕвдисын. Уый не ‘ппӕтӕн дӕр у ахсджиаг. Афтӕ мӕм кӕсы, ӕмӕ фӕстаг рӕстӕг ахӕм зондахаст фидардӕр кӕны», — бафиппайдта Президент.

Артаджы аргъ

Францы цӕрджытӕ, артаджы аргъ кӕй фӕбӕрзонддӕр, уый ныхмӕ раивылдысты уынгтӕм ӕмӕ Президенты бахъуыдис ӕнӕнхъӕлӕджы экономикон ӕмӕ социалон уавӕртӕ сфидар кӕнын. Прессконференцийы систой артаджы аргъимӕ баст фарста дӕр. Ома, нӕ бӕстӕйы артаджы аргъ куы фӕбӕрзонддӕр уа, уӕд уӕрӕсейӕгты быцӕуы хъомыс куыд банымайӕн уыдзӕн? Владимир Путин куыд бафиппайдта, афтӕмӕй Францы хицауады архайдӕн аргъ кӕнын раст нӕу. «Махмӕ бензины аргъыл бафтыдтой 2017 азы ӕмбисӕй, уымӕн ӕмӕ дунеон базарады нефты аргъ фӕзынаргъдӕр. Фӕлӕ нӕ Хицауад спайда кодтой ӕргътӕ бауромыны мадзӕлттӕй, суанг ма сӕ фӕкъаддӕр кӕныныл дӕр бацархайдтой фӕрӕзтӕ дӕттӕг кампанитимӕ бадзырды бындурыл», — загъта Президент.

Ома, Францы сӕхӕдӕг бавнӕлдтой ӕргътӕ уӕлдӕр кӕнынмӕ, Уӕрӕсейы Хицауад та уыцы уавӕримӕ тох кӕнынц. Президенты ныхасмӕ гӕсгӕ, 2019 азы мартъийы онг бадзырд уыдзӕн йӕ тыхы, чи зоны, 1-1,5 проценты бӕрц цавӕрдӕр ивддзинӕдтӕ ӕрцӕудзӕн, уымӕн ӕмӕ, аргъыл бафтауыны тыххӕй хъалон фӕфылдӕр уыдзӕн. Владимир Путин зӕрдӕ бавӕрдта, Уӕрӕсейы Хицауад нефты продукттӕн сӕ ӕргътӕ фӕбӕрзонддӕр кӕнын кӕй нӕ бауадздзӕн, уымӕй. Уӕрӕсейӕгты быцӕуы хъомысы тыххӕй та загъта афтӕ: «Адӕмӕн бар ис сӕ хъуыды зӕгъынӕн, бахъахъхъӕнынӕн, уыимӕ дзыллон хуызы дӕр, митингты, ӕрмӕст закъоны фӕлгӕтты.

Ӕрмӕг бацӕттӕ кодтой БУТАТЫ Эльзӕ ӕмӕ ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here